قوستاناي وبلىسىنىڭ وڭتۇستىك اۋداندارىندا ورنالاسقان «التىن دالا» مەملەكەتتىك تابيعي رەزەرۆاتىندا مامىر ايىنىڭ 11-ءى كۇنى ماماندار 117 اقبوكەننىڭ ءولى دەنەسىن تاۋىپ العانىن حابارلاعان ەدى. بۇل دالا سۇلۋىنا كەلگەن جامانشىلىقتىڭ بەلگىسى ەكەن. سول كۇننەن باستاپ كيىكتەردىڭ جاپپاي قىرىلۋى ۇدەي ءتۇستى. وتكەن اپتانىڭ اياعىندا وبلىستاعى ورمان شارۋاشىلىعى جانە جانۋارلار دۇنيەسى ينسپەكتسياسىنىڭ باسشىلارى ولگەن كيىكتىڭ سانى ءبىر مىڭنان اسقانىن حابارلاعان ەدى. ءبىز بۇل اقپاراتپەن «ەگەمەننىڭ» وقىرماندارىن دا حاباردار ەتكەن ەدىك. ەندى, مىنە, ولگەن كيىكتىڭ سانى 5400-دەن اسىپ كەتتى.
– مەنىڭ وكىمىممەن وبلىستا ارنايى كوميسسيا قۇرىلىپ, ونى وبلىس اكىمىنىڭ ورىنباسارى بازىل جاقىپ باسقارۋدا. ونىڭ قۇرامىنا وبلىستاعى ىشكى ىستەر دەپارتامەنتىنىڭ, رەزەرۆات ورنالاسقان اۋداندار امانگەلدى مەن جانگەلدين اۋداندارىنىڭ اكىمدەرى جانە باسقا دا وسى ىسكە قاتىستى ۆەدومستۆولاردىڭ ماماندارى كىردى. كيىكتىڭ قىرىلۋ سەبەبىن انىقتاۋ ءتيىستى عىلىمي مەكەمەلەردىڭ ءىسى, ال اتقارۋشى بيلىك جۇقپالى اۋرۋ بولا قالعان جاعدايدا ودان ادامداردى قورعاۋ, قاۋىپتى اۋرۋلاردىڭ ارى قاراي تاراماۋى ءۇشىن قولدان كەلگەننىڭ بارلىعىن دا جاسايتىن بولادى, – دەيدى وبلىس اكىمى نۇرالى سادۋاقاسوۆ.
كيىك قىرىلىپ جاتقان «التىن دالا» مەملەكەتتىك تابيعي رەزەرۆاتىندا قازىر 30-عا جۋىق تەحنيكا, 150 ادام جۇمىس ىستەپ جاتىر. ولار كيىكتىڭ ولەكسەلەرىن دەر ۋاقىتىندا جويىپ وتىر. سونىمەن قاتار, ورمان شارۋاشىلىعى جانە جانۋارلار دۇنيەسى رەسپۋبليكالىق كوميتەتىنىڭ ماماندارى دا امانگەلدى اۋدانىنداعى وقيعا بولعان جەردە ءجۇر.
«التىن دالا» مەملەكەتتىك تابيعي رەزەرۆاتى 490 مىڭ گەكتار جەردى الىپ جاتىر. ونىڭ 16 مىڭ گەكتارىندا 11 مامىردان باستاپ ولگەن كيىكتەر ولەكسەسىن جويىپ, زالالسىزداندىرۋ جۇمىستارى جۇرگىزىلۋدە. قوستاناي وبلىسىندا كيىكتىڭ قىرىلۋى ءبىرىنشى رەت ورىن الىپ وتىرعان جوق. 2012 جىلى جانگەلدين اۋدانىندا مىڭ قارالى كيىك پاستەرەللەزدىڭ قۇربانى بولعان ەدى. ودان كەيىن كيىكتىڭ جاپپاي ءولۋى باتىس قازاقستان ۇيىرىندە دە بولعان. بىراق, دالا سۇلۋىنىڭ شىعىنى ءدال بيىلعىداي كوپ بولعان ەمەس. مۇنىڭ سەبەبىن انىقتاۋ ءۇشىن كيىك جايىلعان جەردەن توپىراقتىڭ, سۋدىڭ, ولەكسەدەن اتىنعان بيولوگيالىق ماتەريالداردىڭ سىناماسى رەسپۋبليكالىق رەفەرەنس-لابوراتورياعا جىبەرىلگەن بولاتىن. ونىڭ قورىتىندىسى ءالى شىققان جوق. ازىرگە كيىكتىڭ جاپپاي قىرىلۋىنىڭ سەبەبى جۇمباق كۇيىندە قالىپ تۇر. سونىمەن قاتار, اقبوكەنگە كەلگەن بۇل ناۋبەت قاشانعا دەيىن سوزىلارىن دا ناق ەشكىم بىلمەيدى.
ءنازيرا جارىمبەتوۆا, «ەگەمەن قازاقستان».
قوستاناي وبلىسى, امانگەلدى اۋدانى.