استانا. 18 مامىر. وتكەن سەنبى, جەكسەنبى كۇندەرى استانادا 1 ايلىق جاۋىن-شاشىن مولشەرى جاۋدى. سونىڭ سالدارىنان بىرقاتار كوشەلەر جابىلىپ, كوممۋنالدىق قىزمەت كۇشەيتىلگەن رەجيمدە جۇمىس ىستەدى. نوسەر جاۋىننىڭ سالدارىن جويۋ كەزىندە قالادان 2 كۇندە 10 مىڭ تەكشە مەتر سۋ سورىلعان. بۇل تۋرالى استانا قالاسى اكىمدىگىنىڭ رەسمي سايتى astana.gov.kz حابارلادى.
قالالىق كوممۋنالدىق شارۋاشىلىق باسقارماسىنىڭ حابارلاۋىنشا, 17 مامىر كۇنى «الماتى» اۋدانىنان – 4 242, «سارىارقا» اۋدانىنان – 2 989, ال «ەسىل» اۋدانىنان 1 177 تەكشە مەتر جاڭبىر سۋى سورىلعان. بۇل جۇمىستار بۇگىن دە ءوز جالعاسىن تاپتى. قازىرگى كەزدە 80-گە جۋىق مامانداندىرىلعان تەحنيكا ءتيىستى جۇمىستاردى جۇرگىزۋدە.
«قازگيدرومەتتىڭ» بولجاۋىنشا, استانادا جاۋىن-شاشىندى اۋا رايى ءالى 3 كۇن, ياعني, 20 مامىرعا دەيىن ساقتالماق.
ەلامان قوڭىر.
دەرەك, سۋرەت: astana.gov.kz.