تاراز. 19 تامىز. قازاق حاندىعىنىڭ 550 جىلدىق مەرەيتويىنا وراي الماتى مارافونشىلار كلۋبىنىڭ ۇيىمداستىرۋىمەن جۇزەگە اسقان «شۋ- ۇلىتاۋ» مارافونى جامبىل جەرىندە شۋ قالاسىنان باستاۋ الدى. بۇل تۋرالى egemen.kz ءتىلشىسى حابارلادى.
مارافونشىلاردىڭ ماقساتى – كەرەي مەن جانىبەك حان كوتەرگەن كوك تۋدىڭ كوشىرمەسىن وزدەرى مەجەلەگەن شاقىرىمداردى جۇگىرىپ وتكەن سوڭ, قازاقستان تۇڭعىش پرەزيدەنتىنىڭ مۇراجايىنا تابىس ەتۋ.
بۇدان كەيىن مارافونشىلار تاراز قالاسىنا اياق باسىپ, قالا تۇرعىندارى ولارعا ءسات-ساپار تىلەدى. مارافونشىلار اراسىندا مەككەگە دەيىن جۇگىرىپ بارىپ, قاجىلىق ساپارىن وتەپ كەلگەن دۋلات يمانعازى دا بار. ال, تاعى ءبىر قاتىسۋشى جامبىلدىق جانار سەمبەك ۇلى 65 جاستا ەكەن.
«مارافوننىڭ ماڭىزى ۇلكەن. ورتامىزدا جاس جىگىتتەر دە بار.دينا مەرگەنباەۆا دەگەن جەلاياق قىز دا وسى ءىس-شاراعا قاتىسۋعا ىنتا ءبىلدىرىپ, حاندىقتىڭ 550 جىلدىق تويىنا وز ۇلەسىن قوسۋدا. مارافونشىلاردىڭ 11-ءى الماتى قالاسىنان. جاسى ەڭ ۇلكەنى مەنمىن. جاسىم 68-دە. بىراق جۇگىرگەندە جاستاردان قالىسا قويمايمىن. ول سپورتتى جاستايىمنان سەرىك ەتكەنىمنىڭ جەمىسى», – دەيدى الماتىلىق مارافونشى مارات بالتاباەۆ.
مارافونشىلار جامبىل, وڭتۇستىك قازاقستان, قىزىلوردا, قاراعاندى وبلىسى ايماقتارىن باسىپ وتپەك. جالپى, 1500 شاقىرىم جەردى جۇگىرىپ وتەتىن جەلاياقتار 22 تامىز كۇنى ۇلىتاۋعا جەتۋدى جوسپارلاپ وتىر.
ورالحان ءداۋىت.
دەرەك, سۋرەت: egemen.kz.