قوستانايدا باتىس قازاقستان وبلىسىنىڭ مادەنيەت جانە ونەر كۇندەرى ءوتتى. بۇل ەلباسى نۇرسۇلتان نازارباەۆتىڭ تاپسىرماسىنا سايكەس, مادەنيەت جانە سپورت مينيسترلىگى جاساعان «وبلىستار اپتالىعى» كەستەسى اياسىندا جۇزەگە استى. قازاقتىڭ بايتاق دالاسىنىڭ باتىسى مەن ارقا تورىندە تولقىپ اققان اق جايىق پەن توبىلدىڭ تولقىنى ۇقساس. توپىراعى قۇنارلى ەكى ءوڭىر دە حالقىمىزدىڭ ماحامبەت پەن سىرىمداي, جۇبان مەن قادىرداي, شوقان مەن ىبىرايداي, شاقشاق جانىبەك پەن تاتىقاراداي, احمەت پەن مىرجاقىپتاي باتىرلارى مەن دانالارىن, عالىمدارى مەن اقىندارىن, ءانشى-كۇيشىلەرىن, قايراتكەرلەرىن بەرۋىمەن قاسيەتتى. اق جايىقتىڭ سالەمىن الىپ كەلگەن وبلىستىق مادەنيەت, ارحيۆتەر مەن قۇجاتتاما باسقارماسىنىڭ باسشىسى داۋلەتكەرەي قۇسايىنوۆ باستاعان باستىسقازاقستاندىق دەلەگاتسيانى قوستاناي جۇرتى اقجارما كوڭىلمەن قارسى الدى. بۇل كەزدەسۋ ىبىراي التىنسارين بابامىزدىڭ «ايشىلىق الىس جەرلەردەن, جىلدام حابار العىزدى» دەگەن بىلىممەن, عىلىممەن كەلەتىن وركەنيەت جەتىستىكتەرى تۋرالى دانالىق بولجامىن ون وراپ كەتكەن, اقپاراتتى كوزدى اشىپ-جۇمعانشا جەتكىزەتىن بۇگىنگى ينتەرنەت زامانىندا ءومىر ءسۇرىپ وتىرعانمەن, اعايىنمەن دوس-قۇشاقتار ايقاسىپ, كوزبە-كوز جۇزدەسۋدىڭ ورنى بولەكتىگىن كورسەتتى.
– اقىنىمىز, ءانشى-كۇيشىمىز, كىتاپ, مۋزەي كورمەمىز بار, بارلىعى ەكى جۇزدەن اسا ادام كەلدىك. قوستانايلىقتار وتە جاقسى قارسى الدى. باتىس قازاقستاننىڭ رۋحاني بايلىعىن پاش ەتتىك. ارالاسىپ-قۇرالاسقانعا نە جەتسىن, – دەيدى داۋلەتكەرەي اتاۋ ۇلى.
قوستانايلىقتار قازاقتىڭ بەلگىلى اقىن قىزى, حالىقارالىق «الاش» ادەبي سىيلىعىنىڭ, «قۇرمەت» وردەنىنىڭ يەگەرى, قازاقستاننىڭ ەڭبەك سىڭىرگەن قايراتكەرى اقۇشتاپ باقتىگەرەەۆامەن «اق جايىق. اق شاعالا. اقۇشتاپ» اتتى جىر كەشىندە جولىقتى. اقۇشتاپ ورالدا تۇرسا دا, ول قوستانايعا دا, بارشا قازاققا دا ورتاق. سوندىقتان اقىن دا ءسوزىن: «ورتاق دەپ بارشامىزعا اسپان, اي, كۇن, قاشان دا قۇشاعىمدى دوسقا جايدىم. ەلىنەن قىز جىبەكتىڭ جىر اكەلدىم, تورىنە شاشايىن دەپ قوستانايدىڭ» دەپ باستادى. جىرسۇيەر قاۋىمعا اقۇشتاپ ولەڭدەرىن ورالدىق جاستارمەن قاتار, اقىننىڭ ءوزى دە وقىدى. قاشان دا دوستىق, شىندىق, ادىلەت, ەلدىك تۋىن جوعارى كوتەرىپ جۇرگەن اقىن بۇل جولى دا ءوز وي-پىكىرلەرىمەن ءبولىستى. ساحنادان اقۇشتاپ ولەڭدەرىنە جازىلعان اندەر شىرقالدى.
ءوزى «قازاقتىڭ قىزدارىنىڭ جالاۋىسىڭ» دەپ ۇلگى تۇتقان ءماريام حاكىمجانوۆا اپاسىنىڭ اۋىلىنا كەلگەن اقۇشتاپ تۋرالى قوستانايلىق اقىن-جازۋشى اعالارى مەن ىنىلەرى ج.بايازيد, ع.احمەتچين, ا.شاياحمەت اقجارما لەبىزدەرىن اياعان جوق. «تالانتتىڭ اساۋ تىزگىنىن, جۇرگەندەر بار عوي شاققا ۇستاپ. ساعىنتىپ جۇرگەن قىز كۇنىن, وشاقتا قالعان شوققا ۇقساپ. الديلەپ ءجۇرىپ بوبەگىن, تامىزىق قىلىپ ولەڭىن, قايناتقان قازاق قازانىن, قىزدىرعان تىرلىك بازارىن. جاساي بەر, اقىن اقۇشتاپ!» دەپ قايىردى اقىلبەك شاياحمەت.
قوستانايلىقتار جايىق بويىنىڭ تاريحىن, ونەرى مەن ءداستۇر بايلىعىن كوز الدىڭا اكەلەتىن «باتىس قازاقستان – ەۋرازيا جۇرەگىندە» اتتى تاريحي- ەتنوگرافيالىق كورمەنى تاماشالادى. ارينە, قازاق دالاسىنىڭ قاي پۇشپاعى دا حالقىمىزدىڭ تاريحي تامىرىنىڭ تەرەڭدە ەكەنىن پاش ەتەدى. كورمەنىڭ بايلىعى تاڭداي قاققىزعانداي ەدى. مۇنان كەيىن ع.قۇرمانعاليەۆ اتىنداعى باتىس قازاقستان وبلىستىق فيلارمونياسى ۇجىمىنىڭ «اق جايىقتان تولقىندى توبىلعا» اتتى كونتسەرتى ۇسىنىلدى. كونتسەرت باستالاردا ءسوز العان قوستاناي وبلىسى اكىمىنىڭ ورىنباسارى مۇرات دارىباەۆ پەن باتىس قازاقستان وبلىسى اكىمىنىڭ ورىنباسارى باقتيار ماكەن ەكى وبلىستىڭ ەكونوميكالىق جانە رۋحاني, مادەني بايلىققا كەندە ەمەس ەكەنىن ايتا كەلىپ, وبلىستاردىڭ قاي سالادا دا ارالاسۋى جاقسى ءداستۇر ەكەنىن تىلگە تيەك ەتتى. ەلباسى تاپسىرماسىنىڭ ءورىس الاتىنىنا سەندىردى.
قازاقستان رەسپۋبليكاسىنىڭ ەڭبەك سىڭىرگەن ءارتىسى, جەزتاڭداي ءانشى جۇماعانىم راحىموۆا باستاعان تالانتتار اننەن شاشۋ شاشتى. سونىمەن قاتار, قوستانايلىقتار ش.ايتماتوۆتىڭ شىعارماسى بويىنشا باتىس قازاقستان وبلىستىق دراما تەاترى ۇجىمى قويعان «ءجاميلا» سپەكتاكلىن تاماشالادى. قوس وزەن اق جايىق پەن توبىلدىڭ تولقىنى ءدۇر, ەلىنىڭ ارمانى ءبىر قوس ءوڭىر – قوس وبلىس حالقىمىزدىڭ ورتاق ونەرى, مادەنيەتى مەن سالتى ارقىلى كورىسىپ, ارقا-جارقا بولىپ قالدى. ءوڭىر مەن ءوڭىردىڭ ارالاسۋى مەن كەزدەسۋلەر بولاشاق يگى باستامالاردىڭ, جاقسى ىستەردىڭ دە باستاۋىنا اينالارى حاق.
ءنازيرا جارىمبەتوۆا,
«ەگەمەن قازاقستان».
قوستاناي.