استانا. 15 مامىر. تۇندە ۋەفا ەۋروپا ليگاسىنىڭ جارتىلاي فينالى اياسىندا قارىمتا ويىندار ءوتتى. «دنەپر» ءوز الاڭىندا «ءناپوليدى» جەڭىپ, تاريحىندا العاش رەت ەۋروكۋبوك باسەكەلەرىنىڭ فينالىنا شىقتى. ال سىرت الاڭدا «فيورەنتينادان» باسىم تۇسكەن «سەۆيليا» قاتارىنان ەكىنشى رەت ءتۋرنيردىڭ شەشۋشى سىنىنا جولداما الىپ وتىر. بۇل تۋرالى egemen.kz حابارلادى.
«دنەپر» (دنەپروپەتروۆسك, ۋكراينا) – «ناپولي» (نەاپول, يتاليا) 1:0 (0:0)
گول: ەۆگەني سەلەزنەۆ 58 (سۋرەتتە).
ءبىرىنشى ويىننىڭ ەسەبى: 1:1.
ويىن ۋكراينا استاناسى – كيەۆتەگى ۇلتتىق وليمپيالىق ستاديوندا ءوتتى. «ءناپوليدىڭ» ەۋروپاداعى بەدەلى بارشاعا ايان. سوندىقتان بۇل ماتچتا باسىمدىق ءسوزسىز يتاليانىڭ كومانداسىنا بەرىلدى. الايدا, ۇجىمدىق ويىننىڭ ۇلگىسىن كورسەتكەن «دنەپر» تەك وزدەرىنىڭ ەمەس, تۇتاس ۋكراينا فۋتبولىنىڭ تاريحىنداعى جارقىن ناتيجەگە قول جەتكىزدى.
«فيورەنتينا» (فلورەنتسيا, يتاليا) – «سەۆيليا» (سەۆيليا, يسپانيا) 0:2 (0:2)
گولدار: كارلوس باككا 22, دانيەل كارريسۋ 27.
ءبىرىنشى ويىننىڭ ەسەبى: 0:3.
بۇل ويىننىڭ تاعدىرى العاشقى ماتچتا-اق شەشىلىپ قويعان ەدى. ءوز الاڭىندا جاۋاپسىز 3 گول سوققان يسپاندار يتالياعا كوتەرىڭكى كوڭىل-كۇيمەن كەلدى. كوپشىلىك بولجاعانداي, «فيورەنتينا» قارىمتا ويىندا دا ايتارلىقتاي قارسىلىق كورسەتە المادى. ناتيجەسىندە قاقپالارىنا تاعى دا جاۋاپسىز 2 گول جىبەردى. «سەۆيليا» ەۋروپا ليگاسىنىڭ قازىرگى جەڭىمپازى ەكەنىن ايتا كەتەيىك.
فينالدىق ويىن 27 مامىردا پولشا استاناسى – ۆارشاۆادا وتەدى.
ەلامان قوڭىر.
دەرەك: egemen.kz.
سۋرەت: championat.com.