استانانىڭ سارىارقا اۋدانىندا ورنالاسقان «پالاۋ ورتالىعىندا» ءورت بولدى. توتەنشە جاعدايلار مينيسترلىگىنىڭ مالىمەتىنشە, ءورت بەيسەكوۆا كوشەسىندەگى ساۋدا ءۇيى اۋماعىنداعى جەكە تۇرعان عيماراتتان شىققان, دەپ حابارلايدى Egemen.kz.
وقيعا كەزىندە اسحانا بولمەلەرى مەن شاتىر ورتەنگەن. وقيعا ورنىنا كەلگەن قۇتقارۋشىلار ءورتتى 12 مينۋت ىشىندە وقشاۋلاپ, 40 شارشى مەتر اۋماقتا تولىق ءسوندىردى.
زارداپ شەككەندەر جوق. قازىر ءورتتىڭ شىعۋ سەبەبى انىقتالىپ جاتىر.
ەسكە سالايىق, بيىل اقپاندا ششۋچينسكىدە تۇرعىن ۇيگە جاپسارلاس ورنالاسقان «پالاۋ ورتالىعىندا» گاز جارىلىپ, ارتىنشا ءىرى ءورت بولعان ەدى. قايعىلى وقيعادان 12 ادام قازا تاپتى.
وسى وقيعادان كەيىن كافە يەسى ەكى ايعا تەرگەۋ يزولياتورىنا قامالدى. كەيىن ءىس بويىنشا گاز قۇيۋ بەكەتىنىڭ ديرەكتورى مەن گاز باللوندارىن جەتكىزۋشى دە ۇستالعان.