بۇگىن ناۋرىز ايىنداعى ۇلتتىق بىرىڭعاي تەستىلەۋ باستالدى. ول 6 ساۋىرگە دەيىن جالعاسادى. بيىل ۇبت-عا قاتىسۋعا شامامەن 184 مىڭ تالاپكەر ءوتىنىش بەرگەن, بۇل وتكەن جىلمەن سالىستىرعاندا 20 مىڭعا ارتىق. ءوتىنىش بىلدىرگەندەردىڭ 74,4%-ى تەستتى قازاق تىلىندە, 25,5%-ى ورىس تىلىندە, ال 216 ادام اعىلشىن تىلىندە تاپسىرۋدى تاڭداعان, دەپ حابارلايدى Egemen.kz.
تالاپكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن جانە وتكىزۋ پۋنكتىن وزدەرى انىقتادى.
ەڭ كوپ تاڭدالعان بەيىندىك پاندەر كومبيناتسياسى – «ماتەماتيكا – فيزيكا» (18,7%). بۇل باعىتتى نەگىزىنەن بولاشاق ينجەنەرلەر, مۇعالىمدەر, قۇرىلىسشىلار, ەنەرگەتيكتەر جانە تەحنيكالىق ماماندىق يەلەرى تاڭداعان. ال 16,6% تالاپكەر «بيولوگيا – حيميا» پاندەرىن بەلگىلەسە, 10,3%-ى شىعارماشىلىق ەمتيحاندى تاڭداعان. ياعني, مەديتسينا جانە شىعارماشىلىق سالاسىنا قىزىعۋشىلار دا از ەمەس.
ۇبت كەزىندە تەستىلەۋ باعدارلاماسىندا كالكۋلياتور, مەندەلەەۆتىڭ حيميالىق ەلەمەنتتەر كەستەسى جانە تۇزداردىڭ ەرىگىشتىك كەستەسى قولجەتىمدى بولادى. تەست اياقتالعاننان كەيىن تالاپكەرلەر 30 مينۋت ىشىندە اپەللياتسياعا ءوتىنىش بەرە الادى. اپەللياتسيا ناتيجەسى شىققاننان كەيىن سەرتيفيكات تالاپكەردىڭ جەكە كابينەتىندە جاريالانادى.
ۇبت: قوستاناي وبلىسىندا تالاپكەرلەردىڭ 74%-ى شەكتى بالل جينادى
2026 جىلى ۇبت فورماتى وزگەرىسسىز قالدى. تالاپكەرلەر ءۇش مىندەتتى ءپان جانە ەكى بەيىندىك ءپان تاپسىرادى. جالپى تاپسىرما سانى – 120. ونىڭ ىشىندە «قازاقستان تاريحىنان» 20 سۇراق, «وقۋ ساۋاتتىلىعى» مەن «ماتەماتيكالىق ساۋاتتىلىقتان» 10 سۇراقتان, ال ءار بەيىندىك پاننەن 40 سۇراق بەرىلەدى. ەڭ جوعارى بالل – 140.
تەستىلەۋ ۇزاقتىعى 4 ساعاتتى (240 مينۋت) قۇرايدى. ەرەكشە ءبىلىم بەرۋ قاجەتتىلىكتەرى بار تالاپكەرلەرگە قوسىمشا 40 مينۋت ۋاقىت قاراستىرىلعان.
ناۋرىز ايىنداعى ۇبت-عا شارتتى تۇردە اقىلى نەگىزدە جوو-عا تۇسكەندەر, وتكەن جىلعى مەكتەپ تۇلەكتەرى, كوللەدج بىتىرۋشىلەر, قازاقستان ازاماتى ەمەس, بىراق ۇلتى قازاق تۇلعالار, شەتەلدە ءبىلىم العان قازاقستان ازاماتتارى جانە بيىلعى مەكتەپ بىتىرۋشىلەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسا الادى.
قاڭتارداعى ۇبت: تەستىلەۋ ەرەجەسىن بۇزعان 120 ادامنىڭ ناتيجەسى جويىلدى