قاسيەتتى رامازان ايى كىردى. بۇل اي بەرەكەگە تولى دەيدى يسلام عالىمدارى. بەرەكە دارىماعان ءومىردىڭ ءمانى بولمايدى. بەرەكە – ءومىرىمىزدىڭ بارلىق سالاسىنا قاجەت. «بەرەكەلى بولسا ەل, جاعاسى جايلاۋ ول ءبىر كول...» دەيدى اباي اتامىز.
مىسىرلىق ۇلكەن عالىم شاباق ءال-الۋكا ءوزىنىڭ «بەرەكەنىڭ ماڭىزى» اتتى كىتابىندا «بەرەكە – يگىلىكتىڭ ورنىعۋى. ەگەر بەرەكە از نارسەگە دارىسا, ول كوبەيەدى, كوپ نارسەگە دارىسا, پايدالى بولادى. بەرەكەسى جوق نارسەنىڭ ەش ءمانى بولمايدى», دەي وتىرىپ, بەرەكەنىڭ ماڭىزىن بەس توپقا جىكتەپ تۇسىندىرگەن ەكەن.
ومىردەگى بەرەكە. ءبىز تۇرمىستىڭ بارلىق تۇرىندە, ۇيىمىزدەن باستاپ, وتباسى, تاماق, سۋسىن, جۇمىس, قارجى, ءبىلىم, ۋاقىت پەن ءومىرىمىزدىڭ ءاربىر بولىگىنە دەيىن بەرەكەگە مۇقتاجبىز. بەرەكە اقشا, ۋاقىت, ريزىق نەمەسە دەنساۋلىق بولۋى مۇمكىن. ادام ومىرىندەگى بەرەكەنىڭ ماڭىزى – يگىلىك پەن جاقسىلىقتىڭ ارتۋى ءھام پايدا اكەلۋى, وتباسىنداعى تاتۋلىق ءھام سىيلاستىق. ۋاقىت بەرەكەسى. بۇل – اسا ماڭىزدى دۇنيە. ۋاقىتتىڭ بەرەكەسىن يگەرگەن ادام ءومىر ءسۇرۋدىڭ جاقسى داعدىسىن قالىپتاستىرا الادى. مىسالى, كەيبىر ادامدار 10 ساعات ۇيىقتاسا دا دەمالمايدى, ال كەيبىرەۋلەر 5 ساعات ۇيىقتاپ ويانعاندا ءوزىن سەرگەك سەزىنەدى. پايعامبارىمىز (س.ع.س) تاڭعى ۋاقىتتا بەرەكە بار دەگەن. بۇنىڭ ماعىناسى – وسى ۋاقىتتا ادام كوپ جاقسى نارسە جاساي الادى دەگەن ءسوز. ريزىقتاعى بەرەكە. بۇل ريزىقتىڭ جەتكىلىكتى بولۋى. مىسالى, كەيبىر ادامدار مول تابىس تابادى, بىراق ايدىڭ سوڭىندا قارىزدار بولىپ قالادى, ال بىرەۋلەر از تابىس تاپسا دا, سول تابىسى ءومىر سۇرۋگە جەتەدى. بەرەكەلى اقشا دەگەنىمىز – از قاراجاتپەن كوپ نارسە جاساۋ. بىلىمدەگى بەرەكە. ءسىز وقىعان ءھام يگەرگەن ءبىلىمىڭىزدى پايدالانىپ, سول ارقىلى تىنىش ءھام قادىرلى ءومىر سۇرسەڭىز, بۇل – بەرەكەلى ءبىلىم. شىن مانىندە, بەرەكەلى ءبىلىم – پايدا اكەلەتىن ءبىلىم, ال پايداسىز ءبىلىم بەرەكەسىز بولادى. ۇيدەگى بەرەكە. بۇل ءۇيدىڭ كەڭ نەمەسە جايلى بولۋى ەمەس. كەيبىر ۇلكەن ۇيلەردە بەرەكە جوق, ال شاعىن ۇيلەردە بەرەكە كوپ بولادى. ۇيدە بەرەكە بولعاندا, ول جەرگە پەرىشتەلەر كىرەدى, شايتان ولاردان قاشادى. سول ۇيدە قايىر مەن جاقسىلىق كوپ بولادى.