استانا. 25 ناۋرىز. تۇرىكمەنستاننىڭ جاس ءجۋرناليسى, «ازاتتىق» راديوستانساسى تۇرىكمەن قىزمەتىنىڭ بۇرىنعى ءتىلشىسى ۋميد حاللىەۆ شەت ەلدەردەن ساياسي باسپانا سۇراپ وتىر. بۇل تۋرالى «گۋندوگار» پورتالى حابارلادى.
«ازاتتىق» راديوسى تۇرىكمەن قىزمەتىنىڭ بۇرىنعى ءتىلشىسى جانە راديونىڭ قازىرگى قىزمەتكەرى وسمان حاللىەۆتىڭ ۇلى, جاس جۋرناليست ۋميد حاللىەۆ ءوز وتباسىمەن بىرگە ەلدەن كەتىپ قالعان, قازىر ساياسي باسپانا ىزدەپ ءجۇر», - دەلىنگەن حابارلامادا.
ۋميد اكەسىنەن كەك قايتارۋ ماقساتىندا جەرگىلىكتى بيلىكتىڭ ىقپالىمەن 2008 جىلى اشحابادتاعى جوعارى وقۋ ورنىنان شىعىپ قالعاننان كەيىن, تۇرىكمەن ارنايى قىزمەتى تاراپىنان قۋدالاۋعا ۇشىرايدى. 2009 جىلى ول كاناداعا وقۋ بارا جاتقان جەرىنەن الىنىپ قالادى. سودان سوڭ دا شەت ەلدەرگە شىعا المايتىنداردىڭ «قارا تىزىمىندە» تۇرادى.
تۇرىكمەنستاندا تاۋەلسىز ءجۋرناليستىڭ جۇمىس جاساۋى قانشالىقتى قيىن ەكەنىن جانە نەگە قورىتىندىدا ەلدەن ماڭگىلىككە كەتۋگە شەشىم قابىلداعانىن ۋميد جاقىندا انت (اگەنتستۆو نوۆوستەي تۋركمەنيستانا) تىلشىسىنە بەرگەن سۇحباتىندا ايتىپ شىعادى.
«مەن اسكەردەن كەلگەننەن كەيىن تۇرىكمەن ۇلتتىق الەم تىلدەرى تنستيتۋتىنا قاتارىنان بىرنەشە جىل قۇجات تاپسىردىم. بىراق مەنى اقشاسىز ەشكىم وقۋعا قابىلداعان جوق. ول جىلدارى تۇرىكمەنستاندا جالپى پاراسىز بىردە-ءبىر جوعارى وقۋ ورنىنا ءتۇسۋ شىن مانىندە مۇلدە مۇمكىن ەمەس ەدى. اقىرىندا ساتتىلىك الدىنان شىققان ساناۋلى ابيتۋريەنتتەردىڭ ءبىرى بولدىم. 2007 جىلى مەنىڭ دە جولىم بولىپ كەتتى. «رۋحنامانى» باسىنان اياعىنا دەيىن جاتقا بىلەتىن بولىپ, اعىلشىن جانە تۇرىكمەن تىلدەرى بويىنشا مەكتەپتىڭ باعدارلاماسىن تۇگەل مەڭگەرگەسىن, اقىرىندا مەن اراب فيلولوگياسى كافەدراسىنىڭ ستۋدەنتى اتاندىم.
ساباقتى جاقسى وقىدىم. وقىتۋشىلار مۇنى ءجيى باعالاپ تۇردى, كەرەك كەزىندە اشحابادتا ءارتۇرلى حالىقارالىق كونفەرەنتسيالار وتكەن كەزدەرى ساباقتان بوساتىلىپ, شەت ەلدىك مەيماندارعا اۋدارماشىلىق قىزمەت جاسادىم. بىراق 2008 جىلى مەنىڭ ەكىنشى كۋرسقا وتۋىمە جول بەرىلمەي, وقۋدان شىعارىلدىم. فورمالدى تۇردە ساباققا ۇلگەرە الماۋى سەبەپتى دەپ كورسەتىلگەنىمەن, اكەم وسمان حاللىەۆتىڭ «ازاتتىق» راديوسىندا جۇمىس ىستەۋى ءبارىن وسىلاي شەشىپ كەتتى. مەن وقىپ جۇرگەن كەزدەرى ۇلتتىق قاۋىپسىزدىك قىزمەتىنىڭ قىزمەتكەرلەرى كەلىپ جولىعىپ, نە مەنىڭ اكەمدى راديودا جۇمىس ىستەۋدى قويعىزۋىم كەرەك ەكەنىن, نە مەنىڭ ءوزىمنىڭ وقۋدان شىعىپ كەتۋىمنىڭ ارەكەتتەرى جاسالاتىنىن ايتىپ كەتەتىن», - دەدى ۋميد حاللىەۆ.
مۇرات ايتقوجا.
مانبە: گۋندوگار.
سۋرەت: نوۆوستي تۋركمەنيستانا.