اۆاكوۆ: «ۋكرانفتا» عيماراتىن ميليتسيا كۇزەتكە الدى

استانا. 24 ناۋرىز. سوڭعى بىرەر كۇننىڭ اينالاسىندا ۋكرايناداعى جاعداي كۇرت وزگەرىپ كەتتى. جوعارى رادانىڭ دەپۋتاتى, دنەپروپەتروۆسك وبلىسىنىڭ گۋبەرناتورى , وليگارح يگور كولومويسكي «ۋكرنافتاداعى» جاعدايى تەڭسەلە باستاۋىنا بايلانىستى بيلىككە قارسىلىق كورسەتۋگە كىرىستى. مۇنىڭ ءوزى ەلدىڭ وڭتۇستىك-شىعىسىنداعى شيەلەنىستىڭ بەتى دنەپر وزەنىنىڭ بويىنا قاراي اۋىسقانىن كورسەتەدى. بۇل تۋرالى ۆۆس حابارلادى. «دۇيسەنبىگە قاراعان ءتۇنى اۆتوماتپەن قارۋلانعان بەلگىسىز بىرەۋلەر «ۋكرنافتا» عيماراتىنا باسىپ كىرىپ, ونىڭ كىرەبەرىسىندەگى باقىلاۋدى كۇشەيتىپ, جولدى جاۋىپ تاستادى. ۋكراينانىڭ بۇقارالىق اقپارات قۇرالدارى ولاردىڭ «دنەپر-1» باتالونىنىڭ جاۋىنگەرلەرى ەكەندەرىن جازىپ جاتىر», - دەلىنگەن حابارلامادا. ال «دنەپر-1» قاۋىپسىزدىك قىزمەتىنىڭ ءبىر قۇرىلىمى بولۋىمەن بىرگە, گۋبەرناتور كولومويسكيدىڭ باعىنىستىلىعىنداعى باتالون بولىپ تابىلادى.

 

الايدا,ۋكراينا ىشكى ىستەر ءمينيسترىنىڭ كەڭەسشىسى زوريان شكيرياك بۇل مالىمدەمەنى جوققا شىعارىپ, عيماراتتى كۇزەتىپ تۇرعان جەكە فيرمانىڭ ساربازدارى ەكەنىن جەتكىزدى. شەنەۋنىك سونداي-اق «دەرەگى انىقتالماعان, جالعان اقپارلاردى تاراتۋدى توقتاتۋعا» شاقىردى. ول ميليتسيا «كۇش قۇرىلىمدارىنىڭ تەكەتىرەسە كەتپەۋىن» باقىلاپ تۇر دەگەندى ءبىلدىردى. وسى ارالىقتا ۋكراين باق-تارى قارۋلى كىسىلەردىڭ عيماراتتى يگور كولومويسكيدىڭ بۇيرىعى بويىنشا باسىپ العاندارىن جازىپ جاتىر. كولومويسيدىڭ ءوزى بولسا, عيماراتتىڭ الدىنا جەكسەنبى كۇنى كەشكە كەلدى. ول عيماراتتى جاۋىپ قويعان «كولومويسكيدىڭ باتالونى ەمەس», كومپانيانىڭ كۇزەتشىلەر ەكەنىن ايتتى. وليگارحتىڭ ايتۋىنشا, رەيدەرلىكتەن وسىلاي قورعانۋدى ءجون ساناعان. ۋكراينانىڭ ىشكى ىستەر مينيسترلىگىنىڭ وكىلدەرى دە «ۋكرنافتانىڭ» عيماراتىن «دنەپر-1» باتالونىنىڭ جاۋىنگەرلەرى قورعاپ تۇرعانىن جوققا شىعاردى. مۇنى مينيستر ارسەن اۆاكوۆتىڭ ءوزى جەتكىزدى. ناۋرىزدىڭ 19-ندا جوعارعى رادا اكتسيونەرلىك قوعام جونىندەگى زاڭعا شۇعىل وزگەرىستەر ەنگىزدى. بۇل «ۋكرنافتانىڭ» اكتسياسىنىڭ باسىم بولىگىنە يەلىك ەتۋشى يگور كولومويسكيدىڭ ەركىن قيمىلداۋىنا توسقاۋىل قويۋ ءۇشىن جاسالعانى بىردەن بەلگىلى بولدى.

سول كۇنى «ۋكرنافتا» كومپانياسىنىڭ باقىلاۋ كەڭەسى كولومويسكيدىڭ قويعان ادامى الەكساندر لازوركونى ورنىنان بوساتىپ, ونىڭ ورنىنا يۋري مەلنيكتى تاعايىندادى. كومپانيا الىپ قويىپ, ونىڭ باسشىسىن قۋىپ جىبەرۋدى يگور كولومويسكي رەيدەرلىك دەپ باعالادى. جۇما كۇنى پرەزيدەنت پەتر پوروشەنكو ءجۋرناليستى بەيادەپ سوزدەردى قولدانۋ ارقىلى قورلاعان كولومويسكيگە سوگىس بەردى. بۇدان كەيىن يگور كولومويسكي مەن ونىڭ كومانداسى 25 ناۋرىز, سارسەنبى كۇنى وزدەرىن قورعايتىن جۇرتتى جيناۋ ارقىلى دنەپروپەتروۆسكىدە «حالىق جيىنىن» («نارودنوە ۆەچە») وتكىزۋگە شەشىم قابىلدادى. سوڭعى ساتتە بۇقارالىق اقپارات قۇرالدارى گۋبەرناتوردىڭ دنەپروپەتروۆسكىگە تارتىپ كەتكەنىن باياندادى. مۇرات ايتقوجا.