تارازدا ءماجىلىس دەپۋتاتتارى گۇلدارا نۇرىم, مۇقاش ەسكەندىروۆ جانە ءابۋتالىپ مۇتالي مانشۇك مامەتوۆا اتىنداعى №27 ورتا مەكتەپتىڭ جاڭا كورپۋسىنىڭ قۇرىلىسىمەن تانىستى. جوبا «AMANAT» پارتياسىنىڭ سايلاۋالدى باعدارلاماسى اياسىندا جۇزەگە اسىرىلۋدا, دەپ حابارلايدى Egemen.kz.
بۇگىندە 600 وقۋشىعا ارنالعان جاڭا ءۇش قاباتتى عيماراتتىڭ قۇرىلىس جۇمىسىنىڭ 40% -ى ورىندالعان, شاتىرىن جابۋ, ىشكى ارلەۋ جانە اۋماقتى اباتتاندىرۋ سىندى جۇمىستار ءجۇرىپ جاتىر. كەستەگە سايكەس, نىسان 2026 جىلدىڭ قاراشا ايىندا سالىنىپ بىتەدى دەپ جوسپارلانعان, الايدا مەردىگەر ۇيىم قىركۇيەككە دەيىن تاپسىرۋعا دايىن ەكەنىن ايتىپ وتىر. بۇل مەكتەپ وقۋشىلارىنا جاڭا وقۋ جىلى پارتاعا وتىرۋعا مۇمكىندىك بەرەدى.
ءماجىلىس دەپۋتاتى گۇلدارا نۇرىم اتاپ وتكەندەي, ءبىلىم بەرۋ سالاسىنداعى مەملەكەتتىك ساياسات جاڭا مەكتەپتەر سالۋدى جانە قولايلى جاعدايلاردى قامتاماسىز ەتۋدى عانا ەمەس, ەڭ الدىمەن وقۋشىلار مەن ولاردىڭ پەداگوگتەرىنە قامقورلىق جاساۋدى دا قامتيدى.
– سوڭعى جىلدارى مۇعالىمدەردى قولداۋ بويىنشا تۇبەگەيلى شەشىمدەر قابىلداندى. «پەداگوگ مارتەبەسى تۋرالى» زاڭ قابىلدانعاننان بەرى التى جىل ءوتتى, ول ايتارلىقتاي ناتيجە بەردى. بەس جىل ىشىندە ورتاشا جالاقى 109 مىڭ تەڭگەدەن 390 مىڭ تەڭگەگە دەيىن ءوستى, مۇعالىمدەردىڭ جۇكتەمەسى 14 ساعاتقا قىسقاردى, ال پەداگوگتاردىڭ 82% - ى قازىر وزدەرىنىڭ ەڭبەگى قوعامدا باعالانادى دەپ سەنىمدى تۇردە ايتادى. سونىمەن قاتار, بىلىكتىلىگى مەن ءوتىلى ءۇشىن ۇستەمەاقىلار ەنگىزىلدى, مۇعالىمنىڭ ەرەكشە قۇقىقتىق مارتەبەسى بەكىتىلدى, وقىتۋشىلاردىڭ بىرنەشە ساناتى ءۇشىن دەمالىس كۇندەرى ۇلعايتىلدى, سىنىپ جەتەكشىلىگى ءۇشىن قوسىمشا اقىلار جانە تاعى باسقالارى ۇلعايدى. مۇنىڭ ءبارى – مەملەكەت باسشىسىنىڭ باستاماسىمەن جانە «AMANAT» پارتياسىنىڭ قولداۋىمەن جۇرگىزىلىپ جاتقان دايەكتى مەملەكەتتىك ساياساتتىڭ ناتيجەسى. جاڭا مەكتەپتەر تەك زاماناۋي كابينەتتەردەن عانا ەمەس, سونداي-اق ىنتالى, قورعالعان پەداگوگتاردەن دە قۇرالۋى ءتيىس, – دەپ اتاپ ءوتتى دەپۋتات.
نىساننىڭ جاي-كۇيىن كورگەن دەپۋتاتتار مەكتەپ ينفراقۇرىلىمىن دامىتۋ مەملەكەت ءۇشىن باسىم مىندەتتەردىڭ ءبىرى بولىپ قالا بەرەتىنىن اتاپ ءوتتى. مۇقاش ەسكەندىروۆتىڭ ايتۋىنشا, وڭىردەگى وقۋشىلار سانىنىڭ ءوسۋى ءبىلىم بەرۋ مەكەمەلەرىن دە تەزدەتىپ سالۋدى قاجەت ەتەدى.
– جاڭا وقۋ جىلىندا وڭىردە 247 مىڭعا جۋىق وقۋشى بولادى, ونىڭ 20 مىڭعا جۋىعى 1-سىنىپقا بارادى. مەكتەپتەردىڭ قۇرىلىسى وتباسىلاردىڭ ءومىر ءسۇرۋ ساپاسىنا تىكەلەي بايلانىستى. ءبىلىم بەرۋدىڭ قولجەتىمدىلىگى تۋرالى ايتاتىن بولساق, بۇل بالالار مەن اتا-انالارعا ارنالعان ناقتى جاعدايلارعا تىكەلەي قاتىستى. جاڭا عيماراتتار شامادان تىس جۇكتەمەنى ازايتادى, ەكىنشى اۋىسىمدار كەميدى جانە قالىپتى ءبىلىم بەرۋ ورتاسى قالىپتاسادى. سوندىقتان مۇنداي نىساندار ءبىزدىڭ پارتيامىزدىڭ تۇراقتى باقىلاۋىندا, – دەپ اتاپ ءوتتى ول.
ءماجىلىس دەپۋتاتتارىنىڭ وڭىرلەردەگى كەزدەسۋلەرى 5-13 قاڭتار ارالىعىندا جالعاسادى. جۇمىس ساپارلارى بارىسىندا AMANAT, اۋىل, اق جول, جسدپ, قپك جانە Respublica ساياسي پارتيالارىنىڭ پارلامەنتتىك فراكتسيالارىنىڭ دەپۋتاتتارى سايلاۋشىلاردى قابىلدانعان زاڭدار تۋرالى حاباردار ەتەدى, ولاردىڭ جەرگىلىكتى جەرلەردە قولدانىلۋ بارىسىن زەردەلەيدى جانە ازاماتتاردى تولعاندىراتىن وزەكتى ماسەلەلەر مەن پروبلەمالاردى تىڭدايدى.