قىزىلورداداعى كوپبەيىندى وبلىستىق بالالار اۋرۋحاناسى جانىنان «قامقورلىق» ورتالىعى اشىلدى. ورتالىقتان شالا تۋىلعان, نەۆرولوگيالىق, ورتوپەديالىق بەلگىلەرمەن دۇنيەگە كەلگەن ءۇش جاسقا دەيىنگى سابيلەر كومەك الا الادى.
ورتالىقتىڭ اشىلۋ سالتاناتىندا وبلىس اكىمىنىڭ ورىنباسارى مەيرامبەك شەرماعانبەت وڭىردە مەملەكەت بيۋدجەتىنەن بولەك, ءتۇرلى قورلار تاراپىنان ءتۇرلى الەۋمەتتىك نىساندار بوي كوتەرىپ كەلە جاتقانىن اتاپ ءوتتى. «سامۇرىق-قازىنا» اق باسقارۋشى ديرەكتورى عيبرات اۋعانوۆ وسى نىسان ەلىمىزدە «سامۇرىق-قازىنا» قورىنىڭ قولداۋىمەن ىسكە قوسىلعان 47-وڭالتۋ ورتالىعى ەكەنىن ايتتى.
«قور سەرىكتەستەرىمەن بىرلەسە وتىرىپ, بەس جىل ىشىندە ەلىمىزدە وسىنداي ورتالىقتارعا دەگەن قاجەتتىلىكتى تولىق قامتاماسىز ەتتى. بۇل ورتالىقتاردا جىل سايىن 12 مىڭعا جۋىق مۇگەدەكتىگى بار بالا كەشەندى مەديتسينالىق كومەك الادى. ناتيجەسىندە, 6,3 مىڭنان استام ەرەكشە بالا العاشقى قادامىن جاساپ, 8,6 مىڭ ءسابيدىڭ ءتىلى شىقتى. وڭالتۋمەن بىرگە, ينكليۋزيۆتى ءبىلىم مەن الەۋمەتتەندىرۋ باعىتىندا قور ەلىمىز كولەمىندە 26 ينكليۋزيا كابينەتىن اشتى», دەدى ع.اۋعانوۆ.
«قازاقستان حالقىنا» قوعامدىق قورىنىڭ وكىلى شىڭعىس شاراپيەۆتىڭ ايتۋىنشا, ءۇش جىل ىشىندە قور وبلىستا قۇنى 10 ملرد تەڭگەدەن اساتىن الەۋمەتتىك جوبالاردى جۇزەگە اسىردى. اشىلۋ سالتاناتىندا «قامقورلىق» كورپوراتيۆتىك قورىنىڭ ديرەكتورى ارايلىم ەركىنوۆا دا باستاماعا ساتتىلىك تىلەدى.
جاڭا ورتالىققا «سامۇرىق-قازىنا», «قازاقستان حالقىنا» قورلارىنىڭ قولداۋىمەن الەمدىك وندىرۋشىلەردىڭ زاماناۋي وڭالتۋ جابدىقتارى جەتكىزىلىپ, ماماندار «قامقورلىق» قورىنىڭ دەمەۋىمەن استانا قالاسىنداعى ۇلتتىق بالالاردى وڭالتۋ ورتالىعىندا دايىندىقتان وتكەن. سەنسورلىق, شۋنگيتتىك بولمەلەر, تۇزدى شاحتا, يممەرسيوندى ۆاننالار مەن ءتۇرلى زاماناۋي جابدىقتار ءسابيدى سىرقاتىنان ەرتە ايىقتىرىپ, وڭالتۋ باعدارلاماسىن ساپالى جۇرگىزۋگە سەپ بولادى.
جىل سايىن 3 جاسقا دەيىنگى 600 بالانى قابىلدايتىن ورتالىقتا ءاربىر بالاعا جەكە وڭالتۋ جوسپارى ازىرلەنەدى. مۋلتيديستسيپلينارلىق جۇيەگە نەگىزدەلگەن مەكەمەدە بالامەن نەۆروپاتولوگ, رەابيليتولوگ, نەوناتولوگ, جاتتىعۋ تەراپياسىنىڭ نۇسقاۋشىسى, لوگوپەد, دەفەكتولوگ, پسيحولوگ جۇمىس ىستەيدى.
قىزىلوردا