شىمكەنتتىڭ ەكى كاسىپورنى استانا قالاسىندا وتكەن «پارىز-2025» رەسپۋبليكالىق كونكۋرسىنىڭ لاۋرەاتى اتاندى. ول «ەۆروكريستالل» جشس مەن «Dala-construction.kz» جشس كومپانيالارى, دەپ حابارلايدى Egemen.kz.
بۇل كاسىپورىندار ءونىم ءوندىرىپ, وڭىرلىك الەۋمەتتىك جوبالاردى قولعا الىپ كەلەدى. سونداي-اق ەڭبەك قاۋىپسىزدىگىن قامتاماسىز ەتۋدە ۇلكەن جەتىستىكتەرگە جەتىپ ءجۇر. كومپانيالاردىڭ وڭدى ىستەرى قىزمەتكەرلەردىڭ ەڭبەك جاعدايىن جاقسارتۋعا, الەۋمەتتىك قورعاۋ شارالارىن كۇشەيتۋگە جانە وڭىردەگى الەۋمەتتىك ينفراقۇرىلىمدى دامىتۋعا باعىتتالعان.
كونكۋرستىڭ قالالىق كەزەڭىندە شىمكەنت قالاسىنان 18 كاسىپورىن قاتىسىپ, 5 نوميناتسيا بويىنشا 19 ءوتىنىم ۇسىنىلعان-دى. كوميسسيا بارلىق ۇمىتكەردى ارنايى تالاپتار بويىنشا قاراپ, الەۋمەتتىك جاۋاپكەرشىلىك دەڭگەيى, ەڭبەك جاعدايى, ەكولوگيالىق تالاپتاردى ساقتاۋ مەن كورپوراتيۆتىك مادەنيەت كورسەتكىشتەرى جاعىنان باعالادى.
ماماندار «پارىز» كونكۋرسى جەرگىلىكتى كاسىپورىنداردىڭ بيزنەستەگى الەۋمەتتىك جاۋاپكەرشىلىگىن كۇشەيتەتىنىن, الداعى ۋاقىتتا الەۋمەتتىك جوبالارعا بەلسەندى قاتىسۋىنا سەرپىن بەرەتىنىن مالىمدەدى.
شىمكەنت