د. سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە «SMART Driving Technology» ينجينيرينگ ورتالىعىنىڭ اشىلۋى ءوتتى. ورتالىقتىڭ اشىلۋىمەن قازاقستان جانە قىتاي اراسىنداعى ينجەنەرلىك ءبىلىم بەرۋ حالىقارالىق ىنتىماقتاستىعىنىڭ نەگىزگى جوباسى لۋ بان شەبەرحاناسى دامۋدىڭ جاڭا دەڭگەيىنە كوتەرىلدى, دەپ حابارلايدى Egemen.kz.
لۋ بان شەبەرحاناسى قۇرىلعان ساتتەن باستاپ تەك وقۋ الاڭى عانا ەمەس, بولاشاقتىڭ اۆتوموبيل سالاسىنا ماماندار دايارلاۋعا باعىتتالعان زاماناۋي ءبىلىم بەرۋ جانە يننوۆاتسيالىق ورتالىققا اينالدى. بۇگىندە مۇندا قازاقستاننان جانە شەتەلدەن كەلگەن ستۋدەنتتەر ەلەكتروموبيلدەر تەحنولوگياسىن, گيبريدتى كۇش قوندىرعىلارىن, ينتەللەكتۋالدى كولىك جۇيەلەرىن, جاساندى ينتەللەكتتى جانە اۆتونومدى جۇرگىزۋ تەحنولوگيالارىن مەڭگەرەدى. «SMART Driving Technology» ورتالىعىنىڭ اشىلۋى تەحنولوگيالىق ەكوجۇيەنى ودان ءارى نىعايتىپ, جاڭا بۋىن گيبريدتى جانە ەلەكترلى اۆتوموبيلدەرگە, اۆتوپيلوت پلاتفورمالارىنا, AR/VR سيمۋلياتسيالىق كەشەندەرىنە جانە تسيفرلىق نەگىزدەرگە قولجەتىمدىلىكتى كەڭەيتتى.
سالتاناتتى جيىندا عىلىم جانە جوعارى ءبىلىم ۆيتسە-ءمينيسترى گۇلنار كوبەنوۆا جاڭا ورتالىقتىڭ پرەزيدەنت قويعان مىندەتتەرگە تولىق سايكەس كەلەتىنىن اتاپ ءوتتى.
– پرەزيدەنتتىڭ «جاساندى ينتەللەكت داۋىرىندەگى قازاقستان» جولداۋىندا پيلوتسىز جانە سمارت-كولىك تەحنولوگيالارىن جەدەل دامىتۋ قاجەتتىلىگى ەرەكشە ايتىلعان. ورتالىقتىڭ اشىلۋى – ۇلتتىق تەحنولوگيالىق قۇزىرەتتەر جەلىسىن قالىپتاستىرۋداعى ماڭىزدى قادام. شىعىس قازاقستان مىقتى ينجەنەرلىك مەكتەپكە يە. ال شقتۋ ءبىلىم, عىلىم جانە يننوۆاتسيانى تابىستى ۇشتاستىرىپ كەلەدى. بۇل ورتالىق بولاشاققا قاجەتتى قۇزىرەتتەردى دامىتىپ, ەلىمىزگە جانە شەتەلگە قاجەت جوعارى بىلىكتى مامانداردى دايارلاۋعا مۇمكىندىك بەرەدى, – دەدى گ. كوبەنوۆا.
تيانتسزين كاسىپتىك ۋنيۆەرسيتەتىنىڭ پرەزيدەنتى ۋ تسزۋنباو ءوز سوزىندە جوبانىڭ سەرپىندى دامۋىن ەرەكشە اتاپ ءوتتى.
– لۋ بان شەبەرحاناسى قىتاي مەن قازاقستان ىنتىماقتاستىعىنىڭ جاڭا بەلەسى. جوبانىڭ ءبىرىنشى كەزەڭى 2023 جىلى ىسكە قوسىلسا, بۇگىن ەكىنشى كەزەڭى اشىلدى. شقتۋ يندۋستريانىڭ قاجەتتىلىكتەرىن ءبىلىم بەرۋ ۇدەرىسىمەن تەرەڭ ينتەگراتسيالاۋ ارقىلى جوعارى ناتيجەلەر كورسەتىپ كەلەدى. ينتەللەكتۋالدى كولىك جۇيەلەرى ينجەنەرلىك ورتالىعى وزىق اۆتوموبيل تەحنولوگيالارىن دامىتۋعا جانە قازاقستان ءۇشىن جوعارى بىلىكتى ماماندار دايارلاۋعا ىقپال ەتەدى, – دەدى ۋ. تسزۋنباو.
ءيا, جاڭا بەلەسكە جەتكەن شەبەرحانادان شىڭدالىپ شىققان تۇلەكتەر زاماننىڭ اعىمىنا قاراي جاڭا قىزمەت تۇرلەرىن كورسەتۋگە ابدەن ماشىقتانعان. مۇندا ءبىلىم دە, بىلىك تە شىڭدالا تۇسەدى.
وسكەمەن