اتىراۋداعى ايرىقشا بەتبۇرىس

اتىراۋ وبلىسىنىڭ اكىمى سەرىك شاپ­كە­نوۆتىڭ ايتۋىنشا, بۇ­قارالىق سپورتتى دامىتۋعا مەملەكەت قانا ەمەس, ءىرى بيزنەس وكىل­دەرى دە كوڭىل اۋدارىپ وتىر. ماسەلەن, «Texol» سەكىلدى ءىرى كومپانيالار وندىرىستىك جوبالاردى ىسكە قوسۋمەن عانا شەكتەلىپ قالماي, الەۋ­مەتتىك ينفراقۇرىلىمدى دامىتۋعا ەلەۋلى ۇلەس قوسۋدى قولعا الدى. كومپانيا «Texol Wellness Atyrau» سپورتتىق-ساۋىقتىرۋ كە­شە­نى­نىڭ قۇرىلىسىنا دەمەۋشىلىك تانىتىپ وتىر.

«وڭىردە ەڭ ءىرى سپورت-ساۋىقتىرۋ كەشەنى­نىڭ قۇرىلىسى باستالدى. بۇل – بيزنەستىڭ الەۋمەتتىك جاۋاپكەرشىلىگىنىڭ ناقتى كورى­نىسى. كومپانيا بۇعان دەيىن اتىراۋ ۆاگون قۇ­راستىرۋ زاۋىتى جوباسىن ءساتتى جۇزەگە اسىر­دى. ەندى, مىنە, سپورتتىڭ 12 تۇرىمەن اينا­لىسۋعا مۇمكىندىك بەرەتىن زاماناۋي كەشەن سالۋعا كىرىستى. مۇندا ەرەسەكتەر دە, با­لالار دا جاتتىعا الادى. بۇل – سالاماتتى ءارى بەلسەندى قوعام قۇرۋ جولىنداعى تاعى ءبىر قادام», دەيدى س.شاپكەنوۆ.

«Texol group» ديرەكتورلار كەڭەسىنىڭ توراعاسى شوتا ابحازاۆانىڭ ايتۋىنشا, زاماناۋي سپورت, دەمالىس ورتالىعىنىڭ جالپى اۋدانى – 18 مىڭ شارشى مەتر. ءۇش قاباتتى كەشەندە تەننيس كورتتارى, التى جولاقتى ءجۇزۋ باسسەينى, فيتنەس, جاتتىعۋ زالدارى, ورمەلەۋ قابىرعاسى مەن دەمالىس اۋماعى قاراستىرىلىپ وتىر. نىسان ءبىر مەزگىلدە ءبىر مىڭ ادامدى قابىلداي الادى.

جاقىندا قىزىلقوعا اۋدانىنداعى جام­بىل اۋىلدىق وكرۋگىندە دەنەشىنىق­تىرۋ-ساۋىقتىرۋ كەشەنى اشىلدى. اۋدان اكىمى قانات ءازمۇحانوۆتىڭ مالىمەتىنشە, كەشەننىڭ قۇرىلىسى 2024 جىلى باستال­­عان. جاڭا نىساننىڭ قۇرىلىسىن «اتىراۋ­­قۇ­رىلىسستاندارت» جشس جۇرگىزگەن.

«پرەزيدەنت تاپسىرماسىنا سايكەس سپورت سالاسىن دامىتۋ باعىتىندا اۋدانىمىزدا اۋقىمدى جۇمىس اتقارىلىپ جاتىر. بۇرىن ميالى مەن ساعىز اۋىلدارىندا سپورت كەشەنى بار ەدى. كەيىنگى جىلدارى تاسشاعىل مەن جاسقايرات اۋىلىندا جاڭا نىساندار اشىلدى. جىل سوڭىنا دەيىن قاراكول, قونىستانۋ, قاراباۋ اۋىلدارىندا سپورت كەشەندەرى پايدالانۋعا بەرىلەدى. كەلەسى جىلى جانگەلدين, تايسويعان اۋىلدارىندا سپورت مەكتەپتەرىن اشۋ جوسپارلانىپ وتىر»,  دەيدى ق.ءازمۇحانوۆ.

زاماناۋي نىساندا سپورت زالى, جاتتىعۋ, كۇرەس بولمەلەرى, كيىم اۋىستىراتىن ورىندار مەن جاتتىقتىرۋشىلار كابينەتتەرى بار. اۋداننىڭ ءبىلىم سالاسىندا 40 جىلدان استام جۇمىس ىستەگەن ارداگەر ۇستاز راحمەت عالياحمەتوۆتىڭ ايتۋىنشا, مۇنداي كەشەن جاس بۋىندى سپورتتى سەرىك ەتۋگە, سالاماتتى ءومىر سالتىنا باۋلۋعا ىقپال ەتەدى.

ء«بىزدىڭ كەزىمىزدە مۇنداي كەڭ زالى بار سپورت كەشەندەرى بولمادى. بۇل – مەملەكەتتىڭ بۇقارالىق سپورتتى دامىتۋعا بەت بۇرۋىنىڭ جەمىسى», دەيدى ر.عالياحمەتوۆ.

قازىر وسى اۋدانداعى مۇقىر اۋىلىندا سپورت كەشەنى سالىنىپ جاتىر. نىساننىڭ اۋماعى 2351 شارشى مەتردى قۇرايدى. كەشەندە فۋتبول, ۆولەيبول, باسكەتبول, كۇرەس زالدارى قاراستىرىلعان. سونداي-اق زاماناۋي تالاپقا ساي جابدىقتالعان جاتتىعۋ زالى, 87 شارشى مەترلىك اسحانا مەن 20 ورىندىق جاتاقحانا دا سپورتشىلار يگىلىگىنە بەرىلەدى.

وبلىستىق دەنەشىنىقتىرۋ, سپورت جانە تۋريزم باسقارماسىنىڭ باسشىسى نۇربول سىدىقوۆتىڭ دەرەگىنە سۇيەنسەك, وسىنداي جاڭا سپورت كەشەنى ماحامبەت اۋدانىنىڭ تاڭداي اۋىلىندا دا اشىلدى. بۇل اۋىل­دا بۇقارالىق سپورتپەن قامتىلاتىن بالا سانى 400-گە جۋىقتايدى. كەشەن 150 ادامعا ارنالعان. ەكى جىل بۇرىن قۇرىلىسى باستالعان نىساننىڭ جالپى اۋدانى – 2077,12 شارشى مەتر. كەشەن جوباسىن «سۋ قۇرىلىس جوبا» جشس, قۇرىلىس جۇمىسىن «سۇڭقار قۇرىلىس LTD» جشس جۇرگىزدى. «گراند ۋربان» جشس تەحنيكالىق قاداعالاۋدى ىسكە اسىردى.

جاڭا كەشەندە ويىن, جاتتىعۋ زالدارى, ەرلەر مەن ايەلدەردىڭ كيىم اۋىستىرۋ بولمەلەرى, جۋىنۋعا ارنالعان, مەديتسينالىق كابينەتتەر بار. ەندى مۇندا فۋتبول, ۆولەيبول, باسكەتبول, بوكس, دزيۋدو, قازاق كۇرەسى, توعىزقۇمالاق, گرەك-ريم كۇرەسىنىڭ سەكتسيالارى جۇمىس ىستەيدى.

«پرەزيدەنتتىڭ تاپسىرماسىنا سايكەس ال­داعى ۋاقىتتا ۇلتتىق سپورت پەن وليمپيا­دالىق سپورت تۇرلەرىن دامىتۋعا باسىم­دىق بەرىلەدى. اسىرەسە اۋىلداعى بالالار مەن جاسوسپىرىمدەر بوس ۋاقىتىن ءتيىمدى وتكىزىپ, سپورتقا قادام باسادى», دەيدى ن.سىدىقوۆ.

ونىڭ ايتۋىنشا, اتىراۋداعى تاعى ءبىر ماڭىزدى سپورت نىسانى – وقۋ-جاتتىعۋ ورتالىعىنىڭ قۇرىلىسى قايتا جانداندى. بۇرىن بۇل نىساننىڭ قۇرىلىسى سوت داۋ­لارىنا بايلانىستى توقتاپ قالعان ەدى. قۇ­رىلىس جۇمىسىن «VEK-Stroy-Com» جشس جۇر­گىزىپ جاتىر. جوبادا ءۇش زاماناۋي سپورت زالى مەن قاجەتتى ينفراقۇرىلىم قاراستىرىلعان.

«وليمپيادالىق سپورت تۇرلەرىنە ارنالعان بازا وقۋ-جاتتىعۋ ورتالىعىنىڭ قۇرىلىسىن جىل سوڭىنا دەيىن اياقتاۋ كوزدەلىپ وتىر. بۇل نىسان وليمپيادالىق سپورت تۇرلەرى بويىنشا وبلىستىق قۇراما كوماندالاردىڭ دايىندىق بازاسىنا اينالادى. مۇندا كۇنىنە 200-دەن استام سپورتشى تۇراقتى تۇردە جاتتىعا الادى», دەپ مالىمدەدى ن.سىدىقوۆ.

باسقارما باسشىسىنىڭ ايتۋىنشا, بيىل ءۇش ءىرى سپورت نىسانى – دەنەشىنىقتىرۋ-ساۋىقتىرۋ كەشەنى, مۇز ايدىنى مەن «اتىراۋ» وبلىستىق فۋتبول كومانداسى» جشس سەنىمگەرلىك باسقارۋدان مەملەكەت مەنشىگىنە قايتارىلدى. بۇل قادام سپورت نىساندارىن تۇرعىندار يگىلىگىنە ءتيىمدى پايدالانۋ ماقساتىندا جاسالىپ وتىر. سونداي-اق بىرنەشە زاماناۋي نىساننىڭ قۇرىلىسىن جۇرگىزۋ جوسپارلانعان. ونىڭ ىشىندە «اتىراۋ ارەنا» سپورت كەشەنى, ۇلتتىق سپورت تۇرلەرىنە ارنالعان, بايداركا مەن كانوە ەسۋ ورتالىقتارى, 12 مىڭ ورىندىق فۋتبول ستاديونى سەكىلدى نىساندار بار.

سونداي نىساننىڭ ءبىرى – دارىندى بالالارعا ارنالعان سپورت-ينتەرناتى. وسى ماقساتتا اتىراۋ قالاسىنان بولىنگەن 4,2 گەكتاردى قۇرايتىن جەر تەلىمىنە 400 ورىندىق مەكتەپ-ينتەرنات عيماراتىن سالۋ كوزدەلىپ وتىر. جوباعا سايكەس قۇرىلىس جۇمىسىن 2027 جىلى اياقتاپ, قولدانىسقا بەرۋ جوسپارلانعان. بۇل نىسان بولاشاق چەمپيونداردى دايارلاۋعا ارنالعان زاماناۋي ينفراقۇرىلىممەن قامتاماسىز ەتىلەدى.

«كەشەن وڭىردەگى سپورتتىق ءبىلىم جۇيەسىن جاڭا دەڭگەيگە كوتەرەدى. سپورتتاعى دارىندى جاستارعا قولايلى جاعداي جاساۋعا مۇمكىندىك بەرەدى. بيىل العاش رەت 18 سپورت مەكەمەسىنە جاڭا اۆتوبۋس بەرىلدى. ماقسات – سپورتپەن شۇعىلداناتىن بالالار مەن جاسوسپىرىمدەردىڭ جاتتىعۋعا, جارىس ورىندارىنا قاۋىپسىز قاتىناۋىن قامتاماسىز ەتۋ. جاڭا اۆتوبۋستار وبلىستاعى سپورت ۇيىمدارىنىڭ ماتەريالدىق-تەحنيكالىق بازاسىن نىعايتىپ قانا قويماي, جاس سپورتشىلاردىڭ ۋاقتىلى ءارى قاۋىپسىز تاسى­ما­لىن قامتاماسىز ەتەدى», دەيدى باسقارما باس­شىسى.

اتىراۋ وبلىسى