«Ashyk kogam» قوعامدىق قورى باتىس قازاقستان وبلىسىنىڭ مەملەكەتتىك كىرىستەر دەپارتامەنتى جۇمىسىنا قوعامدىق مونيتورينگ جۇرگىزدى, دەپ حابارلايدى Egemen.kz.
2023 جىلى مادەنيەت جانە اقپارات مينيسترلىگى ازاماتتاردىڭ مەملەكەتتىك باسقارۋ ىسىنە اتسالىسۋىنا مۇمكىندىك بەرەتىن «قوعامدىق باقىلاۋ تۋرالى» زاڭ قابىلداۋعا باستاماشى بولعانى بەلگىلى. الايدا, ءىس جۇزىندە ونىڭ نورمالارى كەڭىنەن قولدانىلمادى جانە جەرگىلىكتى تۇرعىنداردىڭ ءبىراز بولىگى بۇل وزگەرىس جونىندە اقپاراتتى جەتكىلىكتى العان جوق. وسىعان وراي, «Ashyk kogam» قوعامدىق قورى 2025 جىلعى 23 قازاندا باتىس قازاقستان وبلىسىنىڭ مەملەكەتتىك كىرىستەر دەپارتامەنتى جۇمىسىنا قوعامدىق مونيتورينگ جۇرگىزدى. ماقسات – زاڭنىڭ ءىس جۇزىندە قالاي جۇمىس ىستەيتىنىن كورسەتۋ جانە ازاماتتاردىڭ وسى ىسكە اتسالىسۋعا قىزىعۋشىلىعىن ارتتىرۋ. مونيتورينگكە بقو قوعامدىق كەڭەسىنىڭ مۇشەلەرى, «Ashyk kogam» قوعامدىق قورى مەن باق وكىلدەرى, بلوگەرلەر قاتىستى.
ولار ازاماتتارعا قىزمەت كورسەتۋ ساپاسىن, كونسۋلتاتسيالاردىڭ قولجەتىمدىلىگىن, سونداي-اق, سالىق ورگاندارىندا قابىلداۋ شارتتارىن باعالادى. ءىس-شارا قورىتىندىسى بويىنشا سەرۆيستى جاقسارتۋعا قاتىستى ۇسىنىستار دايىندالدى. اشىق دەرەككوزدەردىڭ مالىمەتىنە سۇيەنسەك, بۇل ءىس-شارا – بقو-دا «قوعامدىق باقىلاۋ تۋرالى» زاڭدى ءىس جۇزىندە قولدانۋدىڭ العاشقى ۇلگىسى. «Ashyk kogam» قوعامدىق قورى الداعى ۋاقىتتا قوعامدىق تالقىلاۋ, ساراپتاما, قاشىقتان مونيتورينگ جاساۋ نەمەسە مونيتورينگ تاسىلدەرىمەن قوعامدىق باقىلاۋ ءىس-شارالارىن اي سايىن جۇرگىزۋ جوسپارلانىپ وتىرعانىن ايتادى.