قاتپار-قاتپار قالبا جوتالارىنىڭ ءبىر قۋىسىنداعى الاقانداي توعاناس اۋىلىندا وندىرىلەتىن ءونىم الاتاۋدىڭ باۋرايىنا جونەلتىلىپ جاتىر. ءتىپتى اۋىل دا ەمەس. قىستاق.
«باسىندا كۇيەۋىم توعاناس قىستاعىندا شارۋا قوجالىعىن قۇرىپ, مال ۇستادى. كەيىن سيىر ساۋىپ, ءسۇتىن كادەگە جاراتايىق دەپ, شاعىن تسەح اشتىق. مۇنى بوزانباي اۋىلىنىڭ اكىمدىگى قولداپ, «اۋىل اماناتى» باعدارلاماسى ارقىلى 2,5%-بەن 9 ملن 400 مىڭ تەڭگە نەسيە قاراجاتىن الدىم», دەيدى ءتورت بالانىڭ اناسى مەرۋەرت توقىنتاەۆا.
نەسيە قاراجاتىنا ءسۇت وڭدەيتىن, ىرىمشىك قايناتاتىن جانە قاقتايتىن قوندىرعىلار, ازىق-ت ۇلىكتى ساقتايتىن توڭازىتقىش, باسقا دا قۇرال-جابدىقتار ساتىپ العان. توعاناستاعى شاعىن تسەحتا سۇتتەن 14 ءتۇرلى ءونىم وندىرىلەدى. ءسۇت پەن ايراننان بولەك, ماي, كىلەگەي, ىرىمشىك, سان ءتۇرلى قۇرت وسى اۋىلدان شىعادى. ءتىپتى تالشىقتى ىرىمشىككە دەيىن جاسايدى. شيكىزاتتى شارۋا قوجالىعىنان عانا ەمەس, بوزانباي اۋىلىنىڭ تۇرعىندارىنان دا جينايدى.
«قۇرت-ىرىمشىككە تاپسىرىس بەرەتىندەر از ەمەس. اسىرەسە توي-تومالاق, اس-ناۋقان كەزىندە سۇرانىس ارتادى. ءونىم وسكەمەندەگى جەكە تۇرعىن ءۇيدىڭ ىرگەسىنەن اشىلعان شاعىن دۇكەندە ساتىلادى. الەۋمەتتىك جەلى ارقىلى دا تاپسىرىس قابىلدايمىز», دەيدى كاسىپكەر. ايتقانداي, توعاناستىڭ قۇرتىن الماتىعا الدىراتىن تۇتىنۋشىلار دا بار. ءتۇپ قيانداعى اۋىلدى قالاي تاۋىپ العان دەسەك, بۇرىنعى وسكەمەن تۇرعىنى ءسابيىنىڭ ءىش قۇرىلىسىنا وپەراتسيا جاساتىپتى. كەيىن ولار الماتىعا كوشكەن. الايدا اي سايىن دوربا-دوربا قۇرت العىزادى ەكەن. نەگە دەسەك, وپەراتسيا جاساتقان كىشكەنتاي قىزى توعاناستىڭ قۇرتىن جەپ, دەنساۋلىعى تۇزەلىپتى. ارينە, شاعىن تسەحتان شىققان قۇرتتىڭ قۇرامىندا قوسپا جوق, تابيعي تازا جولمەن دايىندالادى.
مەرۋەرت توقىنتاەۆا تازا ەتتەن ءۇش ءتۇرلى شۇجىق, قاقتالعان قازى مەن قارتا ازىرلەۋدى دە قولعا الماق. وعان قاجەت اپپارات تا, شيكىزات تا دايىن.
ء«بىر قيىندىق – جۇمىسشى جايى. 200 مىڭ تەڭگە جالاقىعا ەشكىم كەلمەيدى. ءبىزدىڭ قىستاق پەن بوزانباي اراسىندا ءجۇرىپ-تۇرۋدى قيىنسىنادى. مۇندا نە ۇيالى بايلانىس, نە ينتەرنەت جوق. كەيدە تاپسىرىس بەرۋشىلەرىم تەلەفون شالىپ ىزدەيدى. بولاشاقتا وسى ماسەلەلەر وڭ شەشىلسە, شارۋامىز قىزا تۇسەر ەدى», دەپ ماسەلەسىن دە جاسىرمادى.
وسكەمەننەن 50 شاقىرىم جەردەگى توعاناستا قازىر ونشاقتى عانا ءتۇتىن بار. اۋىل ەمەس, بوزانبايدىڭ كوشەسى بولىپ ەسەپتەلەدى ەكەن. مۇنداعى جۇرت مالمەن جان باعىپ وتىر. مەرۋەرتتەي كاسىپكەرلەر اۋىلدى توڭىرەكتەي بەرسە, ءتۇتىن سانى دا ارتار ما ەدى.
شىعىس قازاقستان وبلىسى,
ۇلان اۋدانى