رەسپۋبليكا كۇنى قارساڭىندا جەتىسۋ وبلىسىندا ءوڭىردىڭ 8 اۋدانى مەن 2 قالاسىنىڭ اۋىل شارۋاشىلىعى تاۋار وندىرۋشىلەرىنىڭ قاتىسۋىمەن جارمەڭكە ءوتتى. تالدىقورعان قالاسىندا وتكەن جارمەڭكەگە وبلىس اكىمىنىڭ ءبىرىنشى ورىنباسارى الىبەك جاقانباەۆ قاتىستى.
جەتىسۋ وبلىسى اكىمىنىڭ ءباسپاسوز قىزمەتىنىڭ حابارلاۋىنشا, تالدىقورعان تۇرعىندارى مەن قالا قوناقتارى جارمەڭكەدە اۋىل شارۋاشىلىعى تاۋار وندىرۋشىلەرىنەن تىكەلەي قولجەتىمدى باعادا بالعىن ءارى ساپالى ونىمدەردى ساتىپ الدى. جارمەڭكەدە شامامەن 137 توننا بولاتىن 54 ءتۇرلى ءونىم ۇسىنىلدى. اتاپ ايتقاندا, 19,1 توننا كوكونىس, 12,1 توننا ەت, 3,5 توننا بالىق, 1,4 توننا ءسۇت ونىمدەرى, 20,4 توننا كارتوپ, 7,7 توننا جەمىس-جيدەك, 4 توننا قانت, 0,8 توننا بال جانە شامامەن 72 توننا باسقا دا ءتۇرلى ونىمدەر ساۋدالاندى.
ساتۋشىلار مەن كەلۋشىلەر جارمەڭكەنىڭ قوس تاراپقا دا ءتيىمدى ەكەنىن جەتكىزدى.
– بىزدە تاۋىق ەتىنەن جاسالعان ءونىمنىڭ ءتۇر-ءتۇرى بار, سونىمەن قاتار جۇمىرتقانىڭ بىرنەشە سورتىن ۇسىندىق. جارمەڭكەگە 100 كيلو تاۋىق ەتى, 50 كيلو بالاپان ەتى جانە قوسىمشا سۋبونىمدەر الىپ كەلدىك. ونىمدەرگە سۇرانىس جوعارى, بۇل ونىڭ ساپالى جانە باعاسىنىڭ قولجەتىمدى بولعانىن بىلدىرەدى. مىسالى, ءبىر دانا جۇمىرتقانىڭ باعاسى 25 تەڭگە مەن 55 تەڭگەنىڭ ارالىعىندا, – دەيدى «كوگەر لتد» جشس فيرمالىق دۇكەنىنىڭ ساتۋشىسى ايگۇل ساتىبالدينا.
اقسۋ اۋدانىنىڭ فەرمەرى سەرىكبول قايراتبەك جارمەڭكەگە قوي ەتىن الىپ كەلگەندەرىن ايتادى. «مال شارۋاشىلىعىمەن 10 جىلدان بەرى اينالىسامىز. تالدىقورعاندىقتار ءبىزدىڭ ونىمىمىزگە ريزا بولاتىنىنا سەنەمىز» دەيدى ول.
– ءبىز ونىمدەردىڭ سان ءتۇرى مەن تومەن باعالارىنا ريزا بولدىق. ءبارى دە ادەمى, ۇقىپتى قويىلعان, كوز سۇيسىنەدى. ەت, بالىق, كوكونىس ساتىپ الدىق. وسىنداي جارمەڭكەلەر ءجيى ۇيىمداستىرىلسا ەكەن دەيمىز. مەرەكە قارساڭىندا حالىق يگىلىگى ءۇشىن اۋىل شارۋاشىلىعى جارمەڭكەسىنىڭ وتكىزىلگەنىنە قۋانامىز, – دەدى تالدىقورعاندىق پوگورەلوۆتار وتباسى.
نەگىزگى ازىق-ت ۇلىك تاۋارلارىنىڭ باعاسىن تۇراقتاندىرۋ جانە وتاندىق وندىرۋشىلەردى قولداۋ ماقساتىندا تالدىقورعاندا ۇيىمداستىرىلعان جارمەڭكەدە 128,8 ملن تەڭگەدەن استام سوماعا اۋىل شارۋاشىلىعى ونىمدەرىن ساتۋ جوسپارلانعان.