كەڭەس وداعىنىڭ سپورت شەبەرى, تەڭىز كوپسايىسى مەن شاڭعى جارىستارى بويىنشا شەبەر اتانعان, سونداي-اق پولياتلون, پرەزيدەنتتىك جانە قىسقى كوپسايىس تۇرلەرىنەن قازاقستان چەمپيونى ءارى بىرنەشە دۇركىن جۇلدەگەرى ۆلاديمير كريۆەنتسوۆ زايلي الاتاۋىندا وتكەن جارىس كەزىندە ومىردەن ءوتتى, دەپ حابارلايدى Egemen.kz.
وقيعا تۋرالى اقپاراتتى جارىس ۇيىمداستىرۋشىلارى وزدەرىنىڭ Instagram پاراقشاسىندا جاريالادى.
«بۇگىنگى جۇگىرۋ كەزىندە قايعىلى جاعداي ورىن الدى. ءبىزدىڭ قاتىسۋشىمىز — 70 جاستاعى ۆلاديمير كريۆەنتسوۆ قايتىس بولدى», دەلىنگەن حابارلامادا.
حابارلامادا ايتىلعانداي, قايعىلى وقيعا ستارتتان كەيىن كوپ ۇزاماي بولعان. وقيعا ورنىنا بىرنەشە مينۋت ىشىندە جەتكەن تجد قىزمەتكەرلەرى العاشقى مەديتسينالىق كومەك كورسەتىپ, زارداپ شەككەن ادامدى «مەدەۋ» كەشەنىنىڭ قۇتقارۋ بولىمشەسىنە جەتكىزگەن. الايدا بارلىق شارالارعا قاراماستان, ونى امان الىپ قالۋ مۇمكىن بولمادى.
ۇيىمداستىرۋشىلاردىڭ ايتۋىنشا, ۆلاديمير تاجىريبەلى سپورتشى بولعان, ءتۇرلى جارىستاردىڭ تۇراقتى قاتىسۋشىسى ەدى. جارىسقا دەيىن مەديتسينالىق تەكسەرۋدەن ءوتىپ, سپورتپەن اينالىسۋعا ەشقانداي قارسى كورسەتىلىم بولماعان.
«ول ءاردايىم ستارتقا جۇزىندە كۇلكىمەن شىعاتىن, بەلسەندى ءومىر سالتىنىڭ ۇلگىسى ەدى. كوپشىلىگىمىز ءۇشىن ول رۋحتىڭ كۇشى مەن شابىتتىڭ سيمۆولى — سپورتتىڭ جاسقا قارامايتىنىن دالەلدەگەن جان بولاتىن», دەپ جازدى ۇيىمداستىرۋشىلار.
الماتىلىقتار دا پىكىرلەرىندە ۆلاديمير كريۆەنتسوۆتى مەيىرىمدى, جاناشىر ادام ءارى جاستارعا دا, سپورت ارداگەرلەرىنە دە ۇلگى بولارلىق تۇلعا رەتىندە ەسكە الدى.
ەسكە سالا كەتەيىك, جارىس زايلي الاتاۋىندا ءوتتى. قاتىسۋشىلارعا بەس ءتۇرلى قاشىقتىق ۇسىنىلعان: T1, Mynzhylky, Alplager, Gorelnik جانە Canicross (يتپەن جۇگىرۋ). Salomon Trail 2025 — «قازاقستاننىڭ سكايراننەرى» اتاعى مەن بەلگىسىن الۋ ءۇشىن وتەتىن سەريانىڭ العاشقى كەزەڭى بولدى.