كتك تەلەارناسى 2015 جىلدىڭ 26 ساۋىرىندە وتەتىن پرەزيدەنت سايلاۋىندا exit-poll جۇرگىزۋدى قارجىلاندىراتىن بولادى. وسىعان وراي, كەشە اتالمىش تەلەارنانىڭ كەڭسەسىندە ءباسپاسوز ءماسليحاتى ءوتتى.
تەلەارنانىڭ سايلاۋ ۋچاسكەلەرىنىڭ شىعابەرىسىندە سايلاۋشىلار اراسىندا ساۋالناما ءجۇرگىزۋگە تاپسىرىس بەرۋى – بۇل قازاقستان جاعدايىندا العاشقى تاجىريبە. تاپسىرىستى «ستراتەگيا» الەۋمەتتىك جانە ساياسي زەرتتەۋلەر ورتالىعى ورىندايدى.
ەكزيت-پولل سايلاۋ ۇدەرىسىنىڭ ماڭىزدى قۇرامداستارىنىڭ ءبىرى بولىپ تابىلادى. ونىڭ ناتيجەلەرى سايلاۋدىڭ اشىقتىعى مەن سايلاۋشىلاردىڭ داۋىسىن ساناۋدىڭ ادىلەتتىگىن باعالاۋدىڭ قۇرالى رەتىندە پايدالانىلادى. سونىمەن قاتار, ەكزيت-پولل سايلاۋ كۇنى ازاماتتاردىڭ داۋىس بەرۋى بويىنشا جەدەل اقپارات الۋعا مۇمكىندىك بەرەدى, سونىڭ نەگىزىندە سايلاۋدىڭ ناتيجەسىن بولجاۋعا مۇمكىندىك بار.
كتك تەلەارناسى قازاقستاندا ەكزيت-پولل وتكىزۋ ءتاجىريبەسىنىڭ دامۋىنا ءوز ۇلەسىن قوسۋدى ماڭىزدى دەپ سانايدى. بۇل ءىس-شارا سايلاۋ پروتسەسىنە دەگەن قوعامدىق قىزىعۋشىلىقتى ارتتىرۋعا سەپتىگىن تيگىزەدى, سونىمەن قاتار قازاقستاندىق سايلاۋشىلاردىڭ بەلسەندى ازاماتتىق ۇستانىمدارىنىڭ قالىپتاسۋىنا ىقپال ەتەدى. سايلاۋ كۇنى كتك ەكزيت-پولل وتكىزىلەتىن ورىنداردان تىكەلەي كورسەتىلىمدەر ءجۇرگىزۋدى جانە داۋىس بەرۋ ءۇردىسى بويىنشا كورەرمەندەردى اقپاراتتاندىرۋدى جوسپارلاپ وتىر.
ساۋالنامانى 2001 جىلدان بەرى جۇمىس ىستەپ كەلە جاتقان ەلىمىزدەگى تانىمال زەرتتەۋ ۇيىمدارىنىڭ ءبىرى «ستراتەگيا» ورتالىعى جۇزەگە اسىرادى. بۇل ورتالىقتىڭ زەرتتەۋ جۇرگىزۋ سالاسىندا تاجىريبەسى مول. سايلاۋ كۇنى ورتالىق بۇكىل ەل بويىنشا 20 مىڭنان اسا سايلاۋشىلار اراسىندا ساۋالناما جۇرگىزۋدى جوسپارلاپ وتىر. «ستراتەگيا» سۇحبات الۋشىلارى اۋىلدىق جانە قالالىق ەلدى مەكەندەردەگى 200 سايلاۋ ۋچاسكەلەرىنىڭ شىعابەرىسىندە تۇرادى.
ايناش ەسالي,
«ەگەمەن قازاقستان».
الماتى.