قانت قىزىلشاسىن قابىلداۋ باستالدى

مەملەكەت تاراپىنان قىزىلشانىڭ ءار تونناسىنا 25 مىڭ تەڭگە كولەمىندە سۋبسيديا قاراستىرىلعان. بۇعان قوسا, زاۋىت­تار قوسىمشا 15 مىڭ تەڭگە ۇستەمەاقى تولەيدى. ناتيجەسىندە, شارۋالاردىڭ ءتاتتى ءتۇبىردى وتكىزۋ باعاسى تونناسىنا 40 مىڭ تەڭگەگە جەتىپ وتىر. وبلىستىق اۋىل شارۋاشىلىعى باسقارماسىنىڭ مالىمەتىنشە, بيىل جەتىسۋدا قانت قىزىلشاسى شامامەن 12,2 مىڭ گەكتارعا ەگىلگەن. اقسۋ, الاكول, سارقان, ەسكەلدى, كوكسۋ اۋداندارىنىڭ شارۋالارى ءونىم جيناۋعا كىرىسىپ تە كەتتى. قازىر 240 گەكتار القاپتان 10 مىڭ توننادان استام ءونىم جينالدى. ورتاشا ءتۇسىم گەكتارىنا 422,6 تسەنتنەردى قۇراپ وتىر. جيناۋ جۇ­مىستارىنا 113 كومباين مەن 52 جاپىراق جينا­عىش ماشينا جۇمىلدىرىلعان. بۇل تەح­ني­كالاردىڭ قۋاتتىلىعى كۇنىنە 700 گەك­تار­عا دەيىن ءونىم جيناۋعا مۇمكىندىك بەرەدى.

ودان بولەك, تۇقىم, تىڭايتقىش پەن پەستيتسيد ساتىپ الۋعا دا مەملەكەتتەن كومەك بەرىلەدى. شارۋالارعا جەڭىلدەتىلگەن جانار-جاعارماي مەن ليزينگ ارقىلى جاڭا تەحنيكا ۇسىنىلعان. قىزىلشا باعىتىنداعى 25 سەرۆيستىك-دايىنداۋ ورتالىعى جۇمىس ىستەيدى, ولاردىڭ قولىندا 450-گە جۋىق ارنايى تەحنيكا بار.

«بيىل 40 گەكتارعا قانت قىزىلشاسىن ەكتىك. جيناۋ جۇمىسى قىزۋ ءجۇرىپ جاتىر. بارلىق قاجەتتى تەحنيكا بار, ءونىمدى ۋاقتىلى وتكىزىپ ۇلگەرۋگە تىرىسامىز. بىلتىر قىركۇيەكتە تاپسىرىپ, ون كۇندە جيناپ الساق, بيىل جۇمىستى قازاندا باستادىق. جەردىڭ ىلعالدى بولۋى ونىمگە وڭ اسەرىن تيگىزەدى دەپ ويلايمىن. اۋدانىمىزداعى زاۋىت مايبۇرشاقتى دا قابىلدايدى, سول باعىتتا دا جۇمىس ىستەيمىز. قولداۋ كورسەتىلىپ جاتقانىن سەزەمىز, ەندى ەڭبەك ونىمدىلىگىمىز دە سوعان ساي بولماق», دەيدى كوكسۋ اۋدانىنداعى شارۋاشىلىق يەسى ماقسات ءابدىراحمانوۆ.

قازىر اقسۋ قانت زاۋىتىندا ءونىم قابىلداۋ باستالىپ كەتتى. بۇل اۋداندا بيىل 2 400 گەكتارعا جۋىق القاپقا قانت قىزىلشاسى ەگىلگەن. 94 شارۋا قوجالىعى ەڭبەك ەتەدى. جاقىن كۇندەرى كورشىلەس سارقان مەن الاكول اۋداندارىنىڭ شارۋالارى دا ونىمدەرىن وسى زاۋىتقا جەتكىزەدى. ال رەسمي تۇردە قايتا وڭدەۋ جۇمىستارى 7 قازاندا ىسكە قوسىلادى دەپ جوسپارلانعان. كوكسۋ قانت زاۋىتى بولسا, كۇنىنە 2 مىڭ تونناعا دەيىن ءونىم قابىلداۋعا قاۋقارلى. جەرگىلىكتى 136 شارۋاشىلىق ماۋسىمعا بەلسەندى قاتىسىپ وتىر. اقسۋ قانت زاۋىتىنىڭ قۋاتتىلىعى تاۋلىگىنە 3 مىڭ تونناعا جەتەدى. اۋدانداعى جاس شارۋالاردىڭ ءبىرى ءاليحان قايرات ۇلى دا قانت قىزىلشاسى كاسىبىن العا سۇيرەپ جۇرگەندەردىڭ قاتارىندا.

«اكەم دە وسى داقىلدى وسىرۋمەن اينالىسقان. مەن دە سول ءىستى جالعاستىرىپ كەلەمىن. قىزىلشانىڭ كۇتىمى اۋىر, بىراق ەڭبەك اقتالادى. زاۋىتقا وتكىزۋ باعاسىنىڭ كوتەرىلۋى ۇلكەن قولداۋ بولدى. اسىرەسە سۋبسيديا مەن ارزانداتىلعان جانار-جاعارمايسىز مۇنداي ءىستى الىپ ءجۇرۋ قيىن بولار ەدى. ەندى ءونىمنىڭ ساپالى بولىپ, شىعىنسىز تاپسىرساق دەگەن ويدامىز», دەيدى جاس شارۋا.

جەتىسۋ وبلىسى