ءال-فارابي اتىنداعى قازاق ۇلتتىق ۋنيۆەرسيتەتىندە يادرولىق قارۋعا قارسى حالىقارالىق نەۆادا-سەمەي قوزعالىسىنىڭ 25 جىلدىعىنا ارنالعان «ۆسپومينايا, دۋماي و بۋدۋششەم» اتتى كىتاپتىڭ تۇساۋكەسەرى ءوتتى.
شارانى قازۇۋ رەكتورى عالىم مۇتانوۆ اشتى. ول قازاق ەلىنىڭ ىقىلىم زاماننان-اق نەبىر ناۋبەت, زۇلماتتى باستان وتكەرگەندىگىن, سەمەي پوليگونىنان زارداپ شەككەن جانكەشتىلەردىڭ تەك قۇرمەتكە عانا لايىق ەكەندىگىن ايتا وتىرىپ, حالىقارالىق نەۆادا-سەمەي قوزعالىسىنىڭ يۋنەسكو-نىڭ شەشىمىمەن «الەم ەستەلىكتەرى» اتتى الەمدىك رەەسترگە ەنگەنىن ماقتانىشپەن تىلگە تيەك ەتتى. يادرولىق سىناق بەيبىت كۇندە سان مىڭ ادامدى جالمادى. رادياتسيانىڭ كەسىرىنەن جارتى ميلليوننان استام ادام زارداپ شەكتى. مىڭداعان ادامدى دەنساۋلىعىنان ايىرىپ, ومىرىنە قاۋىپ ءتوندى. بۇگىندە يادرولىق توزاق وتىنان ءتىرى قالىپ, ارامىزدا جۇرگەن باۋىرلارعا قاراسۋ, الەۋمەتتىك كومەك كورسەتۋ, ولاردى دارىپتەۋ, وسكەلەڭ ۇرپاققا ۇلىقتاۋ – ءبىزدىڭ ازاماتتىق پارىزىمىز. «ۆسپومينايا, دۋماي و بۋدۋششەم» اتتى كىتاپتىڭ اۆتورلارى – وسى سەمەي پوليگونىنان زارداپ شەككەن جاندار, جىلدار بويى دامىلسىز اجال سەپكەن اجداھانىڭ اۋزىنا ماڭگىلىك قۇم قۇيعاندار. ولار قاشاندا قۇرمەتكە لايىق, ماقتاۋعا ەمەس, ماقتانۋعا تۇرارلىق دەسەك ارتىق ايتقاندىق ەمەس.
سونداي-اق, جيىن بارىسىندا وسى كەشتىڭ وتۋىنە ۇيىتقى بولعان «نەۆادا-سەمەي» قوزعالىسىنىڭ جەتەكشىسى, بەلگىلى پۋبليتسيست, ديپلومات, قوعام قايراتكەرى ولجاس ومار ۇلى: «بۇگىن ەلىمىزدىڭ ەڭ بەدەلدى جوعارى وقۋ ورنىندا رەسپۋبليكا بويىنشا العاش رەت لينگۆيستيكالىق عىلىمي-زەرتتەۋ ورتالىعى اشىلىپ وتىر. ءبىز باس قوسىپ وتىرعان «ۆسپومينايا, دۋماي و بۋدۋششەم» اتتى كىتاپتى جازۋعا اتسالىسقاندار – «نەۆادا-سەمەي» قوزعالىسىن كورگەندەر, تىكەلەي قاتىسۋشىلارى», – دەپ اتاپ ءوتتى.
كەش بارىسىندا جازۋشى, ادەبيەتتانۋشى, قازاقستاننىڭ قوعامدىق-ساياسي قايراتكەرى ولجاس سۇلەيمەنوۆتىڭ شىعارماشىلىعى دا نازاردان تىس قالمادى. فيلولوگيا, ادەبيەتتانۋ جانە الەم تىلدەرى فاكۋلتەتىنىڭ 3-كۋرس ستۋدەنتى ساكەن ەسەنگەلديەۆ اقىننىڭ «ادامعا تابىن, جەر, ەندى» ولەڭىن جاتقا وقىسا, جۋرناليستيكا فاكۋلتەتىنىڭ 3-كۋرس ستۋدەنتى ارمان قۇدايبەرگەن ءوز شىعارماشىلىعىنان «ارناۋ» ولەڭىن جولدادى.
جۇلدىز ءابىل.
الماتى.