قوستاناي مەملەكەتتىك پەداگوگيكالىق ينستيتۋتىنىڭ ستۋدەنتتەرى – جاس سۋرەتشىلەر قوستاناي كوركەمسۋرەت گالەرەياسى ۇيىمداستىرعان وزدەرىنىڭ «كوكتەمگى ۆەرنيساج» اتتى تىرناقالدى كورمەسىن ناۋرىزعا ارنادى.
تابيعات بۋسانىپ جاتىر. تەرىستىكتەن التىن كۇرەك جەل ەستى. اقپاننىڭ قاھارلى ايازىن جەڭگەن كوكتەمنىڭ جەلى ءزاھارسىز, ءجۇزىڭدى جىبەك ورامال سيپاپ وتكەندەي بولادى. قار كوبەسى سوگىلىپ, «جىلعالاردان سۋ اقتى, قاڭقىل-قاڭقىل قاز كەلدى». اعاش دىڭىنە ءنار جۇگىردى. ۇزاق قارعا تالدىڭ باسىنا بىلتىر سالعان ۇياسىن اداسپاي تاپقان سەكىلدى. جاڭا تىرلىك باستاۋعا باتۋالاسقانداي, ۇيا سالعان اعاشتىڭ ۇستىمەن توبىمەن ۇشىپ-قونادى. سايراۋىق سارى شىمشىق اعاشتىڭ ۇشار باسىنا شىعىپ سايراعاندا توڭىرەكتى جاڭعىرتادى. تابيعات انا كوكتەمنىڭ كەلگەنىنە حابارشى شاپقىزعانداي, ءبىر ۋىس قۇستىڭ داۋىسى, جەردىڭ ءۇستىن سەرگىتىپ, زەڭگىر كوك اسپانعا ءسىڭىپ جاتقانداي. كوكتەن كۇن نۇرىن توگىپ, سامارقاننىڭ كوك تاسى ەرىگەن ناۋرىزدىڭ وسىنداي سۋرەتى ءار جاناردا تۇرىپ قالعانداي, جاننىڭ ءبارى سەرگەك.
ءبىلىم ورداسىنىڭ تاريح جانە ونەر فاكۋلتەتى ونەر كافەدراسىنىڭ اعا وقىتۋشىسى, قازاقستان سۋرەتشىلەر وداعىنىڭ مۇشەسى ءانۋار ساپيەۆ كورمەنىڭ اشىلۋ سالتاناتىندا قىلقالام ۇستاعان ءار تالاپ كوكتەمدى ءوز كوزىمەن كورەتىنىن ايتتى. ۇستاز پىكىرىن شاكىرتتەرى دە ۇشتاي ءتۇستى.
– كوكتەم بار تىرشىلىكتىڭ ءدۇر ەتىپ وياناتىن كەزى. قايىڭ بۇرشىگىنەن, سىلدىراپ اققان قار سۋىنان, جىل قۇسىنىڭ سايراۋىنان تابيعاتتىڭ ءۇر تازالىعىن سەزىنەمىز. جۇرەكتە ويانعان مەيىرىم-شاپاعات, تازا سەزىم, يمان دا ادام جانىنىڭ كوكتەمى ءتارىزدى. سالعان شىعارمادان سونداي ءبىر شىنايىلىق سەزىلىپ تۇرسا, سۋرەتشىنىڭ جەڭىسى دە سول ەمەس پە؟! ءار قىلقالام كوكتەمىن ىزدەيدى, – دەيدى ستۋدەنت ءسانيا مۇسابەكوۆا. ستۋدەنت سۋرەتشىلەر ءوز تىرناقالدى شىعارمالارىندا وسىعان تالپىنىپتى. كورمەدەگى قۇربىنىڭ پورترەتىنەن بويجەتكەننىڭ ادەمى مىنەزىن, ءسابيدىڭ سۋرەتىنەن پەرىشتە كۇلكىسىن, كوبەلەكتىڭ قاناتىنان نازىكتىكتى كورگەندەي بولدىق. جاس تالاپتارعا ريزا بولعان قوستانايدىڭ بەلگىلى سۋرەتشىلەرى نيكولاي تورشەۆ پەن سۆەتلانا شەلۋنوۆا ونەر ورىسىندە ءساتتى قادام تىلەدى.
– ناۋرىزعا ارناعان كورمە – ونەردەگى العاشقى قادامدارىڭ. ناۋرىز, كوكتەم سۋرەتشى ءۇشىن تاۋسىلمايتىن تاقىرىپ, بوياۋلار گامماسى, بوياۋ تىلىندەگى فيلوسوفيا. سۋرەتشىلىك ونەردىڭ ەڭبەكتەن تۇراتىنىن ۇمىتپاڭدار. ەڭبەك عانا شابىت شاقىرادى. كوكتەمدەرىڭ قۇتتى بولسىن! – دەدى سۋرەتشى نيكولاي تورشەۆ.
كورمەگە ستۋدەنتتەردىڭ كەسكىندەمە جانە گرافيكا جانرىنداعى 54 جۇمىسى ءىلىندى. ءار سۋرەت كورەرمەنگە كوكتەم لەبىندەي جىلىلىق سىيلادى.
ءنازيرا جارىمبەتوۆا,
«ەگەمەن قازاقستان».
قوستاناي.