مارتوك اۋدانىنىڭ قىزىلجار اۋىلدىق وكرۋگىنە قاراستى ءۇش ەلدىمەكەنىنە گاز قۇبىرى تارتىلدى. وسىلايشا بورتە, قىزىلجار, شەۆچەنكو اۋىلدارىنىڭ تۇرعىندارى جىلداعىداي كومىر, تامىزىق ساتىپ الۋ بەينەتىنەن ارىلدى. جالپى ۇزىندىعى 74 شاقىرىم بولاتىن كوگىلدىر وتىن قۇبىرىن تارتۋمەن «ەرزات» وندىرىستىك كووپەراتيۆى اينالىستى. وسى جوباعا جەرگىلىكتى بيۋدجەتتەن 1,4 ملرد تەڭگە بولىنگەن ەدى, دەپ حابارلايدى Egemen.kz.
«بورتە, قىزىلجار, شەۆچەنكو اۋىلدارىنىڭ تۇرعىندارى كۇن سۋىتىپ, قىس تۇسكەنشە جۇمىستىڭ اياقتالعانىن ەرەكشە كۇتتى. ەندى كوشەلەردەن قۇبىردى ۇيلەرگە جالعاۋ, گاز جىلىتۋ پەشتەرىنە قوسۋ جانە كوممۋنالدىق قۇجاتتاردى راسىمدەۋ جۇمىستارى باستالادى. تۇرعىندارىمىز دا قاراپ وتىرماي, جاز بويى ۇيلەرىندە دايارلىق جۇمىستارىن جۇرگىزدى. قازىرگى ۋاقىتتا بورتەدە –358, قىزىلجار اۋىلىندا – 383, شەۆچەنكو اۋىلىندا 187 تۇرعىن بار. ەڭ الىسى –بورتە. وسى ەلدىمەكەن رەسەي فەدەراتسياسى ورىنبور وبلىسىمەن شەكارالاسىپ جاتىر», دەيدى قىزىلجار اۋىلدىق وكرۋگىنىڭ اكىمى ارمان احمەتوۆ.
قىسى قىتىمىر مارتوك اۋدانىندا پەش جاعۋ ناۋقانى قازان ايىنان باستالىپ, مامىر تۇسكەنشە سوزىلاتىن. كومىر باعاسى جىلما-جىل قىمباتتاپ تۇرعانىن ەسكەرسەك, اۋىل تۇرعىندارىنا كوگىلدىر وتىنعا قوسىلۋ ءارى قولايلى, ءارى تولەم باعاسى كومىرگە قاراعاندا ارزانىراق.
سوڭعى كەزدە مارتوك اۋدانىنىڭ ەلدىمەكەندەرىن ورتالىقتاندىرىلعان گاز قۇبىرىنا تارتۋ جۇمىستارى جۇيەلى تۇردە ىسكە اسىپ جاتىر. بيىلعى جىلدىڭ وزىندە اۋداننىڭ 16 ەلدىمەكەنىنە ورتالىقتاندىرىلعان گاز قۇبىرى تارتىلسا, الداعى جىلى 12 اۋىل كەزەكتە تۇر.
اقتوبە وبلىسى.