كيىكتىڭ جايىن قازاقتاردان ۇيرەنەدى

ەكولوگيا, قورشاعان ورتانى قورعاۋ جانە كليماتتىڭ وزگەرۋى مينيسترلىگىنە قاراستى ورمان شارۋاشىلىعى, بيوالۋانتۇرلىلىك جانە ەكوتۋريزم سالاسىنداعى ساياساتتى ىسكە اسىرۋ دەپارتامەنتىنىڭ باسشىسى باحروم حولحۋجاەۆ پەن ورمانداردى جانە ەرەكشە قورعالاتىن تابيعي اۋماقتاردى دامىتۋ جانە شولەيتتەنۋگە قارسى كۇرەس باسقارماسىنىڭ باس مامانى سارۆار احمەدوۆ ورال قالاسىنا ارنايى ساپارمەن كەلدى. ولاردى جاڭگىر حان ۋنيۆەرسيتەتىنىڭ عىلىم جونىندەگى پرورەكتورى ءالجان ءشامشىدىن قابىلدادى. وزبەك­ستاندىق دەلەگاتسيانىڭ ماق­ساتى – جاڭگىر حان ۋنيۆەر­سيتەتى عالىمدارىنىڭ تالىم­باقتا كيىك ءوسىرۋ تاجىريبەسىمەن تانىسۋ. ورالدىق عالىمدار بۇل باعىتتا بىرنەشە جىلدان بەرى ناتيجەلى جۇمىس جۇرگىزىپ كەلەدى.

مەيماندار ءبىلىم وردا­سىنىڭ عالىمدارىمەن بىرگە قالا شەتىندەگى «اقبوكەن» تالىم­باعىنا بارىپ, قولعا ۇيرەتىلگەن دالا جانۋارلارىن كوزدەرىمەن كورىپ, ونداعى جۇمىس بارىسىمەن تانىستى.

«وزبەكستان ۇكىمەتى قارا­قالپاقستان رەسپۋبليكاسى اۋماعىندا كيىك سانىن كوبەي­تۋدى ماقسات ەتىپ وتىر. بيىل ارنايى جۇمىس توبى دا قۇ­رىل­دى. ءبىز الدىمەن قارا­قال­پاقستان جەرىندە-گى جەرگى­لىكتى جاعدايدى, ونداعى قورىق­تار مەن تالىمباقتاردىڭ جاي-كۇيىن زەرتتەدىك. وسى العاش­قى ساپارىمىزدا باتىس قا­زاقستان اگرارلىق-تەحنيكا­لىق ۋنيۆەرسيتەتىنىڭ كيىكتى تالىم­باقتا ۇستاۋ تاجىريبە­سىمەن تانىسپاقپىز. بۇيىرسا, قارا­قالپاقستان جەرىندە دە وسىنداي تالىمباق قۇرۋ جوسپارىمىزدا بار», دەدى ب.حولحۋجاەۆ.

وزبەكستاندا بۇعان دەيىن اقبوكەندى قولدان ءوسىرۋ تاجى­ريبەسى بولماعان. بىراق تابيعي جولمەن وزدىگىنەن بارعان شاعىن توبى كەزدەسەدى. سوڭعى مالىمەتكە قاراعاندا, وزبەكستان اۋماعىندا قازىر شامامەن 300-دەي كيىك بار. عالىمدار بۇل جانۋاردىڭ سانىن كوبەيتۋگە دەن قويىپ وتىر.

«وسى باعىتتا قازاقستان تاراپىنان ەكولوگيالىق ءدالىز قۇرۋ تۋرالى ماسەلە كوتەرىلدى. مۇنى دا الداعى ۋاقىتتا جان-جاقتى تالقىلايتىن بولامىز», دەيدى مەيماندار.

جاڭگىر حان ۋنيۆەرسيتەتىنىڭ عىلىم جونىندەگى پرورەكتورى ءالجان سمايىل ۇلىنىڭ ايتۋىن­شا, بۇل جوباعا بۇعان دەيىن ازەربايجان مەن قىتاي ەلىنىڭ ماماندارى دا قىزىعۋشىلىق تانىتقان.

باتىس قازاقستان وبلىسى