ەۋرازيالىق ەكونوميكالىق وداق قۇرامىنا ەنەتىن بەلارۋس ەلىندە اباي قۇنانباەۆتىڭ 170 جىلدىق مەرەيتويىنا بايلانىستى «اباي جالپاق الەمدە سالتانات قۇرۋدا» («اباي شەستۆۋەت پو پلانەتە»: http://sozvuchie.zviazda.by/abaj) دەپ اتالاتىن سايت اشىلدى.
ابايعا ارنالعان سايت دوستاستىق ەلدەرىنىڭ ادەبيەتى مەن كوسەمسوزى «ۇندەستىك» / «سوزۆۋچيە» (www.sozvuchie.zviazda.by) دەپ اتالاتىن پورتالدىڭ باستاپقى بەتىندە ورىن العان. «ۇندەستىك» پورتالىندا دوستاستىق ەلدەردىڭ قازاقستان, ازەربايجان, ارمەنيا, بەلارۋس, قىرعىزستان, مولداۆا, رەسەي, تاجىكستان, تۇركىمەنستان, وزبەكستان, ۋكراينا ادەبيەتى مەن كوسەمسوزى تۋرالى زەرتتەۋلەر مەن ماقالالار جيناقتالعان.
«ۇندەستىك» پورتالىنداعى اباي سايتىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىنىڭ مەڭگەرۋشىسى, قر ۇعا اكادەميگى سەيىت قاسقاباسوۆتىڭ «پۋشكين جانە اباي – رەنەسسانستىق تيپتەگى اقىندار», م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, ف.ع.د., پروفەسسور شەريازدان ەلەۋكەنوۆتىڭ «پۋشكين جانە ابايدىڭ ەپيستوليارلىق رومانى», م.و.اۋەزوۆ اتىنداعى ادەبيەت جانە ونەر ينستيتۋتى سىرتقى ادەبي بايلانىستار جانە اناليتيكا ءبولىمىنىڭ مەڭگەرۋشىسى, ف.ع.ك., دوتسەنت سۆەتلانا انانەۆانىڭ « ۇلى اباي», م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, پروفەسسور سەرىكققازى قورابايدىڭ «ابايدىڭ جولىن قۋعان ۇرپاقتارى», م.و.اۋەزوۆ اتىنداعى ادەبيەت جانە ونەر ينستيتۋتى بەينەلەۋ ونەرى ءبولىمىنىڭ مەڭگەرۋشىسى, ءو.ع.د., پروفەسسور رايحان ەرعاليەۆانىڭ «قازاقستانداعى بەينەلەۋ ونەرىندەگى اباي جانە ونىڭ كەيىپكەرلەرى», م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, ءو.ع.ك. ديليارا ءشارىپوۆانىڭ «تاشكەنتتەگى اباي ەسكەرتكىشى», ادەبيەت زەرتتەۋشىسى ليۋبوۆ شاشكوۆانىڭ «جازۋشىلاردىڭ بەلارۋس جەرىندەگى كەزدەسۋى», م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, ف.ع.ك. اينۇر ماشاقوۆانىڭ «اباي قۇنانباەۆ شىعارماشىلىعىنىڭ الىس شەتەلدەگى رەتسەپتسياسى», ف.ع.ك., دوتسەنت الما ءتۇسىپوۆانىڭ «اباي مەن ا.فەت پوەزياسىنداعى ۋاقىتتىڭ اينالىمى» اتتى ماقالالارى بەرىلگەن. بۇعان دەيىن اباي مۇراسى شەت ەلدەردە اۋدارىلىپ, ناسيحاتتالىپ, تانىلىپ كەلگەنىمەن, شەت ەلدىك پورتالدا, اتاپ ايتقاندا, بەلارۋس رەسپۋبليكاسىندا جەكە سايت اشىلىپ جالپاق الەمدە سالتانات قۇرۋى العاش رەت.
اباي سايتىندا تەك قازاقستاندىق عالىمداردىڭ كولەمدى ماقالالارى عانا ەمەس, سونىمەن قاتار بەلارۋس عالىمدارى الەس كارليۋكەۆيچ پەن ميكولا مەتليتسكيدىڭ «اقىندى ۇناتۋ ارقىلى ونىڭ حالقىن دا ۇناتاسىڭ» دەپ اتالاتىن ماقالالارى قازاق اقىنىنىڭ ولەڭدەرىن جوعارى باعالاپ بەلارۋس ەلىنە پاش ەتەدى.
2008-2012 جىلدارى قازاقستان رەسپۋبليكاسىنىڭ بەلارۋس رەسپۋبليكاسىنداعى توتەنشە جانە وكىلەتتى ەلشىسى بولعان اناتولي ۆلاديميروۆيچ سميرنوۆتىڭ بەلارۋس تىلىندە «ويشىل, اعارتۋشى, گۋمانيست» اتتى ماقالاسى مەن رەگنادا مالاحوۆسكايانىڭ بەلارۋس تىلىنە اۋدارعان ابايدىڭ ولەڭى بەرىلگەن.
بەلارۋس ەلىندەگى پورتال ارقىلى دوستاستىق ەلدەرىنىڭ باۋىرلاستىعى مەن ىنتىماقتاستىعىن كورە الامىز. «ۇندەستىك» پورتالى حالىقتاردىڭ دوستىعى مەن ولاردىڭ مادەنيەتىن جاقىنداستىرىپ وتىرعان التىن كوپىر ىسپەتتى. مۇندا قازاقستاندىق ادەبيەتتانۋشىلاردىڭ ماقالالارى بەلارۋس تىلىنە اۋدارىلىپ كەلەدى. اتاپ ايتقاندا, قر بعم عك م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى, قر ۇعا كوررەسپوندەنت-مۇشەسى ءۋاليحان قاليجانوۆتىڭ «قازاقستان حالقىنىڭ مادەني كودى», ف.ع.د., پروفەسسور شەريازدان ەلەۋكەنوۆتىڭ «جاڭا قازاقستاننىڭ جاڭا ادەبيەتى», ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى, ف.ع.د., پروفەسسور بەيبىت مامراەۆ پەن م.و.اۋەزوۆ اتىنداعى ادەبيەت جانە ونەر ينستيتۋتىنىڭ ءبولىم مەڭگەرۋشىسى, ف.ع.ك., دوتسەنت سۆەتلانا انانەۆانىڭ «كىتاپ – رۋحاني مادەنيەتتىڭ ىرگەتاسى», «كازاحستانسكايا پراۆدا» گازەتىنىڭ ءتىلشىسى اننا نەگينانىڭ «الەمدىك ادەبي ۇدەرىستەگى قازاقستاندىق قۇرامداس بولىگى», م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى ديليارا ءشارىپوۆانىڭ «تاشكەنتتەگى اباي ەسكەرتكىشى», «پروستور» جۋرنالى مادەنيەت ءبولىمىنىڭ مەڭگەرۋشىسى, اقىن ليۋبوۆ شاشكوۆانىڭ «بەلارۋس جەرىندەگى جازۋشىلار كەزدەسۋى» مەن پوەتيكالىق شىعارمالارى, «پروستور» جۋرنالىنىڭ باس رەداكتورى, اقىن ۆالەري ميحايلوۆتىڭ سۇحباتتارى, ف.ع.د., پروفەسسور نەمات كەلىمبەتوۆتىڭ «ءۇمىتىمدى ۇزگىم كەلمەيدى», اقىن نۇرلان ءورازاليننىڭ بەلارۋس تىلىنە اۋدارىلعان ولەڭدەرى, قازۇپۋ-ءنىڭ پروفەسسورى, ف.ع.د. ۆەرا ساۆەلەۆانىڭ «ءبىزدىڭ قازىرگى رومانىمىز جانرلىق ميكس جانە كوممەرتسيالىق ەمەس جوبا» سياقتى قوماقتى ماقالالارى قازاقستاندىق عىلىم مەن مادەنيەتتەن مول ماعلۇمات بەرەدى.
سونىمەن قاتار, بەلارۋس ەلىندەگى تمد ەلدەرىنىڭ ادەبيەتىن تانىستىرۋعا ارنالعان «جۇرەكتەردىڭ ۇندەسۋى» («سوزۆۋچيە سەردەتس») دەپ اتالاتىن كىتاپ جوباسى قالىڭ وقىرمانداردى تاۋەلسىز مەملەكەتتەر دوستىعى ەلدەرىنىڭ كورنەكتى اقىن-جازۋشىلارىنىڭ ەڭ ۇزدىك شىعارمالارىمەن تانىستىرۋدى كوزدەيدى. بۇل جوبا بەلارۋس رەسپۋبليكاسى اقپارات مينيسترلىگىنىڭ باستاماسىمەن «زۆيازدا» باسپا ءۇيىنىڭ ديرەكتورى الەس كارليۋكەۆيچ پەن بەلارۋس اقىنى الەس باداكتىڭ وراسان زور ەڭبەگىنىڭ ارقاسىندا جۇزەگە اسىپ كەلەدى. الەس باداكتىڭ قۇراستىرۋىمەن شىققان «جۇرەكتەر ۇندەسۋى» سەرياسىنىڭ 4-ءشى كىتابىنا «شەكاراسىز دوستىق» («نە ۆەدايا گرانيتس») دەپ اتالاتىن جيناققا بەلارۋس پەن قازاقستان اقىن-جازۋشىلارىنىڭ ولەڭدەرى مەن اڭگىمەلەرى ەندى. بۇل جيناقتا م.اۋەزوۆ, و.سۇلەيمەنوۆ, فاريزا وڭعارسىنوۆا, ءابىش كەكىلباەۆ, مۇقاعالي ماقاتاەۆ, قادىر مىرزاليەۆ, قاليحان ىسقاقوۆ, ۆالەري ميحايلوۆ, ليۋبوۆ شاشكوۆا, ورالحان بوقەەۆ, نازىكەن الپامىسقىزى, نۇرلان ءورازاليننىڭ شىعارمالارى جاريالانعان.
اينۇر قالياسقاروۆا,
م.و.اۋەزوۆ اتىنداعى ادەبيەت جانە ونەر
ينستيتۋتىنىڭ عىلىمي قىزمەتكەرى.