الماتى قالاسىنان باستاۋ الاتىن ءۇش تۋريستىك پويىز باعىتى ىسكە قوسىلادى. باعىتتاردىڭ ۇزاقتىعى بەس-جەتى كۇنگە سوزىلادى. تۋروپەراتورلار جولاۋشىلارعا ەكسكۋرسيالىق باعدارلاما, زاماناۋي ۆاگونداردا جايلى ورنالاستىرۋ, ءىشىنارا تاماقتانۋ مەن كولىك قىزمەتتەرىن قامتيتىن پاكەتتەردى ۇسىنىپ وتىر, دەپ جازادى Egemen.kz.
العاشقى باعىتتى Khan-Turan Travel كومپانياسى 21 قىركۇيەكتەن باستاپ جۇزەگە اسىرادى. بۇل پويىز الماتى – تۇركىستان – تاشكەنت – سامارقاند – بۇقارا قالالارىن قامتيدى. جولاۋشىلار ءۇشىن تاراز جانە شىمكەنت ستانسالارىندا قوسىلۋ نەمەسە ءتۇسۋ مۇمكىندىگى قاراستىرىلعان.
ەكىنشى باعىتتى Turan Kazakhstan Travel 26 قىركۇيەكتە جولعا شىعارادى. ول سامارقاند, بۇقارا, تاشكەنت جانە تۇركىستان قالالارىن ارالاپ, الماتىعا قايتا ورالادى.
ءۇشىنشى باعىتتى Skyway كومپانياسى 30 قىركۇيەكتە ىسكە قوسادى. پويىز الماتىدان شىعىپ, تۇركىستان, سامارقاند, بۇقارا جانە تاشكەنت ارقىلى ءوتىپ, باستاپقى نۇكتەسىنە قايتادى.
ۇيىمداستىرۋشىلاردىڭ حابارلاۋىنشا, جاڭا باعىتتاردىڭ اشىلۋى قازاقستان مەن وزبەكستان اراسىنداعى ورتاق تاريحي-مادەني مۇرانى كەڭىنەن تانىتۋعا جانە وڭىرلىك ءتۋريزمدى دامىتۋعا زور ىقپال ەتەدى.