ءۇش جۇزدەن ءان وزدىرعان سال مۇحيتتىڭ تۋعان جەرى – قاراتوبەگە بارعان ادامدى اۋىلدىڭ كىرەبەرىسىندە الىپ دومبىرا ءمۇسىنى مەن «قۇت دارىپ, كيە قونعان قاراتوبەم» دەگەن ولەڭ جولى قارسى الادى.
تۋعان جەرگە دەگەن پەرزەنتتىك جۇرەكتەن شىققان بۇل ولەڭنىڭ اۆتورى – جەرگىلىكتى اقىن جاندوس امىرعاليەۆ بولسا, باسىنا قاراعاندا تاقياڭ تۇسەتىن دومبىرا ءمۇسىنىن جانە ولەڭ جولىن تەمىردەن دانەكەرلەپ جاساعان – تاعى ءبىر قاراتوبەلىك ازامات جاندوس ايتاليەۆ ەكەن.
- «قاراتوبەگە بارساڭ, ءانشىمىن دەمە» دەگەن ءسوز بار ءبىزدىڭ جاقتا. ايگىلى مۇحيت ءانشى مەرالى ۇلىنىڭ, عاريفوللا قۇرمانعاليەۆتىڭ, كەشەگى ەسكەندىر حاسانعاليەۆ اعامىزدىڭ وسى قاراتوبەدە تۋعانىن مەڭزەپ ايتىلعان اڭگىمە عوي. قازاقتىڭ ءان الەمىندە «مۇحيت مەكتەبى» دەگەن اتاۋدى قالدىرعان اتامىزدىڭ قۇرمەتىنە وسى دومبىرانى ءوز قولىممەن, ءوز قاراجاتىما جاساپ, 2016 جىلى ورناتىپ ەدىم. 2017 جىلى استاناداعى بايتەرەك كەشەنىنىڭ شاعىنداۋ مودەلىن قاراتوبە اۋدانى ورتالىعىندا تۇرعىزدىم. وسىنىڭ ءبارىن تۋعان جەرىمە دەگەن ماحاببات جاساتتى, - دەيدى جاندوس قادىرشە ۇلى.
قارا تەمىردى بالقىتىپ, ءبىر-بىرىنە جالعايتىن ماماندىق يەسى جاندوس ايتاليەۆ 1976 جىلى قاراتوبە اۋدانىنىڭ اققوزى اۋىلىندا دۇنيەگە كەلىپتى. ءوز اۋىلىندا ورتا مەكتەپتى بىتىرگەن سوڭ ورال قالاسىنداعى قۇرىلىس تەحنيكۋمىندا وقىدى. بىراق توقسانىنشى جىلداردىڭ سوڭىنداعى داعدارىس تالاي جاندى تەنتىرەتىپ جىبەردى عوي. ءبىزدىڭ كەيىپكەرىمىز دە ءتۇرلى سالادا قىزمەت ەتتى. ءبىراز ۋاقىت مۇناي اينالاسىنداعى «Saipem» كومپانياسىندا ناپاقا تاپتى.
- دانەكەرلەۋشى دەگەن ماماندىقتىڭ ماڭىزى زور ەكەنىن ەڭ العاش سول جەردە كوردىم, - دەپ ەسكە الادى جاندوس. وعان دەيىن دە ەلەكترمەن پىسىرەتىن اپپاراتتى الىپ جىبەرىپ, تۇرمىسقا, تىرشىلىككە قاجەت جۇمىسىن ءوزى تىندىرا بەرەتىن اۋىل بالاسى شەتەلدىك كومپانياداعى تالاپتى جانە ارىپتەستەرىنىڭ شەبەرلىگىن كورىپ, تاڭداي قاعىپتى. ايتپەگەندە شە, ءوز كاسىبىن شەبەر مەڭگەرگەن ناعىز ماماننىڭ ءار قيمىلى اسەرلى بولادى ەكەن, ەلەكترودتى الىپ تۇرىپ, تاسقاراڭعى اينەكتىڭ ارتىنان ءار شوقىعانى شەدەۆر بولىپ تۇسكەندە تاڭعالماسقا شارا جوق قوي.
جاندوس دانەكەرلەۋشى ماماندىعىنىڭ ناعىز شىعارماشىلىق جۇمىس ەكەنىن, مايتالمان ماماننىڭ ماشىعى ىقىلاستى ىجداعاتپەن جانە تالاي جىلعى تاجىريبەمەن كەلەتىنىن ءتۇسىندى. ءسويتىپ, «ەنەرگەتيك» وقۋ ورتالىعىنا جازىلىپ, بۇل ونەردىڭ تەورياسىنا بويلادى. ول كۋرستى تامامداعان سوڭ KCG كومپانياسىنا جۇمىسقا تۇردى. بۇل جەردە دە جاندوسقا تاعىلىمدى ۇستاز, تاجىريبەلى تالىمگەر كەزدەستى.
«ماعان وسى ونەردى ۇيرەتكەن مۇراتبەك قايىرساپا ۇلى مۇحامبەديەۆ پەن ەرنياز ەرالى ۇلى ۇدىرەەۆتەردى ولگەنشە ۇمىتپايمىن. مەن ولاردان دانەكەرلەۋ تەحنيكاسىن, ءادىس-ءتاسىلىن عانا ەمەس, ماماندىققا دەگەن ماحابباتتى, جاۋاپكەرشىلىكتى دە ۇيرەندىم» دەيدى جاندوس.
ادام ءبىر كاسىپتى تەرەڭ مەڭگەرگەن سايىن اينالاسىنا قاجەت ادامعا اينالادى ەكەن. اۋەلى اينالاسىنا ەسىك-تەرەزە, قاقپا جاساپ, تاجىريبە جيناعان جاندوس 2015 جىلى «Yasin stroy kz» دەگەن ءوز فيرماسىن تىركەدى. ياسين دەگەنى – تۇڭعىش ۇلىنىڭ ەسىمى عوي. باستاپقىدا كەز-كەلگەن تاپسىرىسقا جارماستى. ويتكەنى ءوز اتىڭدى دالەلدەۋ, مويىنداتۋ, حالىق سەنىمىنە يە بولۋ وڭاي ەمەس. بىرتە-بىرتە كەيىپكەرىمىز ۇلكەن جوبالارعا قول سوزدى. قۇرىلىستا سەندۆيچ-پانەل دەپ اتالاتىن تەحنولوگيا سالاسىن مەڭگەردى. باسىندا باتىس قازاقستان وبلىسى اۋماعىندا جۇرسە, كەيىن كورشىلەس اقتوبە, اتىراۋ وبلىستارىنان دا تاپسىرىس تۇسە باستادى. مىنە, بۇگىندە ءۇش قاباتتى ساۋدا ۇيلەرىن, كۇردەلى عيماراتتاردى قينالماي تۇرعىزا بەرەتىن قابىرعالى مەكەمەگە اينالدى.
- ء«ىس تەتىگىن مامان شەشەدى» دەگەن ءسوز بۇرىننان بار عوي. بىراق ءاربىر ماقالدىڭ ءمانىن ءوز باسىڭنان وتكەرگەندە انىق تۇيسىنەدى ەكەنسىڭ. قازىر مەنىڭ جانىمدا وزىممەن بىرگە سىنالعان 6-7 ازامات بار. ءبىز بىرگە ۇيرەندىك, بىرگە وستىك. قازىر مەن كەز-كەلگەن تاپسىرىس الىپ, كەز كەلگەن كۇردەلى عيماراتتى تۇرعىزا الاتىنىما ابدەن سەنەمىن. ويتكەنى ءبىزدىڭ ۇجىم, ءبىزدىڭ كوماندا – جۇدىرىقتاي جۇمىلعان, بەساسپاپ ماماندار. مەن جىگىتتەرىمە سەنەمىن, - دەيدى جاندوس.
اڭگىمەنىڭ باسىن جاندوستىڭ قايىرىمدىلىق ىسىمەن باستاپ ەدىك قوي. كەيىپكەرىمىزدىڭ تۋعان جەرگە دەگەن ماحابباتىن بىلتىر – 2024 جىلعى كوكتەمگى سۋ تاسقىنى كەزىندە دە كوردىك. باتىس قازاقستان وبلىسىندا بىلتىر تابيعات اپاتىنان ەڭ الدىمەن زارداپ شەككەن – ءدال وسى اققوزى اۋىلى بولاتىن. سول كەزدەرى جاندوستىڭ جارعاق قۇلاعى جاستىققا تيمەدى. ۋاتساپ جەلىسىنەن اۋىلداستارىنا كومەك قولىن سوزاتىن توپ قۇرىپ, جەدەل قاراجات پەن كەرەكتى زاتتاردى جيناۋدى جولعا قويىپ, ورال قالاسىنان تۋعان اۋىلىنا بىرنەشە مارتە قايىرىمدىلىق كەرۋەنىن ۇيىمداستىرعانىنا كۋامىز. «جاندوستىڭ تۋعان جەرىنە دەگەن ماحابباتى – ءوزى ءپىسىرىپ بەكىتكەن تەمىردىڭ جىگىندەي» دەۋگە بولاتىنداي. مۇمكىن ودان دا بەرىك شىعار.
باتىس قازاقستان وبلىسى