بۇگىن شامامەن ساعات 10:30-دا تولەپوۆ پەن جيلستروەۆسكايا كوشەلەرىنىڭ قيىلىسىندا جۇك كولىگى مەن جەڭىل اۆتوكولىك سوقتىعىسقان. اپات سالدارىنان 25 جاستاعى جۇرگىزۋشى قازا تاپتى, دەپ حابارلايدى Egemen.kz.
الدىن الا مالىمەتتەر بويىنشا, Shacman ماركالى جۇك كولىگىنىڭ جۇرگىزۋشىسى ەكىنشى جولمەن كەلە جاتىپ, باسىمدىققا يە Lada Granta كولىگىنە جول بەرمەگەن. سونىڭ سالدارىنان ەكى كولىك قاتتى سوقتىعىسقان.
جول اپاتىنىڭ سالدارىنان Lada Granta كولىگىن تىزگىندەگەن 25 جاستاعى جۇرگىزۋشى وقيعا ورنىندا كوز جۇمعان. ال كولىكتەگى جولاۋشى ءتۇرلى جاراقاتتارمەن اۋرۋحاناعا جەتكىزىلگەن.
قايتىس بولعان ازاماتتىڭ قاۋىپسىزدىك اگەنتتىگىندە قىزمەت اتقارعانى بەلگىلى بولدى. قازىرگى تاڭدا اتالعان فاكتى بويىنشا قىلمىستىق ءىس قوزعالىپ, ءتيىستى سوت-مەديتسينالىق ساراپتامالار تاعايىندالىپ جاتىر.