3 شىلدە كۇنى گەرمانيانىڭ باۆاريا ايماعىندا بالعامەن قارۋلانعان ەر ادام پويىز جولاۋشىلارىنا شابۋىل جاساعان. سالدارىنان ءتورت ادام جەڭىل جاراقات العان, دەپ حابارلايدى Egemen.kz DW اگەنتتىگىنە سىلتەمە جاساپ.
باۆاريا ىشكى ىستەر ءمينيسترى يواحيم حەررماننىڭ ايتۋىنشا, كۇدىكتى 20 جاستاعى سيريا ازاماتى. ول اۆستريادا بوسقىن مارتەبەسىمەن تۇرعان. ونىڭ قولىندا بالعا مەن بالتا بولعان, بىراق جولاۋشىلارعا تەك بالعامەن شابۋىل جاساعان. وقيعا كەزىندە پويىزدا شامامەن 500 ادام بولعان.
وقيعا شتراۋبينگ قالاسىنا جاقىن ماڭدا, شتراسكيرحەن ەلدىمەكەنىنىڭ تۇسىندا ورىن العان. جابىرلەنۋشىلەردىڭ ۇشەۋى دە سيريا ازاماتتارى ەكەنى انىقتالعان. مينيستر حەررماننىڭ ايتۋىنشا, كۇدىكتى شابۋىلعا دەيىن ولارمەن سويلەسكەن جانە ولاردىڭ دا سيريالىق ەكەنىن بىلگەن بولۋى مۇمكىن. ءتورتىنشى جابىرلەنۋشىنىڭ ازاماتتىعى ءالى ناقتىلانباعان.
كۇدىكتىنىڭ ءوزى اۋىر جاراقات الىپ, پوليتسياعا تاپسىرىلعاننان كەيىن تىكۇشاقپەن رەگەنسبۋرگ قالاسىنداعى اۋرۋحاناعا جەتكىزىلگەن.
Bild باسىلىمىنىڭ حابارلاۋىنشا, شابۋىلداۋشىنى پويىز جولاۋشىلارىنىڭ ءبىرى قارۋىن تارتىپ الىپ, سوققى جاساپ توقتاتقان.
باۆاريا پوليتسياسى اتالعان وقيعا بويىنشا تەرگەۋ جۇرگىزىپ جاتىر. بۇعان دەيىن ول باۆاريا پوليتسياسىنىڭ دەرەكتەر بازاسىندا تىركەلمەگەن.