جاقىندا الماتىدا Disney مەن Pixar ستۋديالارىنىڭ «ەليو» اتتى جاڭا ءفيلمىنىڭ قازاق تىلىندەگى تۇساۋكەسەر كورسەتىلىمى ءوتتى. فيلمدەردى ءتۇرلى ەلدەرگە بەيىمدەپ, دۋبلياجداۋ – Disney كومپانياسىندا بۇرىننان قالىپتاسقان ءۇردىس. Disney جىل سايىن ءار ءفيلمنىڭ ءتۇرلى تىلدەردەگى 40-عا جۋىق نۇسقاسىن دايىندايدى, دەپ حابارلايدى Egemen.kz.
فيلم كورەرمەندى ەرەكشە تىلسىم الەمگە جەتەلەيدى. باستى كەيىپكەر – قيالى ۇشقىر ەليو. ول كەزدەيسوق جەردىڭ وكىلى رەتىندە بۇكىل عالامنىڭ تىرشىلىك يەلەرى جينالعان پلانەتارلىق ۇيىمعا تاپ بولادى. ەندى ول ادامزات اتىنان سويلەيتىن جالعىز وكىل. ەليو بۇكىل گالاكتيكاعا قاۋىپ ءتوندىرىپ تۇرعان داعدارىستى قالاي رەتتەمەك؟ مىنە, ۇسىنىلىپ وتىرعان عىلىمي-فانتاستيكالىق فيلم عارىشتاعى قىزىقتى وقيعالاردى شىم-شىتىرىق ەپيزودتارمەن تارقاتىپ, كىشكەنتاي كورەرمەننىڭ قيالىن بيىككە ەركىن سامعاتادى. بۇل تەك شىتىرمان وقيعا ەمەس, ءار بالاعا ءوزىن تانۋ مەن دامۋ جولىن كورسەتەتىن نۇسقاۋلىق دەۋگە دە بولادى.
وسى باستاما اياسىندا Disney ستۋدياسى 2024 جىلى «ويجۇمباق 2», «موانا 2», «مۋفاسا. ارىستان پاتشا», بيىل «اقشاقار», «ليلو مەن ستيچ» دەپ اتالاتىن فيلمدەرىن قازاق تىلىنە اۋدارىپ, دۋبلياج جۇمىسىن قارجىلاندىردى. قازاق ءتىلىنىڭ ءىرى حالىقارالىق ستۋديالار ءوز قاراجاتىمەن قولدايتىن تىلدەردىڭ قاتارىنا قوسىلۋى – ءتىلىمىزدىڭ دامۋى ءۇشىن وتە ماڭىزدى وقيعا. كورەرمەنگە جول تارتقان «ەليو» تۋىندىسى دا وسى حالىقارالىق يگى باستامانىڭ تىزبەكتى ءبىر تاراۋى.
كورسەتىلىمگە ەلىمىزگە تانىمال تۇلعالار, قوعام قايراتكەرلەرى, كاسىپكەرلەر مەن دەپۋتاتتار, دۋبلياج اكتەرلارى مەن بلوگەرلەر, باق وكىلدەرى قاتىستى.
الماتى