«بايتەرەك» ۇلتتىق باسقارۋشى حولدينگى جۇزەگە اسىراتىن «نۇرلى جول» باعدارلاماسى اياسىندا قىزىلوردا تۇرعىندارىنا 300 پاتەردىڭ كىلتى تابىستالدى
قاسيەتتى سىر ەلىنىڭ حالقىنا تۋ كورسەتكىشتەرى بويىنشا ەلىمىزدەگى ءۇشىنشى ورىن تيەسىلى. ارينە, تۇرعىندار سانى كوپ بولعاندىقتان, وڭىردە تۇرعىن ۇيمەن قامتاماسىز ەتۋ ماسەلەسى كۇن تارتىبىنەن تۇسپەيدى.
دەگەنمەن, ايماق باسشىلىعى دا بۇل ماسەلەگە قول قۋسىرىپ قاراپ وتىرمايدى. جىل سايىن قۇرىلىس جۇمىستارىنىڭ كولەمى ۇلعايىپ, مىڭداعان وتباسى قونىس تويىن تويلاۋدا. رەسپۋبليكالىق جانە جەرگىلىكتى بيۋدجەتتەن قاراجات ءبولىنىپ, دەمەۋشىلەر تاراپىنان دا ينۆەستيتسيالار بارىنشا تارتىلادى. تۇرعىن ءۇي سالۋ بارىسىندا, اسىرەسە, «بايتەرەك» ۇلتتىق باسقارۋشى حولدينگى» اكتسيونەرلىك قوعامىنىڭ ۇلەسى زور.
حولدينگ قازىرگى تاڭدا قازاقستاننىڭ بارلىق وڭىرلەرىندە حالىقتىڭ قالىڭ توپتارىن باسپانامەن قامتاماسىز ەتۋ ماقساتىندا «نۇرلى جول» مەملەكەتتىك باعدارلاماسىن جۇزەگە اسىرۋ بويىنشا جۇيەلى جۇمىس اتقارۋدا. باعدارلاما ىسكە اسىرىلعاننان بەرى وبلىستاردىڭ جانە قالالاردىڭ تۇرعىندارى كوپتەن بەرى ارمانداعان پاتەرلەرىن الىپ جاتىر. «بايتەرەك» حولدينگى جالعا بەرىلەتىن الەۋمەتتىك تۇرعىن ءۇيدىڭ قۇرىلىسىن جوعارى قارقىنمەن جۇزەگە اسىرۋدا.
وسى جۇمىس شەڭبەرىندە بۇگىن قىزىلوردا قالاسىندا «قازاقستاننىڭ تۇرعىن ءۇي قۇرىلىس جيناق بانكى» اق («بايتەرەك» باسقارۋشى حولدينگىنىڭ ەنشىلەس ۇيىمى) سالىمشىلارى «وڭىرلەردى دامىتۋدىڭ 2020 جىلعا دەيىنگى باعدارلاماسى» اياسىندا قونىس تويىن تويلاماق.
جاقىندا قىزىلوردا قالاسىنىڭ «يپپودروم» شاعىن اۋدانىندا سالتاناتتى ءىس-شارا ۇيىمداستىرىلىپ, 300 وتباسىعا جاڭا پاتەر كىلتتەرى بەرىلدى. قاسيەتتى رامازان ايىنىڭ باستالۋىمەن تۇسپا-تۇس كەلگەن پاتەر بەرۋ ءراسىمى اۋقىمدى مەرەكەگە ۇلاستى. قونىس توي يەلەرىنە كىلتتەرىن قىزىلوردا وبلىسىنىڭ اكىمى قىرىمبەك كوشەرباەۆ پەن «بايتەرەك» ۇلتتىق باسقارۋشى حولدينگى» اق باسقارما توراعاسى قۋاندىق بيشىمباەۆ تابىستادى.
قىزىلوردانىڭ «يپپودروم» شاعىن اۋدانىندا 50 پاتەرلى التى تۇرعىن ءۇي پايدالانۋعا تاپسىرىلدى, پاتەرلەردىڭ جالپى سانى – 300. جالپى اۋدانى 19 722 شارشى مەتردى قۇرايدى. تۇرعىن ءۇيدىڭ قۇنى – 1 775 ملن. تەڭگە.
اتالعان 300 پاتەردىڭ ىشىنەن 225 پاتەر «حالىقتىڭ بارلىق ساناتتارىنا ارنالعان تۇرعىن ءۇي» باعىتى بويىنشا ۇلەستىرىلسە, قالعان 75 پاتەر جەرگىلىكتى اتقارۋشى ورگانداردا كەزەكتە تۇرعاندارعا بەرىلەتىن بولادى. قونىس توي يەلەرىن وبلىس اكىمى قىرىمبەك كوشەرباەۆ قۇتتىقتادى.
– 2015 جىلى بۇكىل الەمدى شارپىپ وتىرعان ەكونوميكالىق داعدارىسقا قاراماستان ەلىمىزدە «نۇرلى جول» مەملەكەتتىك باعدارلاماسى اياسىندا تۇرعىن ءۇي قۇرىلىسى ءوز جالعاسىن تابۋدا. بۇل باعدارلاما حالىقتىڭ, اسىرەسە, از قامتىلعان جانە جاس وتباسىلاردىڭ باسپاناعا دەگەن سۇرانىسىن قامتاماسىز ەتۋدىڭ بىردەن-ءبىر جولى بولىپ تابىلادى. بۇگىن, مىنە, جاڭا پاتەر يەلەرى «نۇرلى جول» باعدارلاماسىنىڭ العاشقى جەمىسىن كورىپ وتىر. قۋانىشتارىڭىز قۇتتى بولسىن! – دەپ ءوڭىر باسشىسى تۇرعىن ۇيلەردى سالۋعا ىقپال ەتكەن «بايتەرەك» حولدينگى مەن قازاقستان يپوتەكالىق كومپانياسىنىڭ باسشىلىعىنا العىس ءبىلدىردى.
«بايتەرەك» ۇلتتىق باسقارۋشى حولدينگىنىڭ باسقارما توراعاسى قۋاندىق بيشىمباەۆ تا پاتەر يەلەرىنە ىزگى تىلەگىن ءبىلدىردى.
– بۇگىن 300 پاتەردىڭ كىلتىن تابىستاپ وتىرساق, «نۇرلى جول» باعدارلاماسى اياسىندا جىل سوڭىنا دەيىن تاعى مىڭداعان پاتەر پايدالانۋعا بەرىلەدى دەپ جوسپارلاپ وتىرمىز. مىنە, قازىر تاعى جاڭا تۇرعىن ءۇيدىڭ قۇرىلىسىن باستاماقپىز. بۇل كەزەكتە تۇرعان ازاماتتار جاقىن ارادا قونىس تويىن تويلايدى دەگەن ءسوز, – دەدى ق.بيشىمباەۆ.
ايتا كەتەيىك, وتكەن جىلى قىزىلوردا وبلىسىندا «قولجەتىمدى باسپانا» جانە «جۇمىسپەن قامتۋدىڭ جول كارتاسى» باعدارلامالارى اياسىندا 38 مىڭ شارشى مەتردى قۇرايتىن 466 پاتەر پايدالانۋعا بەرىلگەن بولاتىن. ال بيىل جىل سوڭىنا دەيىن وبلىستا رەسپۋبليكالىق, جەرگىلىكتى بيۋدجەتتەردەن بولىنگەن قاراجاتتارعا جانە «قازاقستاننىڭ يپوتەكالىق كومپانياسى» اق جانە «سامۇرىق-قازىنا» جىلجىمايتىن م ۇلىك قورى ەسەبىنەن 158,7 مىڭ شارشى مەتردى قۇرايتىن 2440 پاتەر پايدالانۋعا بەرىلەدى دەپ جوسپارلانۋدا. بۇل كورسەتكىش وتكەن جىلدارمەن سالىستىرعاندا 4 ەسەگە ارتىق.
كوپتەن بەرى ارمانداعان پاتەرلەرىن العان تۇرعىنداردىڭ قۋانىشىندا شەك جوق. جاس مۇعالىم گۇلزيرا ابىلداەۆا 5 جىلدان بەرى قاراجات جيناپ, ەكى بولمەلى پاتەر الدى. قىزىمەن بىرگە تۇراتىن ۇستاز ارمانىن جۇزەگە اسىرعان باسشىلارعا زور العىسىن ءبىلدىرىپ, بارشا قونىس توي يەلەرىنە زور دەنساۋلىق پەن وتباسىلارىنا اماندىق تىلەدى.
كىتاپحاناشى بايان ساعيداتوۆا دا ەكى بولمەلى پاتەرگە قول جەتكىزىپ وتىر. ەكى بالانىڭ اناسى 2007 جىلدان باستاپ اقشا جينادى, ال, مىنە, بۇگىن كەڭ ءارى جايلى باسپانا الدى. قاراپايىم وتباسىلارعا قولجەتىمدى تۇرعىن ءۇي ساتىپ الۋعا مۇمكىندىك بەرگەن «بايتەرەك» حولدينگىنىڭ باسشىلىعىنا العىسى زور.
تۇرعىندار اتىنان ءسوز سويلەگەن زەينەتكەر انا دۇيسەنكۇل ەرجانوۆا ەلباسىنا جانە «نۇرلى جول» باعدارلاماسىن جۇزەگە اسىرىپ جاتقان ۇيىم باسشىلارىنا العىس ايتتى.
پاتەر كىلتتەرىن تابىستاۋ راسىمىنەن كەيىن وبلىس اكىمى مەن «بايتەرەك» حولدينگىنىڭ باسشىسى قىزىلوردانىڭ «اراي» شاعىن اۋدانىندا سالىنىپ جاتقان بەس قاباتتى تۇرعىن ءۇيدىڭ قۇرىلىس الاڭىنا بارىپ قايتتى. جوبانى حولدينگتىڭ ەنشىلەس ۇيىمى – «قازاقستان يپوتەكالىق كومپانياسى» اق (قيك) جۇزەگە اسىرىپ جاتىر. نىساندى سالۋ بيىلعى اقپان ايىندا باستالدى. قۇرىلىسى قىركۇيەكتە اياقتالادى دەپ كۇتىلۋدە. پاتەر سانى – 280, جالپى اۋدانى 17219,78 شارشى مەتردى قۇرايدى. قازىر قۇرىلىس الاڭىندا 288 ادام جۇمىس ىستەۋدە.
– مەملەكەتتىك باعدارلاما اياسىندا سالىنىپ جاتقان تۇرعىن ۇيلەردىڭ باعاسى دا قولجەتىمدى, ساپاسى دا بارلىق تالاپتارعا ساي. بۇل جوبانىڭ باستى تيىمدىلىگى – پايىزدىق مولشەرلەمە مەن العاشقى سالىمى الىنبايدى. پاتەردىڭ ءبىر شارشى مەترىنىڭ قۇنى 600 اقش دوللارى بولسا, اۋماعى 40 شارشى مەتردى قۇرايتىن باسپانا ءۇشىن ايىنا 20-27 مىڭ تەڭگە تولەيسىز. ورتاشا ايلىقتارى بار وتباسىندا ەكى ادام جۇمىس ىستەسە, بۇل سومانى ەش قينالماي تولەي الادى, – دەدى قۋاندىق ءۋاليحان ۇلى جۋرناليستەرگە بەرگەن سۇحباتىندا. باسقارما توراعاسىنىڭ ايتۋىنشا, كوپ قاباتتى ۇيلەر مەردىگەر قاراجاتىنىڭ ەسەبىنەن جۇرگىزىلەدى, قۇرىلىس ساپاسى قاتاڭ باقىلاۋدا. سالىنىپ جاتقان تاعى ءبىر نىسان جەلتوقسان كوشەسىندە ورنالاسقان. بۇل جالپى اۋدانى 4000,0 شارشى مەتردى قۇرايتىن 70 پاتەرلى تۇرعىن ءۇيدىڭ قۇرىلىسى.
سونداي-اق, وبلىس اكىمى مەن حولدينگ باسقارما توراعاسى «شۇعىلا» شاعىن اۋدانىنىڭ شۇكىروۆ كوشەسىندە جانە «سپمك-70» تۇرعىن اۋدانىندا كوپ قاباتتى ۇيلەردىڭ ىرگەتاسىن قالاۋ راسىمىنە دە قاتىستى.
وسى نىسانداردىڭ قۇرىلىسىن ءجۇرگىزۋگە حولدينگتىڭ ەنشىلەس ۇيىمى – «بايتەرەك دەۆەلوپمەنت» اق جاۋاپتى. شۇكىروۆ كوشەسىندەگى ءتورت بەس قاباتتى تۇرعىن ۇيلەردىڭ قۇرىلىسىن كەلەسى جىلعى ساۋىردە اياقتاۋ جوسپارلانعان. سپمك-70 اۋدانىندا ءبىر 40 پاتەرلى, ءۇش 50 پاتەرلى جانە ءۇش 60 پاتەرلى تۇرعىن ءۇي سالىناتىن بولادى. بۇل ۇيلەر 2016 جىلعى جەلتوقسان ايىندا تاپسىرىلماق.
قىزىلوردا قالاسىندا 2015 جانە 2016 جىلدارى پايدالانۋعا بەرىلەتىن, 7,4 ملرد. تەڭگە سوماعا جالپى اۋدانى 59,6 مىڭ شارشى مەترلىك (950 پاتەر) بەس وبەكت بويىنشا شارتقا قول قويىلدى. وڭىردە بيىل تۇرعىن ۇيلەردىڭ جانە ينجەنەرلىك-كوممۋنيكاتسيالىق ينفراقۇرىلىمداردىڭ قۇرىلىسىنا 4,2 ميلليارد تەڭگە قارجى قارالعان. قوماقتى قارجىعا 44,4 مىڭ شارشى مەتر بولاتىن 660 پاتەرلى 13 تۇرعىن ءۇي سالىنادى. سونداي-اق, 158,5 شاقىرىم ينجەنەرلىك جەلىلەردىڭ قۇرىلىسى جۇرگىزىلىپ, پايدالانۋعا بەرىلدى. اتالعان باسپانانىڭ 540-ى نەسيەلىك تۇرعىن ءۇي بولسا, 120-سى كەزەكتە تۇرعاندارعا ۇلەستىرىلمەك.
بۇعان قوسا, «قازاقستان يپوتەكالىق كومپانياسى» اق ارقىلى كەزەكتە تۇرعان ازاماتتارعا ارنالعان جالعا بەرىلەتىن تۇرعىن ۇيلەر قۇرىلىسىن سالۋعا قىزىلوردا قالاسىنان 3 جەر تەلىمى ءبولىندى. اتالعان جەرگە 68,6 مىڭ شارشى مەتردى قۇرايتىن 1130 پاتەرلى 21 تۇرعىن ءۇي تۇرعىزىلادى. ال «سامۇرىق-قازىنا» جىلجىمايتىن م ۇلىك قورى ارقىلى سالىناتىن 17,2 مىڭ شارشى مەتر تۇرعىن ءۇيدىڭ قۇرىلىسى قارقىندى جۇرگىزىلۋدە.
وسىلايشا, قاسيەتتى رامازان ايى قىزىلوردالىقتارعا تاعى ءبىر ۇلكەن قۋانىش سىيلاپ, جاعىمدى جاڭالىقتارمەن باستالۋدا.
ءماريا وماروۆا.
قىزىلوردا.