قاراعاندىدا وقۋ-جاتتىعۋ بارىسىندا پوليتسيا مايورى قازا بولدى. ءتارتىپ ساقشىسى جازاتايىم وق ءتيىپ, كوز جۇمعان, دەپ حابارلايدى Egemen.kz.
ازىرگە وقيعانىڭ ءمان-جايى تۋرالى اقپارات جوق. الايدا, ىشكى ىستەر ءمينيسترى ەرجان سادەنوۆ ءوزىنىڭ رەسمي پاراقشاسىندا مارقۇمنىڭ تۋعاندارىنا كوڭىل ايتىپ, حابارلاما جاريالادى.
– وقۋ-جاتتىعۋ ءىس-شارالارىن وتكىزۋ كەزىندە بولعان جازاتايىم وقيعا سالدارىنان قازا تاپقان قاراعاندى وبلىسى پوليتسيا دەپارتامەنتىنىڭ قىزمەتكەرى الدان اليەۆتىڭ تۋىستارى مەن جاقىندارىنا كوڭىل ايتامىن, – دەپ جازدى ەلىمىزدىڭ باس پوليتسەيى.
قاراعاندى وبلىسى پوليتسيا دەپارتامەنتى دە قازا بولعان ارىپتەسىنىڭ تۋعاندارىنا كوڭىل ايتىپ, پوليتسيا مايورى الدان اليەۆ جازاتايىم وقيعا سالدارىنان كوز جۇمعانىن حابارلادى.
– قاراعاندى وبلىستىق پوليتسيا دەپارتامەنتىنىڭ باسشىلىعى, ارداگەرلەر كەڭەسى جانە جەكە قۇرامى, وقۋ-جاتتىعۋ ءىس-شارالارىن وتكىزۋ كەزىندە بولعان جازاتايىم وقيعا سالدارىنان قازا تاپقان, پوليتسيا دەپارتامەنتى وقۋ-جاتتىعۋ ۆزۆودىنىڭ اعا ينسپەكتورى پوليتسيا مايورى اليەۆ الدان جۇماجان ۇلىنىڭ جاقىندارى مەن تۋىستارىنىڭ قايعىسىنا ورتاقتاسىپ, كوڭىل ايتادى, – دەپ جازىلعان حابارلامادا.