ەلىمىزدىڭ باس باسىلىمى «ەگەمەن قازاقستان» گازەتىنىڭ 10 قاڭتارداعى سانىندا ءتىلشىمىز قانات بىرلىك ۇلىنىڭ قازىرگى قازاق ادەبيەتىنىڭ ءىرى وكىلى تولەن ابدىكپەن سۇحباتى جاريالانعان ەدى, دەپ جازادى Egemen.kz.
پرەزيدەنت وسى سۇحباتتى مۇقيات وقىپ شىققانىن ايتىپ, قالامگەرگە جەدەلحات جولدادى.
«ەگەمەن قازاقستان» گازەتىنە بەرگەن سۇحباتىڭىزدى مۇقيات وقىپ شىقتىم. وزەكتى وي-تولعامدارىڭىز ارقىلى ۇلت رۋحانياتى ءۇشىن قۇندى دۇنيەلەر ايتىلعان. ءتول ادەبيەتىمىزدىڭ دامۋ كوكجيەگىنە قاتىستى سىن-پىكىرلەرىڭىز بەن جاس بۋىنعا قاراتا ايتقان اقىل-كەڭەستەرىڭىز ورىندى دەپ سانايمىن. شىن مانىندە, جاھاندى جايلاعان قازىرگىدەي قۇبىلمالى زاماندا جازۋشىلار قاۋىمى كوركەم تۋىندىلارى ارقىلى ادىلدىك, جاقسىلىق جانە ادامدىق قۇندىلىقتارىن كەڭىنەن دارىپتەگەنى ءجون. بۇل ەلىمىزدىڭ كەلەشەگى ءۇشىن وتە ماڭىزدى. قالامىڭىز قارىمدى بولسىن! سىزگە مىقتى دەنساۋلىق, باق-بەرەكە جانە تولايىم تابىس تىلەيمىن», دەلىنگەن جەدەلحاتتا.
گازەتىمىزدە «تولەن ابدىك, جازۋشى: كوشپەلى ەلدىڭ دامۋى تاسباقانىڭ اياڭىنا ۇقسايدى» دەگەن تاقىرىپپەن جاريالانعان ماتەريالدى مىنا جەردەن وقي الاسىز.