ۇلتتىق تەلەراديونى قوسپاعاندا, سپۋتنيكتىك تەلەراديو حابارلارىن تاراتۋ وپەراتورلارىنىڭ سپۋتنيكتىك قابىلداۋ قۇرىلعىلارىن ىسكە اسىرۋعا جۇمسالاتىن شىعىندارىنىڭ ءبىر بولىگىن سۋبسيديالاۋ باعدارلاماسى باستالدى. بۇل تۋرالى مادەنيەت جانە اقپارات مينيسترلىگى حابارلادى.
باعدارلامانىڭ ماقساتى – جەكە نەمەسە زاڭدى تۇلعالاردى وتاندىق سپۋتنيكتىك تەلەراديو حابارلارىن تاراتۋ وپەراتورلارىنىڭ سپۋتنيكتىك قابىلداۋ قۇرىلعىلارىن ساتىپ الۋعا ىنتالاندىرۋ. باعدارلاما شەڭبەرىندە سپۋتنيكتىك تەلەراديو حابارلارىن تاراتۋ وپەراتورلارى سپۋتنيكتىك قابىلداۋ قۇرىلعىلارىن ىسكە اسىرۋعا جۇمسالاتىن شىعىنداردىڭ ءبىر بولىگىن وتەي الادى. بۇل ازاماتتاردىڭ جابدىق شىعىندارىن ازايتۋعا, وتاندىق تەلەراديو حابارلارىن تاراتۋدىڭ قولجەتىمدىلىگىن ارتتىرۋعا مۇمكىندىك بەرەدى.
سۋبسيديالاۋ مەرزىمى 3 جىلدان اسپايدى. سۋبسيديالار جىلىنا 50 مىڭنان اسپايتىن سپۋتنيكتىك قابىلداۋ قۇرىلعىلارىن ساتۋعا بولىنەدى. ۇدەرىستىڭ اشىقتىعى مەن ايقىندىعىن قامتاماسىز ەتۋ ماقساتىندا مينيسترلىك جانىنان تۇراقتى جۇمىس ىستەيتىن كوميسسيا قۇرىلدى. سۋبسيديالاۋدى ۇسىنۋ ءتارتىبى مادەنيەت جانە اقپارات ءمينيسترىنىڭ مىندەتىن اتقارۋشىنىڭ 2024 جىلعى 21 قاراشاداعى №551-نق بۇيرىعىمەن بەكىتىلگەن.
مينيسترلىك قازاقستان رەسپۋبليكاسىنىڭ اۋماعىندا جۇمىس ىستەيتىن سپۋتنيكتىك تەلەراديو حابارلارىن تاراتۋ وپەراتورلارىن باعدارلاماعا قاتىسۋعا شاقىرادى. قوسىمشا اقپارات الۋ ءۇشىن +7 (7172) 74 02 64, +7 (7172) 74 03 43 تەلەفون نومىرلەرى ارقىلى بايلانىسۋعا بولادى.