قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ اقش ساۋدا پالاتاسىمەن, سونداي-اق Meta جانە Apple سياقتى ءىرى امەريكالىق كومپانيالاردىڭ وكىلدەرىمەن بىرقاتار كەزدەسۋ وتكىزدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
كەزدەسۋلەردە مالىمەتتەر قاۋىپسىزدىگى, جالعان اككاۋنتتارمەن كۇرەس جانە پايدالانۋشىلاردى قورعاۋعا قاتىستى ماڭىزدى ماسەلەلەر تالقىلانعان.
ء«بىز سونداي-اق Telegram پلاتفورماسىمەن زاڭسىز كونتەنتتى جەدەل جويۋ جانە دەسترۋكتيۆتى ارنالاردى بۇعاتتاۋ بويىنشا بەلسەندى تۇردە ىنتىماقتاستىق ورناتىپ جاتىرمىز. ءبىزدىڭ زاڭناماعا سايكەس, ەندى Telegram, WhatsApp جانە TikTok سياقتى ينتەرنەت-پلاتفورمالار قازاقستاندا ءوز وكىلىن تاعايىنداۋعا مىندەتتى. Telegram-مەن ولاردىڭ وكىلىن تاعايىنداۋ جانە كەڭسە اشۋ تۋرالى كەلىسىمگە قول جەتكىزىلدى, بۇل - كونتەنتتى باقىلاۋدى ارتتىرۋعا باعىتتالعان ماڭىزدى قادام», دەدى جاسلان ماديەۆ.
سونىمەن قاتار مينيسترلىك Meta كومپانياسىمەن الاياقتىق سحەمالارعا قارسى كۇرەس جۇمىستارىن باستاۋدى جوسپارلاعان. Meta وكىلدەرى قازاقستاندا جيىلەگەن كيبەر-الاياقتىق كوپتەگەن ەل ءۇشىن ورتاق پروبلەما ەكەنىن اتاپ ءوتتى. سوڭعى توقساندا Meta جاساندى ينتەللەكت تەحنولوگيالارىن پايدالانا وتىرىپ, الەم بويىنشا 1,2 ميلليارد جالعان اككاۋنتتى بۇعاتتاعان.