ءۇندىستاننىڭ حايداراباد شتاتىنداعى مەكتەپتەردىڭ بىرىندە وتانداسىمىز ايمان مامەداليەۆا قىزمەت ەتەدى. ءبىر قىزىعى, باكالاۆر مەن ماگيستراتۋرانى «قازاق ءتىل مەن ادەبيەتى» پانىنەن تامامداعان ول افريكاداعى قارا دومالاقتارعا دا اعىلشىن ءتىلىن يگەرۋگە كومەكتەسكەن.
ەڭبەك جولىن تاراز قالاسىنداعى ءبىلىم يننوۆاتسيا ليتسەيىندە باستاعان ايماننىڭ افريكاعا, ودان كەيىن ۇندىستانعا بارىپ ساباق بەرىپ جۇرگەنى كىم-كىمگە دە قىزىق شىعار. ويتكەنى مۇنداي تاۋەكەلگە اركىمنىڭ جۇرەگى داۋالامايدى. ونىڭ ۇستىنە ول جاقتاعى وقۋشىلارعا قازاقشا قامزول كيگىزىپ, اباي ولەڭىن جاتقا ايتقىزسا, كەيىپكەرىمىزدىڭ وسال بولماعانى دا.
– افريكاعا قانداي جەل ايداپ اپاردى دەيسىز عوي؟ ول جاققا كۇيەۋىمنىڭ جۇمىس بابىمەن باردىق. مەن شەت تىلىنەن ساباق بەردىم, سونداي-اق كىتاپحانادا جۇمىس ىستەدىم. قىزىعى مەن قيىنشىلىعى قاتار ءجۇردى. جالپى مۇنداعى ءبىلىم جۇيەسى ەكى ءتۇرلى. ياعني بۇل قۇرلىقتاعى مەملەكەتتەر وتارلاۋشى ەلگە قاراي ىڭعايلانعان. مىسالى, اعىلشىن وتارىندا بولعان تانزانيا, نيگەريا, كەنيا سىندى ەلدەردىڭ دامۋ قارقىنى سالىستىرمالى تۇردە جوعارى. ال فرانتسۋز وتارىندا بولعان مەملەكەتتەر ارتتا قالعان. مەن وسى فرانتسۋز وتارىنداعى ورتا افريكا ەلىندە بولدىم. ول جاقتاعى ءبىلىم جۇيەسىن ءبىزدىڭ ەلمەن سالىستىرۋعا كەلمەيدى. بىراق ءوز دەڭگەيىندە كەيبىر قىزىق وقىتۋ ادىستەمەلەرى بار. ماسەلەن, تاقتاعا سۋرەت سالىپ, ساباق ءتۇسىندىرۋ بارلىق سىنىپتا كەزدەسەتىن ءادىس. ودان بولەك, افريكالىقتار بيگە بەيىم حالىق قوي. بىزدە ادام قايتىس بولعاندا جوقتاۋ ايتساق, ال مۇنداعىلار قايعىلى ساتتە دە بيلەيدى. سوندىقتان وسى ونەرلەرىن وقىتۋ كەزىندە تاقىرىپپەن ورايلاستىرامىز. تاعى ءبىر ايتا كەتەرلىگى, فرانتسۋز تىلىندە ەكى نەمەسە ءۇش ءارىپ قوسىلىپ ءبىر دىبىس بەرەدى. سول سەبەپتى مۇندا ساۋاتتى جازۋعا اسا قاتتى ءمان بەرىلەدى, – دەيدى ول.
ايمان مامەداليەۆانىڭ ايتۋىنشا, ەلىمىزدە العان ءبىلىمى مەن تاجىريبەسى شەت مەملەكەتتە كوپ كومەگىن تيگىزگەن. سىنىپتى توپتارعا ءبولىپ وقىتۋ, ولاردىڭ بىلگەنىن ورتادا تالقىلاۋ سەكىلدى ادىستەمەلىك تاسىلدەردى قولدانىپ, وقۋشىلاردىڭ دا, وقىتۋشىلاردىڭ دا كوڭىلىنەن شىققان.
ء–ۇندىستاندا تۇرىك تىلىنەن ساباق بەرەمىن. ءبىزدىڭ ەلمەن سالىستىرساق, بىرنەشە وزگەشەلىك بار. اتاپ ايتساق, وندا ساباق ماۋسىمدا باستالادى. بالالار ەكى توقسان عانا وقيدى. توقسان اراسىندا ءبىر اپتالىق دەمالىس بار. مۇمكىن كليماتقا دا بايلانىستى شىعار. ودان بولەك, تاڭعالدىرعان دۇنيە – كەز كەلگەن وقۋشىنىڭ ءتورت تىلدە ەمىن-ەركىن سويلەي الاتىندىعى. ءبىر بالانىڭ حيندي, ۋردۋ, تەلەگۋ, اعىلشىن تىلىندە سايراپ تۇرۋى قالىپتى جاعداي. ءۇندىستاندا شەتەل ازاماتى اعىلشىن تىلىنەن ساباق بەرە المايدى. سەبەبى ول ەلدىڭ تاريحىن جەتىك ءبىلۋى شارت. مۇعالىمگە قويار تالاپتارى وتە جوعارى. تاعى ءبىر ايتا كەتەرلىگى, وقىتىلاتىن ءپان ءبىزدىڭ ەلدەگىدەي كوپ ەمەس. باس-اياعى 6 ءپان عانا وقىتىلادى. وقۋشىنىڭ ءبىلىم دەڭگەيىنە قاراي دۇرىس جۇيەلەنگەن. مەكتەپ 3 جاستان باستالىپ, 10-سىنىپقا دەيىن وقىتىلادى. بالا 11-12 سىنىپتى ءوز باعىتىنا قاراي كوللەدجدەردە جالعاستىرادى. بۇدان كەيىن ۋنيۆەرسيتەتتە وقيدى. وسى ۋاقىتتا وقۋشى ءوزىنىڭ قانداي ماماندىققا بەيىمدىلىگىن انىقتاپ, دۇرىس شەشىم قابىلداي الادى. دەمەك ماماندىقتان اداسىپ, ورتا جولدان وقۋىن تاستاپ كەتپەيدى, – دەيدى ا.مامەداليەۆا.
ايمان تاريحي وتانىنان تىسقارى جۇرسە دە ۇلتتىق قۇندىلىقتى دارىپتەپ, ەلدەگى ءبىلىم جۇيەسىنەن حاباردار بولىپ وتىرادى. ءتىپتى شەتەلدەگى تاجىريبەسىن جيناقتاپ, «بىزگە ءبايمالىم بانگي», ء«ۇندىستان ءۇنى» اتتى كىتاپتارىن جارىققا شىعارعان.
– ءار پەداگوگكە ايتار تىلەگىم, بالانى شىنايى جاقسى كورىڭىز. ساباق بەرىپ, سىنىپتان شىعىپ كەتۋدى ەمەس, وقۋشىنىڭ جان دۇنيەسىمەن سىرلاسۋدى, ونى بارىنشا تانىپ, اڭگىمەلەسۋگە قۇشتار بولىڭىز. مۇعالىمدىك جول – اۋىر جول. بۇل سالا ۇلكەن كۇش-جىگەردى تالاپ ەتەدى. بارشامىزعا ناعىز ۇستاز بولۋ باقىتى ءناسىپ بولسىن. شىعارماشىلىقتا سارقىلماس كۇش-قايرات تىلەيمىن. التى الاشقا قىزمەت ەتۋدەن ءلايىم شارشامايىق, ارىپتەستەر, – دەپ ايمان مامەداليەۆا ەلىمىزدەگى بارشا ۇستازدارعا ىستىق لەبىزىن ءبىلدىردى.