قارعالى اۋدانى بادامشا مەكتەپ-بوبەكجاي باقشاسىنىڭ 7-سىنىپ وقۋشىسى ارتۋر نەچاەۆ ۇيالى تەلەفوندار مەن ءپورتاتيۆتى قوندىرعىلاردى كەز كەلگەن جەردە قۋاتتاۋعا ارنالعان تەرموەلەكترلىك گەنەراتور ويلاپ تاپتى.
ونىڭ پەلتە ەلەمەنتىنىڭ نەگىزىندە قۇراستىرعان قوندىرعىسى – ەكولوگيالىق تازا, كۇندەلىكتى ومىردە قاجەتتى, كەز كەلگەن ايماقتا, اۋا رايىنىڭ قولايسىز مەزگىلىندە پايدالانۋعا لايىقتالعان. قىس مەزگىلىندە ءموبيلدى قۇرىلعىلار قۋاتى تەز تاۋسىلاتىنى, اسىرەسە سىرتتا جۇرگەندە ونى قۋاتتاۋ قيىنعا تۇسەتىنى – تانىس جاعداي. گەنەراتوردى تابيعي اپات كەزىندە دە قولدانۋعا بولادى. ويتكەنى وسى قۇرىلعى جانىپ تۇرعان وتتان دا قۋات الادى.
ارتۋر التى جىلدان بەرى «زەردە» عىلىمي جوبالار بايقاۋىنا قاتىسىپ, جۇلدەلى ورىندارعا يە بولىپ كەلەدى. بادامشا مەكتەپ-بوبەكجاي باقشاسىنىڭ فيزيكا ءپانى مۇعالىمى –اللا حورولسكايا وقۋشىسىنىڭ قابىلەتىن دەر كەزىندە بايقاپ, باعىتتاپ ءجۇر. جاس ونەرتاپقىش ءوز بولاشاعىن فيزيكا ماماندىعىمەن بايلانىستىرىپ, قورشاعان ورتاعا زالال كەلتىرمەيتىن عىلىمي جاڭالىقتار اشۋدى ارماندايدى. «زەردە» جوباسىنان وزگە سايىستاردا دا باق سىناعان ارتۋر ەكى جىل بۇرىن «تابيعاتتى قورعايىق» تاقىرىبىندا بەينەروليكتەر تۇسىرۋدەن وبلىستا ءبىرىنشى ورىن الدى.
بالانىڭ جەتىستىككە جەتۋى ەڭ الدىمەن اتا-اناسىنىڭ قولداۋىنا بايلانىستى عوي. «ارتۋردىڭ اكەسى سەرگەي كىشكەنتاي كەزىنەن قۇراستىرۋدى, سىرىڭكە قورابىنان ۇيشىكتەر مەن ۇشاق, كەمە, اعاشتان مۇسىندەر جاساعاندى قاتتى ۇناتقان. اكەسىنىڭ وسى قابىلەتى ارتۋرعا بەرىلگەن دەپ ويلايمىن. ءبىز ۇلىمىزدىڭ قانداي باستاماسىنا دا قولداۋ ءبىلدىرىپ كەلەمىز. ارتۋر بالا كەزدەن جاڭانى ۇيرەنۋگە, ويىنداعىسىن ءىس جۇزىنە اسىرۋعا وتە قۇمار. وسى جاعىنان بىرتىندەپ ومىرلىك داعدىسىن قالىپتاستىرىپ, ناقتى عىلىمدارعا جاقىنداپ كەلەدى», دەيدى ارتۋردىڭ اناسى, بادامشا ورتا مەكتەبىنىڭ مۇعالىمى مانشۇك قايىرلىقىزى.
تالاپتى جاس مۋزىكاعا دا اۋەس. قازىر ول بادامشاداعى مۋزىكا مەكتەبىنىڭ اككوردەون سىنىبىنا بارادى, ءوز بەتىمەن گيتارادا ويناۋدى ۇيرەنىپ الدى. ول بالامالى ەنەرگيا جوباسىنا قاتىسىپ, بولاشاقتا ەلگە پايدا اكەلەتىن, تابيعاتقا زالال كەلتىرمەيتىن يننوۆاتسيالىق جوبالاردى قولعا العىسى كەلەدى.
اقتوبە وبلىسى