ءبىرىنشى قىركۇيەكتە اقتوبە وبلىسىنىڭ 433 مەكتەبىندە قوڭىراۋ سىڭعىرى ەستىلىپ, 180 مىڭنان استام وقۋشى جاڭا وقۋ جىلىن باستايدى. ال 1-سىنىپقا 18 مىڭنان استام بالدىرعان قابىلداندى. تامىزدا «مەكتەپكە جول» اكتسياسى اياسىندا جەرگىلىكتى بيۋدجەتتەن الەۋمەتتىك وسال توپتاعى وتباسى بالالارىنا وقۋ قۇرالدارى مەن كيىم-كەشەك ساتىپ الۋعا جەرگىلىكتى بيۋدجەتتەن 761 ملن 445 مىڭ تەڭگە ءبولىنىپ, اتا-انالارىنىڭ ەسەپشوتىنا اۋدارىلدى. جازعى دەمالىس كۇندەرىندە وڭىردەگى 48 ءبىلىم بەرۋ نىسانىنا كۇردەلى جوندەۋ جۇمىسى جۇرگىزىلىپ, 41 مەكتەپتە جاڭا پاندىك كابينەتتەر جاساقتالدى.
مەكتەپ كىتاپحانالارى 87 120 جاڭا كىتاپپەن تولىقتى. ونىڭ ىشىندە عىلىمي-كوپشىلىك باعىتتاعى كىتاپتار, ەنتسيكلوپەديالار, بالالار قىزىعۋشىلىعىن تۋدىرعان ادەبي شىعارمالار بار. جاڭا وقۋ جىلىندا ەرەكشە قاجەتتىلىگى بار 9 148 بالانىڭ ءوز قاتارلاستارىمەن بىرگە ءبىلىم الۋ مۇمكىندىكتەرى قاراستىرىلدى. ولاردىڭ كوبى بىلتىرعى سىنىپتاستارىمەن بىرگە پارتاعا وتىرادى. وكىنىشكە قاراي, جىل سايىن وڭىردە دەنساۋلىعىندا ءتۋابىتتى كىناراتى بار بالالار سانى كوبەيىپ كەلەدى.
وڭىردەگى 30-دان استام كوللەدجدە 18 202 ستۋدەنت مەملەكەتتىك تاپسىرىس بويىنشا ءبىلىم الۋدى باستايدى. وسى وقۋ جىلىندا كاسىپتىك ءبىلىم بەرۋ ۇيىمدارى تۇلەكتەرىنىڭ جۇمىسقا ورنالاستىرۋىن جەدەلدەتەتىن حالىقارالىق تاجىريبە نەگىزىندە «ماماندىقتار اتلاسى» ازىرلەنەدى. بيىل وڭىردەگى وقۋشىلار سانى 1000-نان اساتىن 150 مەكتەپتە وقىس قيمىلدار مەن كۇدىكتى زاتتاردى انىقتاپ, جەدەل ورتالىققا دابىل بەرەتىن تسيفرلىق بەينەباقىلاۋ جۇيەلەرى ورناتىلادى.
جازدا 150 مىڭنان استام وقۋشى قالا سىرتىنداعى, مەكتەپىشىلىك جانە قوسىمشا ءبىلىم بەرۋ ۇيىمدارى جانىنداعى لاگەرلەردە دەمالدى. سۋ تاسقىنىنان زارداپ شەككەن اۋدانداردىڭ, از قامتىلعان جانە كوپبالالى وتباسىلاردىڭ 30 مىڭ بالاسى تەگىن جولدامامەن قامتاماسىز ەتىلدى. كوكتەمدەگى سۋ تاسقىنىنان 14 ءبىلىم مەكەمەسى زارداپ شەكسە, التى مەكتەپ مۇلدە جارامسىز بولىپ قالدى. جاڭا مەكتەپ قۇرىلىسىنا ۇكىمەتتىڭ رەزەرۆتىك قورىنان قاراجات ءبولىندى. سوعان قاراماستان ويىل اۋدانىنىڭ ەكپەتال اۋىلى مەن ىرعىز اۋدانى نۇرا اۋىلىنىڭ مەكتەپتەرى وقۋ جىلىنا دايىن ەمەس. ويتكەنى ىرعىز اۋدانىندا توتەنشە جاعداي رەجىمى ءالى اياقتالعان جوق. نۇرا اۋىلىندا تورعاي وزەنىنىڭ سۋى قايتپادى, اۋىل ۇيلەرى ءالى دە سۋ ورتاسىندا تۇر. وسىدان التى جىل بۇرىن سالىنعان نۇرا ورتا مەكتەبى دە بەس ايدان بەرى سۋ ورتاسىندا, عيماراتى مۇلدە جارامسىز. قازىر وسى اۋىلدىڭ ىرگەسىندەگى بيىكتەۋ قىراتتا 60 ورىندىق مەكتەپ جەكە ينۆەستوردىڭ قارجىسىنا سالىنىپ جاتىر. الايدا قارا كۇزگە دەيىن جاڭا مەكتەپ اياقتالا قويمايتىنى انىق. وبلىستىق ءبىلىم باسقارماسىنىڭ حابارلاۋىنشا, نۇرا مەكتەبىنىڭ 100-گە جۋىق وقۋشىسى قاشىقتان ءبىلىم الادى. كوكتەمدە سۋ باسقان ەكپەتال نەگىزگى مەكتەبىنىڭ 35 وقۋشىسى دا اۋدان ورتالىعىنداعى ويىل اگرارلىق كوللەدجى عيماراتىندا ءبىلىم الادى.
جاڭا وقۋ جىلىندا 70 مىڭنان استام باستاۋىش سىنىپ وقۋشىلارى مەن ەرەكشە ساناتتاعى وتباسى بالالارى تەگىن ىستىق تاماقپەن قامتاماسىز ەتىلەدى.
اقتوبە وبلىسىنداعى 56 اۋىل مەكتەبىن تولىق جاڭعىرتۋ جۇمىستارى باستالىپ كەتتى. بۇل كۇندەرى 50 مەكتەپكە جاڭا جيھازدار ساتىپ الىنىپ, 56 مەكتەپكە تۋرنيكەتتەر ورناتىلدى. ءبىلىم باسقارماسىنىڭ مالىمەتىنە قاراعاندا, 2025 جىلعا دەيىن وڭىردەگى بارلىق اۋىل مەكتەبىن تولىق جاڭعىرتۋ جۇمىستارى اياقتالماقشى.
اقتوبە وبلىسى