استانادا ۇلتتىق نەيروحيرۋرگيا ورتالىعىنىڭ دارىگەرلەرى جۇكتى ايەلدى جارىلۋ قاۋپى بار انەۆريزمادان قۇتقاردى. بۇل تۋرالى Egemen.kz «الەۋمەتتىك مەديتسينالىق ساقتاندىرۋ قورى» كەاق استانا قالاسى بويىنشا فيليالىنا سىلتەمە جاساپ حابارلايدى.
«جۇكتىلىكتىڭ 20-اپتاسىندا نەيروحيرۋرگيالىق وتا جاساۋ بويىنشا شۇعىل تۇردە شەشىم قابىلداۋ قاجەت بولدى. قۋانىشتىسى, وتا ءساتتى ءوتتى, كەز كەلگەن ساتتە جارىلۋى مۇمكىن «بومبا» زالالسىزداندىرىلدى. نەيروحيرۋرگتەر جۇرگىزىلگەن جۇمىستىڭ ناتيجەسى ويداعىداي ەكەنىن ايتتى», دەپ حابارلادى «الەۋمەتتىك مەديتسينالىق ساقتاندىرۋ قورى» كەاق استانا فيليالى.
24 جاستاعى الماتى قالاسىنىڭ تۇرعىنىن وسى جىلدىڭ اقپان ايىنان باس اۋرۋى مازالاي باستاعان. ءبىر ايدان كەيىن ءتىپتى كورۋ قابىلەتى ناشارلاپ, وڭ قاباعىنىڭ تومەن تۇسكەنىن بايقايدى. ءسويتىپ, ول مەديتسينالىق كومەك الۋ ءۇشىن وفتالمولوگ پەن نەۆرولوگقا جۇگىنگەن.
باس اۋرۋى كۇشەيە باستاعان سوڭ ميدىڭ مرت ءوتۋ ۇسىنىلدى. مرت-دا ميدىڭ وڭ جاعىنداعى ارتقى ارتەرياسىنىڭ ۇلكەن انەۆريزماسى انىقتالدى, كولەمى ۇلعايعاندىقتان جانىنداعى جۇيكە قۇرىلىمدارىن قىسىپ, كەز كەلگەن ۋاقىتتا جارىلىپ كەتۋ قاۋپىن تۋدىردى. بۇل رەتتەگى جاعدايدىڭ كۇردەلىلىگى, جۇكتىلىكتىڭ 20-اپتاسىندا نەيروحيرۋرگيالىق وتا جاساۋ بويىنشا شۇعىل تۇردە شەشىم قابىلداۋ قاجەت بولدى.
الماتى جانە استانا قالالارى نەيروحيرۋرگتەرىنىڭ بىرلەسكەن تالقىلاۋىنان كەيىن سانيتاريالىق اۆياتسيا جەلىسى بويىنشا پاتسيەنت ودان ءارى جەدەل ەمدەۋ ءۇشىن ۇلتتىق نەيروحيرۋرگيا ورتالىعىنا جەتكىزىلدى.
ۇلتتىق نەيروحيرۋرگيا ورتالىعىنا جاتقىزعان كەزدە ناۋقاستى انا مەن بالا ۇلتتىق عىلىمي ورتالىعىنىڭ انەستەزيولوگتەرى مەن اكۋشەر-گينەكولوگتەرى دە تەكسەرۋگە دايىن بولدى. حيرۋرگيالىق ارالاسۋ مەن اتالعان اۋرۋدىڭ قاۋىپتىلىگىنە قاراماستان وتا جاساۋ جانە جۇكتىلىكتى ساقتاپ قالۋ تۋرالى شەشىم قابىلداندى.
قۋانىشتىسى, وتا ءساتتى ءوتتى, كەز كەلگەن ساتتە جارىلۋى مۇمكىن «بومبا» زالالسىزداندىرىلدى. نەيروحيرۋرگتەر جۇرگىزىلگەن جۇمىستىڭ ناتيجەسى ويداعىداي ەكەندىگىن ايتۋدا. ناۋقاستى ەمدەۋگە انەستەزيولوگ-رەانيماتولوگتەر مەن اكۋشەر-گينەكولوگتەر دە بەلسەندى قاتىستى.
وتادان كەيىن, ناۋقاسقا قوسىمشا زەرتتەۋلەر جۇرگىزگەن اكۋشەر-گينەكولوگتەر قايتا قاراپ, تەكسەرۋدەن وتكىزدى. جاتىرداعى شارانا مەن جۇكتىلىك بارىسىندا ەشقانداي پاتولوگيالار انىقتالعان جوق. قازىر بولاشاق انانىڭ دەنساۋلىعى جاقسى جانە ۇيىنە شىعۋعا دايىندالىپ جاتىر.
مي تامىرلارىنىڭ انەۆريزماسىنا وتا جاساۋ مامانداردىڭ جوعارى بىلىكتىلىگىن جانە زاماناۋي مەديتسينالىق جابدىقتى قاجەت ەتەتىن ەڭ كۇردەلى حيرۋرگيالىق ارالاسۋلاردىڭ ءبىرى بولىپ سانالادى. وتانى تامىرلى جانە فۋنكتسيونالدى نەيروحيرۋرگيا بولىمشەسىنىڭ مەڭگەرۋشىسى ەربول ماحامبەتوۆ پەن نەيروحيرۋرگ دارىگەر نۇرتاي نۇراقاي جۇرگىزدى.
وتا ناۋقاسقا تەگىن, ياعني ءمامس اياسىندا كۆوتا ارقىلى جاسالدى. ال مۇنداي وتانىڭ قۇنى شەتەل ازاماتتارى ءۇشىن اقىلى نەگىزدە شامامەن 5 ملن تەڭگە بولار ەدى.
ۇلتتىق نەيروحيرۋرگيا ورتالىعىنىڭ دارىگەرلەرى مۇنداي كۇردەلى جاعدايلار كەزىندە, قازىرگى تاڭدا انانى نەمەسە بالانى, قايسىسىنىڭ ءومىرىن ساقتاپ قالۋ كەرەك دەگەن سۇراق تۋىندامايتىنىن اتاپ ءوتتى. نەيروحيرۋرگيا مەن انەستەزيولوگياداعى زاماناۋي مۇمكىندىكتەر انا مەن بالانىڭ ەكەۋىنىڭ ءومىرىن ساقتاۋعا مۇمكىندىك بەرەدى.
اتاپ وتەيىك, بۇل ۇلتتىق نەيروحيرۋرگيا ورتالىعىنىڭ دارىگەرلەرى وتا جاساپ, جۇكتىلىك كەزىندە پاتسيەنتتەردىڭ ءومىرىن ساقتاپ قالعان ءبىرىنشى جاعداي ەمەس.