كوكتەمنىڭ جىلى كۇندەرىنىڭ باستالۋىمەن ەلوردانىڭ كوممۋنالدىق قىزمەتى قالانى اۋقىمدى سانيتارلىق تازالاۋعا كىرىستى. ماسەلەن, كوپىرلەر, ەسكەرتكىشتەر, تروتۋارلار, بەلگىلەر, قورشاۋلار, ايالدامالار جۋىلادى, سكۆەرلەر, ساياباقتار, قوعامدىق كەڭىستىكتەر قوقىستاردان تازارتىلادى, دەپ حابارلايدى Egemen.kz استانا اكىمدىگىنىڭ رەسمي سايتىنا سىلتەمە جاساپ.
قازىر ارنايى تەحنيكانىڭ كومەگىمەن تروتۋارلار مەن جول جابىندارىن مەحانيكالاندىرىلعان تازالاۋ جۇمىستارى ءجۇرىپ جاتىر. قولمەن جانە تەحنيكانىڭ كومەگىمەن جول جيەگى تازالانادى. سونداي-اق كوممۋنالدىق قىزمەت ماماندارى ەرىگەن سۋدى سورادى.
ءىس-شاراعا 1000 ارنايى تەحنيكا بىرلىگى جانە 2300 جول جۇمىسشىسى جۇمىلدىرىلدى.
اكتسياعا 35 مىڭعا جۋىق قالا تۇرعىنى, ەڭبەك ۇجىمدارى, قوعامدىق ۇيىمدار, بيزنەس وكىلدەرى, جاستار, ەرىكتىلەر, اۋدان بەلسەندىلەرى قاتىستى. ەلوردادا جالپى 60 مىڭعا جۋىق توننا قوقىس جينالىپ, شىعارىلدى. تازالانعان اۋماقتىڭ اۋدانى 52 ملن شارشى مەتردەن اسادى.