مەملەكەت باسشىسى مۇمكىندىگى شەكتەۋلى جاندارعا بارىنشا قولداۋ كورسەتۋ كەرەك ەكەنىن مىندەتتەگەن. بۇل رەتتە وڭىرلەردە پسيحونەۆرولوگيالىق اۋرۋمەن اۋىراتىنداردى بەيىمدەۋگە باعىتتالعان ورتالىقتار اشۋ ماڭىزدى. اتالعان جايت وبلىس اكىمى بەيبىت يساباەۆتىڭ تۇرعىندارمەن كەزدەسۋىندە دە ءجيى كوتەرىلەدى. ەندى, مىنە, جەتىسۋ وبلىسىندا العاش رەت پسيحونەۆرولوگيالىق اۋرۋلارمەن اۋىراتىندارعا قىزمەت كورسەتەتىن كۇندىزگى بولىمشە اشىلدى.
«جىل باسىندا مەملەكەتتىك الەۋمەتتىك تاپسىرىس اياسىندا پسيحونەۆرولوگيالىق اۋرۋلارى بار 18 جاستان اسقان ادامدارعا جارتىلاي ستاتسيونار جاعدايىندا ارناۋلى الەۋمەتتىك قىزمەت كورسەتۋ ءۇشىن «جان شۋاق – جەتىسۋ» قوعامدىق بىرلەستىگىمەن 3 جىلعا كەلىسىمشارت جاسالدى. ماقساتىمىز مۇگەدەكتىگى بار جانداردى الەۋمەتتەندىرۋ جانە قوعامعا, تاۋەلسىز ومىرگە بەيىمدەۋ ەدى. وسىعان وراي جوبانى جۇزەگە اسىرۋعا وبلىستىق بيۋدجەتتەن قوماقتى قارجى ءبولىندى. قولدانىسقا بەرىلگەن بولىمشە 18 جاستان 35 جاسقا دەيىنگى مۇگەدەكتىگى بار ادامدارعا ارناۋلى الەۋمەتتىك قىزمەت كورسەتۋدە», دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى ەرمەك ميزامباەۆ.
ورتالىقتاعى ەمدىك دەنە شىنىقتىرۋ زالى ۆەلوترەناجەر, جۇگىرۋ جولى قۇرىلعىلارىمەن بىرگە ۇستەل تەننيسى, گانتەل, گير, شاحمات, دويبى, توعىزقۇمالاق, گيمناستيكالىق دوپ, تىگىن ماشيناسى, توقۋعا ارنالعان جيىنتىقتار, جاتتىعۋعا ارنالعان جگۋت, ماسساج كرەسلوسى, مادەني ءىس-شارالار وتكىزۋگە ارنالعان مۋزىكالىق اپپاراتۋرا, ماركەر تاقتاسىمەن جابدىقتالعان. مەديتسينالىق كومەك كورسەتۋگە جانە ارنايى الەۋمەتتىك قىزمەت كورسەتەتىن ماماندارعا ارنالعان كابينەتتەر زاماناۋي قۇرال-جابدىقپەن تولىققان.
«30 ورىنعا ارنالعان بولىمشەگە 18 قىزمەتكەر جۇمىسقا الىندى. ونىڭ ىشىندە پسيحولوگ, دەفەكتولوگ, مۇعالىم, جاتتىقتىرۋشى, الەۋمەتتىك قىزمەتكەر بار. قىزمەت الۋشىلارعا تۇرمىستىق, مەديتسينالىق, پسيحولوگيالىق, پەداگوگيكالىق, ەڭبەك, مادەني, ەكونوميكالىق, قۇقىق سالاسى بويىنشا قىزمەت كورسەتىلەدى. ولاردى تاسىمالداۋ ءۇشىن 16 ورىندى اۆتوكولىك جالعا الىندى. الداعى ۋاقىتتا اۋلانى قورشاپ, جازعى دەمالىس ورىندارى مەن باسسەين قۇرىلىسىن سالۋدى جوسپارلاپ وتىرمىز», دەيدى «جان شۋاق – جەتىسۋ» قوعامدىق بىرلەستىگىنىڭ باسشىسى گۇلناز تىلەۋبەرلينوۆا.
شىنىندا, پسيحونەۆرولوگيالىق اۋرۋمەن اۋىراتىن جاستاردى ۇيدە قاراۋدىڭ ءوزى وتباسى مۇشەلەرىنە سالماق تۇسىرەدى. بۇعان قوسا ولاردىڭ ءومىر ءسۇرۋ ساپاسى, قوعام ومىرىنە قاتىسۋى دا قيىن بولارى انىق. قانشاما اتا-انا ماماندىعى بولسا دا اۋرۋ بالالاردى قارايمىز دەپ جۇمىسقا شىعا الماي ۇيدە وتىرعانىن ەسەپتەي بەرىڭىز. اتالعان بولىمشە اتا-انالاردىڭ سول قيىندىعىن جەڭىلدەتەدى.
«اتا-انا رەتىندە العىسىم شەكسىز. بالا قاراۋمەن ۇيدە وتىرعانىما 15 جىلدان استى. ولاردىڭ جۇرەگى تازا, كوڭىلى پاك بولعانىمەن ورتاعا بەيىمدەلۋى قيىن. كوپ نارسەدەن باس تارتۋعا تۋرا كەلەدى. ماماندىعىم مۇعالىم, بىراق بالا قاراۋمەن جۇمىس ىستەي المادىم. قازىر زەينەتكەرمىن, جۇمىس ءوتىلىم بولماعاندىقتان زەينەتاقىم دا ماردىمسىز. قازىر قانشاما جاس اتا-انا مەن سەكىلدى كۇي كەشىپ ءجۇر. سوندىقتان وسىنداي ورتالىقتار كوبىرەك اشىلسا, ولاردىڭ دا ءوز قالاۋىمەن جۇمىس ىستەۋىنە مۇمكىندىك بولار ەدى», دەيدى تالدىقورعان قالاسىنىڭ تۇرعىنى ءلاززات ارىستانوۆا.
جەتىسۋ وبلىسى