ۇشەمدەردى دۇنيەگە اكەلگەن تالدىقورعان قالاسىنىڭ 28 جاستاعى تۇرعىنى كوپبالالى انا اتاندى. بۇل – جەتىسۋ وبلىسى قۇرىلعاننان بەرى ومىرگە كەلگەن العاشقى ۇشەم. جاس وتباسى كوپتەن كۇتكەن بالالارىنا «اڭساعان ءسابي» باعدارلاماسى ارقىلى قول جەتكىزگەن. جاڭا جىلدان كەيىن دۇنيە ەسىگىن اشقان پەرىشتەلەر شالا تۋعاندىقتان دارىگەرلەر جايدارمان جاڭالىقتى كوپشىلىكتەن جاسىرعان. قازىر سابيلەردىڭ جاعدايى جاقسى.
جالپى, «اڭساعان ءسابي» مەملەكەتتىك باعدارلاماسى شەڭبەرىندە ەكۇ ءۇشىن وتكەن جىلى وڭىرگە 221 كۆوتا بەرىلگەن. ال وسى جىلى 217 كۆوتا بولىنگەن ەكەن. ارينە, بۇل از, دەگەنمەن الداعى ۋاقىتتا بۇدان دا كوپ كۆوتا بەرۋ قاراستىرىلىپ جاتىر. سەبەبى وسى ارقىلى كوپتەگەن اتا-انا قۋانىشقا كەنەلىپ جاتىر.
تالدىقورعاندىق سامال امانجولوۆا مەن ەرنۇر دۇمبەرگەنوۆتەردىڭ شاڭىراعىندا – ۇلكەن قۋانىش. بيىل 10 قاڭتاردا ولاردىڭ ەكى ۇل, ءبىر قىزى مەرزىمىنەن بۇرىن دۇنيەگە كەلدى. مەديتسينا قىزمەتكەرلەرىنىڭ ايتۋىنشا, ۇل بالالار 1800-1850 گر, قىز بالا 1400 گر سالماقپەن تۋعان. دارىگەرلەر ۇشەمدەردى الدىمەن جانساقتاۋ بولىمىندە تۇراقتى باقىلاۋدا ۇستاپ, ءتيىستى ەم-شارالاردى جاساپ, كەيىن پالاتاعا شىعارىپ, كۇتىپ-باپتاعان. ەداۋىر سالماق جيناپ, جاعدايى جاقسارعان ۇشەمدەر مەن ولاردىڭ اناسىن بۇگىن تالدىقورعانداعى پەريناتالدىق ورتالىقتاعىلار سالتاناتتى راسىممەن ۇيىنە شىعارىپ سالدى.
«ۇشەمدەر 30 اپتا 5 كۇن مەرزىمىندە ومىرگە كەلدى. العاشقى كۇندەرى ولاردىڭ جاعدايى اۋىر بولدى, ءۇش كۇن ارنايى اپپاراتتا جاتتى. بالالاردىڭ دەنساۋلىعىن ءبىر ايدان اسا ۋاقىت دارىگەرلەر باقىلاۋدا ۇستادى. العاشىندا ولاردىڭ سالماعى 1400-1800 گرامم شاماسىندا بولعان. ءبىر اي كولەمىندە نارەستەلەر 400 گرامعا دەيىن سالماق قوستى. بۇگىندە بالالاردىڭ دەنساۋلىعى قالىپتى», دەيدى تالدىقورعانداعى وبلىستىق پەريناتالدىق ورتالىقتىڭ ءبولىم مەڭگەرۋشىسى, شتاتتان تىس نەوناتولوگ دانيار راسۋلوۆ.
جاس جۇبايلار سابيلەرىنە زەينەپ, زەيىن جانە زەينۇر دەگەن ەسىم بەردى. دۇمبەرگەنوۆتەردىڭ تۇڭعىشى قازىر – 10 جاستا. ءسويتىپ, جاس وتباسى كوپبالالى اتانىپ وتىر.
«قۇدايدىڭ قالاۋىمەن, ەكۇ-نىڭ سەبەپشى بولۋىمەن كوپتەن كۇتكەن سابيلەرىمىز ومىرگە كەلدى. ۋزي ارقىلى ۇشەم ەكەنىن بىلگەندە تاڭعالدىق ءارى قۋاندىق. جۇكتىلىك كەزەڭى جاقسى ءوتتى. دەگەنمەن 7 ايلىق مەرزىمدە قيىندىقتار تۋىنداپ, دارىگەرلەردىڭ مەنى كەسارەۆو تاسىلىمەن جەدەل بوساندىرىپ الۋىنا تۋرا كەلدى. وپەراتسيا جاساپ, نارەستەلەرىمىزدىڭ امان-ەسەن ومىرگە كەلۋىنە ەڭبەك سىڭىرگەن اكۋشەر-گينەكولوگ زەينەگۇل راحمەتوۆاعا ايتار العىسىم شەكسىز. وپەراتسيا ۇستەلىنە اپارعاندا قاتتى قورىقتىم, بىراق دارىگەر ماعان ءبارىن ءتۇسىندىرىپ, كوڭىلىمدى تىنىشتاندىرىپ, قورقىنىشىمدى جەڭۋىمە كومەكتەستى. جولداسىم ەكەۋمىز اق جەلەڭدى ابزال جاننىڭ قۇرمەتىنە قىزىمىزدىڭ اتىن زەينەپ دەپ اتادىق, ۇلدارىمىزعا زەيىن, زەينۇر دەگەن ەسىم بەردىك. سونىمەن قاتار دارىگەر راۋشان جۇسىپقىزىنا دا ريزاشىلىعىمدى بىلدىرەمىن. قان قىسىمىم كوتەرىلىپ, دەنساۋلىعىم سىر بەرگەندە ەم-دوم جاساپ, «سامال, بالالار ءۇشىن ءوزىڭدى مىقتى ۇستاۋىڭ كەرەك», دەپ ۇنەمى ماعان موتيۆاتسيا بەرىپ وتىردى. بۇگىن, مىنە, ۇيىمىزگە بارامىز. باۋىرلارى مەن ءسىڭلىسىن ۇيدە 10 جاستاعى اپكەسى اسىعا كۇتىپ وتىر», دەيدى سامال امانجولوۆا.
وبلىستىق دەنساۋلىق ساقتاۋ باسقارماسىنىڭ وكىلدەرى ۇشەمدەردى شىعارىپ سالۋ راسىمىنە ارنايى بارىپ, سابيلەرگە ارنالعان جورگەكتەر جيىنتىعىن سىيعا تارتتى. وبلىستىق پەريناتالدىق ورتالىقتىڭ بوسانۋدان كەيىنگى ءبولىمىنىڭ مەڭگەرۋشىسى زەينەگۇل بەيسەنعاليقىزىنىڭ ايتۋىنشا, بۇل – ونىڭ ەڭبەك تاجىريبەسىندە ومىرگە كەلگەن ءۇشىنشى ۇشەم.
«رەزيدەنتۋرانى اياقتاعان سوڭ الماتى قالاسىندا ءبىر جىل جۇمىس ىستەدىم. سول ۋاقىتتا ۇشەمدەردىڭ امان-ەسەن ومىرگە كەلۋىنە اتسالىسىپ, بىرنەشە وپەراتسيادا دارىگەرلەردىڭ كومەكشىسى بولدىم, ال وسى جولى وپەراتسيانى دارىگەر رەتىندە ءوزىم جاسادىم. تالدىقورعانداعى وبلىستىق پەريناتالدىق ورتالىقتا جۇمىس ىستەپ جاتقانىما 5 جىل بولدى, جالپى دارىگەرلىك ەڭبەك ءوتىلىم – 10 جىل. وسى جولعى وپەراتسيا كۇردەلى بولدى, دەگەنمەن ءبارىمىزدىڭ ورتاق كۇش بىرىكتىرۋىمىز ارقىلى ءساتتى ءوتتى», دەيدى جاس مامان.
وسى رەتتە تاعى ءبىر قۋانىشتى جاڭالىقپەن بولەسە كەتسەك دەيمىز. سارقان كەنتىندە 43 جاستاعى ايەل ونىنشى پەرزەنتىن ومىرگە اكەلدى. كوپبالالى انا جاسيا جاناتبەك جولداسى ەكەۋى 7 قىز, 3 ۇل ءوسىرىپ وتىر. بۇل تۋرالى سارقان اۋدانىنىڭ اكىمدىگى ايتىپ بەردى.
باعدار مەن جاسيا سارقان قالاسىندا 15 جىلدان بەرى تۇرادى, 10 بالا تاربيەلەپ وتىرعان وتباسىنىڭ كەنجە قىزى ياسمين جۋىردا ومىرگە كەلدى. انانىڭ ونىنشى پەرزەنتىن ومىرگە اكەلۋگە سارقان اۋداندىق ورتالىق اۋرۋحاناسىنىڭ دارىگەرلەرى كومەكتەستى.
«جاسيا جاناتبەك – 1980 جىلعى ازامات. جالپى جۇكتىلىك مەرزىمى قالىپتى ءوتتى, وعان ايەلدىڭ ءوز كوڭىل كۇيىن جاقسى ۇستاۋى دا اسەر ەتەدى. كورسەتىلىمىنە بايلانىستى 4 اقپاندا كەسارەۆو جاسالدى. قازىر انا مەن بالانىڭ جاعدايى جاقسى. بۇگىن ولاردى ۇيىنە شىعاردىق. ءبىزدىڭ اۋرۋحانا ءۇشىن ونىنشى پەرزەنتىن بوساندىرىپ الۋ – سيرەك قۇبىلىس», دەيدى اۋداندىق اۋرۋحانانىڭ پەرزەنتحانا ءبولىمىنىڭ مەڭگەرۋشىسى عاليا مەنيسوۆا.
وتباسىنىڭ تۇڭعىشى حاحيدا – 23 جاستا, قازىر ونىڭ ءوزى وتاۋ قۇرىپ, ەكى بالانىڭ اناسى بولىپ وتىر. ەكىنشى قىزى روزا – 19 جاستا, ستۋدەنت. الماتى قالاسىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ 2-كۋرسىندا وقيدى. ۇلجان, ۇلىحان, جامبىل مەن ايتورە – ءالى وقۋشى, كىشىلەرى ەگىز يمران مەن ياسين – ءۇش جاستا. جاسيا جاناتبەك «كۇمىس القا», «التىن القامەن» ماراپاتتالعان. جولداسى باعدار مال شارۋاشىلىعىمەن اينالىسادى.
سارقان اۋداندىق ورتالىق اۋرۋحاناسىنىڭ پەرزەنتحانا ءبولىمىنىڭ مالىمەتىنە قاراعاندا, جىل باسىنان بەرى دارىگەرلەر 20-دان اسا ايەلدى امان-ەسەن بوساندىرىپ, شىعارعان. سونىڭ ۇشەۋى – 40 جاستان اسقان انالار.
جالپى جىل باسىنان بەرى جەتىسۋ وبلىسىندا 977 بالا ومىرگە كەلگەن.
جەتىسۋ وبلىسى