مەملەكەت باسشىسى اكىمدەردىڭ حالىقپەن تىعىز بايلانىستا بولۋىن تاپسىرعان ەدى. سول ارقىلى ەلدىڭ مۇڭ-مۇقتاجى انىق كورىنەتىنى ايان. وسى رەتتە شاھار باسشىسى ەرنات ءبازىل تالدىقورعاندى قوعامدىق كولىكپەن ارالاپ, جۇرتتىڭ تىلەگىن تىڭدادى. جەتىسۋلىقتار وزىمەن ەركىن تىلدەسكەن قالا اكىمىنىڭ قاراپايىمدىلىعىنا ريزا بولدى.
مۇنى ءبىز وزگە دە اكىمدەرگە ۇلگى بولسىن دەگەن نيەتتە جازىپ وتىرمىز. ەستەرىڭىزدە بولسا, ەل پرەزيدەنتى قاسىم-جومارت توقاەۆ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا «حالىق ۇنىنە قۇلاق اساتىن مەملەكەت» تۇجىرىمداماسىن بەكىتكەن ەدى. ياعني مەملەكەتتىك قىزمەتكەر حالىقتىڭ تىلەك-ارىزىن جەرگە تاستاماي, ماسەلەسىن شەشۋگە ۇمتىلۋى شارت. سوعان وراي قالا باسشىسى قىزمەتتىك كولىگىنسىز, جالعىز ءوزى ەل ءىشىن قوعامدىق كولىكپەن ارالاپ, تۇرعىندارمەن تىلدەستى.
قالا اكىمىن بىردەن تانىعان جۇرتشىلىق ونىڭ بۇل باستاماسىن قولداپ, حالىقپەن بىرگە قوعامدىق كولىكپەن ءجۇرىپ قالا ءىشىن ارالاپ جۇرگەن ەڭ العاشقى اكىم ەكەندىگىن ايتتى.
«اكىمنىڭ اۆتوبۋسقا وتىرعانى جاقسى بولدى. كەيبىر اۆتوبۋستاردى ۇزاق كۇتەمىز, قالا سىرتىنداعى ساياجايلارعا باراتىن قوعامدىق كولىكتەر وتە از. ودان كەيىن قالانىڭ ىشكى جولى وتە ناشار. ورتالىق بازاردا ادام جۇرەتىن جولدارعا تۇرعىندار كولىكتەرىن قويىپ تاستايدى. وسى ماسەلەلەردى قاراۋىڭىزعا الساڭىز», دەدى قالا تۇرعىنى گۇلداريا انۋاربەك.
ادەتتەگىدەي قالا اكىمى تۇرعىنداردىڭ جەكە ماسەلەلەرىن كابينەتتە ەمەس, تۇرعىندارعا تولى اۆتوبۋستا تىڭداپ, كەي ماسەلەنى جەكە باقىلاۋىنا الاتىندىعىن جەتكىزدى.
«كەيىنگى ۋاقىتتا قوعامدىق كولىكتە بولاتىن كەلەڭسىز جايت جيىلەپ كەتكەنىن الەۋمەتتىك جەلىدەن بايقاپ وتىرمىن. وسى ماسەلەگە قاتىستى حالىقتىڭ پىكىرىن تىڭداپ, تۇراقتى تۇردە قالانى قوعامدىق كولىكپەن ارالاماقپىن. جۇرتشىلىقتىڭ ماسەلەسىن ءجىتى كورۋگە مۇمكىندىك بەرەدى ەكەن», دەدى ە.ءبازىل.
سونىمەن قاتار قالا باسشىسى كوممۋنالدىق بازارمەن ورتالىقتا جايعاسقان ساۋدا نىساندارىن دا ارالادى. الداعى ۋاقىتتا بۇل ءۇردىس ادەتكە اينالماق. تۇرعىندارمەن تىعىز قارىم-قاتىناس ورناتۋ ءۇشىن جانە قالانىڭ ىشكى ماسەلەسىمەن ءجىتى تانىسۋ ءۇشىن وزگە دە اۆتوبۋستارمەن وبلىس ورتالىعىن ارالايدى.
جەتىسۋ وبلىسى