جەتىسۋلىقتار ءار اپتانىڭ اياعىندا «جاستار» جانە «جەڭىس» ساياباقتارىنا كەلىپ, سەنبىلىك سپورتتىق ءىس-شارالارعا قاتىسا الادى. دەنە قىزدىرۋدان باستاپ ءتۇرلى قوزعالىسقا ارنالعان جاتتىعۋلار جاسايدى. بەلسەندى قاتىسقاندارعا ۇيىمداستىرۋشىلار تاراپىنان سىي-سياپات تا قاراستىرىلعان.
العاشقى بولعان ءىس-شاراعا ءتۇرلى جاستاعى 500-گە جۋىق ادام قاتىستى. «بۇل ءىس-شارانىڭ نەگىزگى ماقساتى – بۇقارالىق سپورتتى قارقىندى دامىتىپ, سالاماتتى ءومىر سالتىن ۇستانۋ. وڭىرىمىزدە دەنەشىنىقتىرۋمەن اينالىساتىنداردىڭ سانىن كوبەيتۋ. باستامامىزدى قولداپ كەلگەندەرگە العىسىم شەكسىز, كەلەسى سەنبىدە قاتارىمىز بۇدان دا كوپ بولادى دەپ ويلايمىن», دەيدى وبلىستاعى بۇقارالىق-سپورتتىق ءىس-شارالاردى وتكىزۋ ورتالىعىنىڭ ديرەكتورى رۇستەم قاليەۆ.
مامانداردىڭ ايتۋىنشا, تاڭعى دايىندىق ادامنىڭ يممۋندىق قابىلەتىن ارتتىرىپ, قان اينالىمىن رەتتەيدى. سونىمەن قاتار كۇنى بويى سەرگەك جۇرۋگە سەپتىگىن تيگىزەدى.
ءار سەنبى سايىن وتەتىن دەنساۋلىق كۇنىندە تاڭعى گيمناستيكا, تاڭعى سەرۋەن, ءتۇرلى سپورتتىق ويىندارمەن قاتار ىستىق شاي مەن تاتتىلەر دە ۇيىمداستىرىلعان. جينالعاندار اراسىندا وبلىستاعى ارداگەرلەردى باستاپ كەلگەن ەرمەك كەلىمسەيىت تە بولدى. ول «دەنساۋلىق فەستيۆالى» وتەتىنىن ەستىگەن بەتتە ۇيىندە جاتا الماعان.
«قالامىزدا سپورتقا دەگەن قولداۋ جاقسى. اسىرەسە ۇلكەندەر قاۋىمىنىڭ وسىنداي ءىس-شاراعا قاتىسىپ, جاستارعا ۇلگى كورسەتىپ جاتقاندىعى قۋانتادى. بۇل جەردە, ەڭ باستىسى, اركىم ءوز دەنساۋلىعىن نىعايتىپ, سالاماتتى ءومىر سالتىن دۇرىس جولعا قويۋعا مۇمكىندىك الادى», دەيدى ە.كەلىمسەيىت.
ءىس-شارا سوڭىندا بەلسەندىلىگىمەن كوزگە تۇسكەندەر ماقتاۋ قاعازدارى جانە باعالى سىيلىقتارمەن ماراپاتتالدى. ۇيىمداستىرۋشىلاردىڭ ايتۋىنشا, ەندى اپتانىڭ ءار سەنبىسىندە وسىنداي بۇقارالىق سپورتتىق ءىس-شارالار ءوتىپ تۇرادى.
جەتىسۋ وبلىسى