قىزىلورداداعى «بولاشاق» ۋنيۆەرسيتەتى قازاق كينو ونەرىندەگى شوقتىعى بيىك تۇلعا, رەجيسسەر شاكەن ايمانوۆتىڭ 110 جىلدىعىنا ورايلاستىرىپ, «ۇلت بولمىسىنا ۇستىن بولعان ونەر» اتتى كەزدەسۋ كەشىن وتكىزدى.
تەاتر مەن كينودا قايتالانباس كەيىپكەرلەر گالەرەياسىن قالىپتاستىرىپ, تۇڭعىش كينورەجيسسەر رەتىندە مادەني قازىنامىزدى جاۋھار دۇنيەلەرمەن بايىتقان ۇلت ماقتانىشىنىڭ رۋحى ۇلىقتالعان كەزدەسۋگە قازاقستاننىڭ ەڭبەك ەرى, قازاقستان جانە كسرو حالىق ءارتىسى ءاسانالى ءاشىموۆ قاتىستى.
ۋنيۆەرسيتەت ۇجىمىمەن كەزدەسۋدە ايگىلى ونەر يەسى سىرعا جاساعان ءار ساپارىنان ەرەكشە اسەر الاتىنىن ايتتى. بىراق بۇل جولعى جۇزدەسۋدىڭ ورنى بولەك.
«شاكەن ايمانوۆ شىن مانىندە, دياپازونى كەڭ دارىن بولدى. مەن ول كىسىنىڭ 3–4 فيلمىنە ءتۇستىم. شاكەڭدەي تالانتقا شاكىرت بولعانىمدى تاعدىردىڭ سىيى دەپ سانايمىن. ول كىسى جان-جاقتى ەدى. اعىلشىن تەاترى مەن كينوسىنىڭ كورنەكتى تۇلعاسى وليۆە لوۋرەنسپەن سىيلاستىعى – بولەك اڭگىمەنىڭ جۇگى. ال اۋىلعا بارا قالسا, قارتتارمەن دە سولاردىڭ قاتارىنداي سويلەسە بەرەتىن. بۇل ۋنيۆەرسيتەتتىڭ شاكەڭنىڭ مەرەيتويىن اتاپ ءوتۋدى ونىڭ اتىن يەلەنگەن «قازاقفيلم» ستۋدياسىنان بۇرىن باستاپ جاتقانىنا تاڭعالىپ تا, ريزا بولىپ تا وتىرمىن», – دەدى ءاسانالى ءاشىموۆ.
كەزدەسۋدە شاكەن ايمانوۆ تۇسىرگەن فيلمدەردەن اندەر ورىندالدى. ۋنيۆەرسيتەت وقىتۋشىلارى مەن ستۋدەنتتەر قادىرلى قوناققا ساۋال قويىپ, اڭگىمە ارقاۋى كينو ونەرىنىڭ بۇرىنعىسى مەن بۇگىنگىسىنە, جالپى قوعامداعى قۇندىلىقتارعا ويىستى.
ۋنيۆەرسيتەت قۇرىلتايشىسى باقبەرگەن دوسمامبەتوۆ مارتەبەلى مەيماندارعا العىسىن جەتكىزدى. ءاسانالى اشىموۆكە «بولاشاق» ۋنيۆەرسيتەتىنىڭ قۇرمەتتى پروفەسسورى» مارتەبەلى اتاعىن تاپسىرىپ, قۇرمەت كورسەتتى.
قىزىلوردا