بىلتىر جىل باسىنان تارتىلعان 54,1 ملرد تەڭگە ينۆەستيتسيا جىلدىق جوسپاردىڭ تەك 63 پايىزىن قۇراپ وتىر. نەگىزىندە وتكەن جىلى جەتىسۋعا 86 ملرد تەڭگە ينۆەستيتسيا سالىنادى دەپ كۇتىلگەن. قازىر اگرارلى ءوڭىر سىرتتان ينۆەستورلار ىزدەستىرىلىپ جاتىر. وسى ماقساتتا وبلىس اكىمى بەيبىت يساباەۆ پولشادان كەلگەن بيزنەسمەندەر دەلەگاتسياسىمەن كەزدەستى. ولار وسىندا قۇس پەن سيىر ەتىن وڭدەۋگە, تۇقى بالىعىن وسىرۋگە نيەتتى.
تىكەلەي شەتەلدىك ينۆەستيتسيا از تارتىلعان وڭىرلەردىڭ قاتارىندا جەتىسۋ وبلىسى دا بار. جاڭادان قۇرىلعان ءوڭىردىڭ بۇل باعىتتا باياۋ ىلگەرىلەپ كەلەدى. رەسمي قوناقتارعا جىلى قۇرمەتىن بىلدىرگەن وبلىس اكىمى جەتىسۋدا 5 ستراتەگيالىق باعىت بويىنشا ءوڭىردىڭ ينۆەستيتسيالىق تارتىمدىلىعىن ارتتىرۋ جۇمىستارى ءجۇرىپ جاتقانىن اتاپ ءوتتى.
«لوگيستيكالىق جانە ترانزيتتىك تۇرعىدا جەتىسۋ ءوڭىرى گەوستراتەگيالىق جاعىنان دا, گەوەكونوميكالىق جاعىنان دا ءتيىمدى ورنالاسقان. سونىمەن قاتار ايماقتىڭ تابيعي-كليماتتىق جاعدايى قولايلى, توپىراعى قۇنارلى, سۋى بار, مۇنىڭ ءبارى اۋىل شارۋاشىلىعىنىڭ بەلسەندى دامۋىنا وڭ ىقپال ەتەدى. جانىمىزدا ەكى ۇلكەن نارىق – رەسەي مەن قىتاي ورنالاسقان. ونىڭ ۇستىنە, ءبىزدىڭ اۋماق ارقىلى باتىس ەۋروپا – باتىس قىتاي اۆتوماگيسترالى وتەدى, «قورعاس» حالىقارالىق شەكارالىق ىنتىماقتاستىق ورتالىعى, سونداي-اق «قورعاس – شىعىس قاقپاسى» ەركىن ەكونوميكالىق ايماعى تابىستى جۇمىس ىستەپ جاتىر, مۇندا قىتايمەن شەكاراداعى تەمىرجول جانە اۆتوموبيل وتكەلدەرىن ايتپاعاننىڭ وزىندە ينۆەستيتسيالىق جوبالاردى جۇزەگە اسىرۋعا قاجەتتى بارلىق ينفراقۇرىلىم بار. ارنايى ەكونوميكالىق ايماققا ەت كومبيناتىن ورنالاستىرۋعا بولادى, بۇل جەر ەكسپورتقا باعىتتالعان ونىمدەردى وتكىزۋگە ىڭعايلى», دەدى ب.يساباەۆ.
ءوز كەزەگىندە «موستسيبرودىداعى ەت كومبيناتى» وتباسىلىق كاسىپورنىنىڭ پرەزيدەنتى, پولشا رەسپۋبليكاسى پارلامەنتىنىڭ دەپۋتاتى كشيشتوف بوركوۆسكي جىلى قابىلداۋ ءۇشىن العىس ايتا وتىرىپ, كۇركەتاۋىق پەن تاۋىق ەتىن وڭدەيتىن ەكسپورتقا باعىتتالعان زاۋىت سالۋ نيەتىن جەتكىزدى. سول سياقتى قۇس باسىن ءوسىرۋ ءۇشىن فابريكا سالاتىن دا ويلارى بار.
«ساپالى ءارى پايدالى ءونىم شىعارۋ ءۇشىن كاسىپورىنعا وزىق تەحنولوگيالاردى ەنگىزەمىز. سول جابدىقتاردا تاۋىق پەن كۇركەتاۋىقتان باسقا سيىر ەتىن دە وڭدەۋگە بولادى. ءونىمىمىزدى جەرگىلىكتى نارىققا, سونىمەن قاتار قىتاي مەن رەسەيگە ساتقىمىز كەلەدى. ءبىز سونداي-اق جاساندى سۋ قويمالارىندا تۇقى بالىعىن وسىرۋگە ماماندانعانبىز, مەن ءوز ەلىمدە وسى سالالاردا جۇمىس ىستەيمىن, بۇدان بولەك مەنىڭ ەكى ەت كومبيناتىم جۇمىس ىستەپ تۇر», دەدى پولياك ينۆەستورى. وعان قوسا ول جەرگىلىكتى فەرمەرلەردى كۇركەتاۋىق ءوسىرۋ ادىستەرىنە ۇيرەتۋگە دايىن ەكەنىن جەتكىزدى.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, اۋىل شارۋاشىلىعى سالاسىنا, سونىڭ ىشىندە ەت پەن ءسۇت وڭدەۋگە ينۆەستور تارتۋ وڭىردەگى باسىم باعىتتىڭ ءبىرى. بۇل جوبالاردىڭ قىزىعۋشىلىق تۋدىراتىنىن باسا ايتقان ايماق باسشىسى مال ازىعى قورىن قۇرۋ ماسەلەسىن جەرگىلىكتى شارۋالاردىڭ كومەگىمەن شەشۋدى ۇسىندى, ولارمەن كاسىپكەر ءتيىستى كەلىسىمشارتتار جاساي الادى.
«مۇنداي جوبالار ءبىزدىڭ وبلىسقا كەرەك. ەلىمىزدىڭ زاڭدارى اياسىندا سىزدەرگە قاجەتتى قولداۋ كورسەتۋگە, اشىق ىنتىماقتاستىققا دايىنبىز. ازىرگە كاسىپورىندى ورنالاستىرۋعا قاتىستى قولدا بار مۇمكىندىكتەرىمىز بەن ۇسىنىستارىمىزدى ەگجەي-تەگجەي زەردەلەپ, سونداي-اق ءسىز ۇسىنىپ وتىرعان جوبالاردى جۇزەگە اسىرۋ جولدارىن بىرلەسىپ جان-جاقتى پىسىقتاۋىمىز قاجەت», دەپ تۇيىندەدى ءسوزىن ب.يساباەۆ.
كەزدەسۋ سوڭىندا تاراپتار ەكىجاقتى ىنتىماقتاستىقتى دامىتۋ تۋرالى شەشىم قابىلداپ, ينۆەستورلاردىڭ جاقىن اراداعى ايماققا ساپارى جونىندە ۋاعدالاستى.
جەتىسۋ وبلىسى