تەكەلى تاۋلارىنىڭ باۋرايىندا « ۇلى دالا ءدۇبىرى: ساياتشىلار سايىسى» ۇلتتىق ويىنى ءوتتى. V دۇنيەجۇزىلىك كوشپەلىلەر دوداسى اياسىندا قولعا العان مادەني ءىس-شارا رۋحىمىزدى اسقاقتاتتى. ساياتشىلىقتى سەرىك ەتكەن سەرىلەر دالا ءتوسىن دۇبىرگە بولەپ, قۇس ۇشىرىپ, تازى جۇگىرتتى.
مەملەكەت باسشىسى قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا: «دۇنيەجۇزىلىك كوشپەلىلەر ويىنىن وتكىزۋ دە ەلىمىز ءۇشىن ايتۋلى وقيعا بولماق. بايراقتى باسەكە ۇلتتىق سپورت پەن سالاماتتى ءومىر سالتىن دارىپتەۋ جاعىنان دا, ۇلى دالاداعى كوشپەلىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋ تۇرعىسىنان دا ماڭىزدى ەكەنى ءسوزسىز» دەگەن ەدى. وسى ماقساتتا جەتىسۋ تورىندە بايىرعى بابا ءداستۇرى قايتا جاڭعىردى.
كوپكە ايان, بيىل استانادا ەتنيكالىق سپورت تۇرلەرىنەن وتەتىن دۇنيەجۇزىلىك كوشپەلىلەر ويىندارىنا جۇزدەن استام مەملەكەتتەن 4 مىڭعا جۋىق سپورتشى قاتىسپاق. وندا ات سپورتى, ۇلتتىق كۇرەس تۇرلەرى, ساداق اتۋ, جامبى اتۋ, ءداستۇرلى ينتەللەكتۋالدى ويىندار, ساياتشىلىق ونەر, ارقان تارتۋ سىندى ويىننىڭ 20 تۇرىنەن جارىس ۇيىمداستىرىلادى.
«ساياتشىلىق ونەردىڭ ءسان-سالتاناتى, دەلەبەنى قوزدىراتىن وزگەشە قاسيەتىمەن بىرگە تىلسىم قۇپياسى دا جەتەرلىك. سوعان قۇمارتىپ, ساياتشىلار سايىسىن تاماشالاۋعا جينالعان كوپشىلىكتىڭ كوڭىل كۇيى شالقىپ-تاسىپ, بابىندا تۇرعان جۇيرىك ات, قۇماي تازى, قىران قۇستار كوز قۋانتادى. ارنايى كورمە ۇيىمداستىرىلىپ, ەر-توقىم, جۇگەن, نوقتا, ايىل, كۇيىسقان, ومىلدىرىك, قامشى سەكىلدى ات ابزەلدەرى مەن توماعا, تۇعىر, بالاقباۋ, ىرگەباۋ, بيالاي سەكىلدى قۇس ابزەلدەرى نازارعا ۇسىنىلدى. بۇل – عاجاپ دۇنيە», دەيدى وبلىستىق «جەتىسۋ ساياتشىلارى» ۇلتتىق سپورت تۇرلەرى فەدەراتسياسىنىڭ پرەزيدەنتى بۇركىتباي فايزوللا.
سايىس باسىندا تەكەلى قالالىق ارداگەرلەر كەڭەسىنىڭ توراعاسى ەرتاي دۇيسەباەۆ باتا بەرىپ, قاتىسۋشىلارعا ساتتىلىك تىلەدى. سونداي-اق وسى يگىلىكتى ىسكە ۇيىتقى بولعان جاندارعا العىس ايتتى.
قىران قۇستىڭ ءتىلىن تاپقان قۇسبەگىلەر قالالىق سايىسقا 6 بۇركىت اكەلىپتى. ولار قولعا شاقىرۋ, شىرعا تارتۋ, قويان جانە تۇلكىگە سالۋ كەزەڭدەرىندە قىراعىلىعى مەن بابىن كورسەتتى. سايىس قورىتىندىسىندا ەركە اتتى بۇركىتىمەن ازەن ءشايماردان ۇلى توپ جاردى. ودان كەيىن اقجەلكە اتتى بۇركىتىمەن تۇسەي ابدىكارىم ۇلى وزا شاپتى. ال ءۇشىنشى ورىندى ايقاباق اتتى بۇركىتىمەن جاسۇلان بۇركىتباي ۇلى يەلەندى.
قۇماي تازىلار جارىسىندا تەكەلى قالاسى جانە ىرگەلەس جاتقان سىرىمبەت, جەتىسۋ اۋىلدارىنان 14 تازى باق سىنادى. قادىرحان ادىلبەكوۆتىڭ «ۇشارى» جەڭىمپاز اتانسا, ەكىنشى ورىندى بەكسۇلتان ناۋحانوۆتىڭ «قىرانى» قانجىعالادى. ءۇشىنشى تۇعىردان كەرىلبەك باياننىڭ «اقتوسى» كورىندى.
سايىس سوڭىندا قالا اكىمى الماس ءادىل مەن قالالىق ءماسليحات توراعاسى باۋىرجان تۇعىلباەۆ جۇلدەگەرلەرىن قۇتتىقتاپ, ارنايى ديپلوم مەن اقشالاي سىي-سياپات تابىس ەتتى.
جەتىسۋ وبلىسى