وسىدان بەس جىل بۇرىن قۇرىلعان «جاس سارباز» قوزعالىسى بالالار بويىندا مەكتەپتەن باستاپ ۇلتتىق رۋح ۇيالاتادى. ەلىمىزدىڭ بارلىق وڭىرىندە جاساقتالعان ۇيىم وقۋشىلارعا دەنەشىنىقتىرۋمەن ەركىن اينالىسۋعا مۇمكىندىك بەرەدى. ەڭ باستىسى, جاستايىنان اسكەري ماماندىقتاردى يگەرۋىنە جول اشادى. بۇل ۇيىم قورعانىس مينيسترلىگىمەن بىرلەسىپ, پاتريوتتار تاربيەلەۋ ىسىنە بەلسەندى اتسالىسىپ كەلەدى. بۇگىندە گەوگرافياسى كەڭەيىپ, قۇرامى 280 مىڭ تاربيەلەنۋشىگە جەتكەن.
«جاس سارباز» بالالار-جاسوسپىرىمدەر اسكەري-پاتريوتتىق قوزعالىسىنىڭ ەل ءۇشىن ماڭىزى زور. جاقىندا قورعانىس ءمينيسترىنىڭ ورىنباسارى, گەنەرال-لەيتەنانت مۇحامەدجان تالاسوۆتىڭ باسشىلىعىمەن ارنايى جيىن ءوتىپ, ۇيىمنىڭ كەلەر جىلى ىسكە اساتىن نەگىزگى جوبالارى تانىستىرىلدى.
«بەس جىل ىشىندە «جاس سارباز» قوزعالىسى ءوز ۇستانىمىن نىعايتىپ, تۇجىرىمدامالىق نەگىزدەر مەن داستۇرلەرگە يە بولدى. بۇگىندە اسكەري-پاتريوتتىق قوزعالىس ەلىمىزدىڭ بارلىق وڭىرىندەگى 280 مىڭعا جۋىق بالانى قامتىپ وتىر. قوزعالىس تاربيەلەنۋشىلەرى وتانسۇيگىشتىك رۋحتا تاربيەلەنىپ كەلەدى», دەدى گەنەرال-لەيتەنانت م.تالاسوۆ.
ودان كەيىن «جاس سارباز» بالالار-جاسوسپىرىمدەر قوزعالىسىنىڭ قۇرىلتايشىلار قاتارى تولىعىپ, ولارعا توسبەلگىلەر مەن كۋالىكتەر تابىس ەتىلدى. قوزعالىس اكتيۆىنىڭ كەڭەيتىلگەن جينالىسىندا قوعامدىق بىرلەستىك بەلسەندىلەرىن, پەداگوگتەردى, اسكەري قىزمەتشىلەردى, ازاماتتىق پەرسونال مەن جۇرتشىلىق وكىلدەرىن سالتاناتتى ماراپاتتاۋ ءراسىمى ءوتتى.
جۇماليەۆتەر جانە ماحمەتوۆتەر وتباسى ارنايى «جاس سارباز العىسى: اتا-اناعا» اتالىمىن قانجىعاسىنا بايلادى. ال رومان وگاي, مولداباي سۇيىندىكوۆ جانە ۆلاديمير يلگنەردىڭ كوپجىلدىق پەداگوگتىك ەڭبەگى «جاس سارباز العىسى: ۇستازعا» اتالىمىمەن اتالىپ ءوتتى. شىعىس قازاقستان وبلىسىنا قاراستى التاي قالاسىنداعى ساعادات نۇرماعامبەتوۆ اتىنداعى №8 ورتا مەكتەبىنىڭ ديرەكتورى ەكاتەرينا پۋتيلينا مەن پاۆلودار قالاسى قابانباي باتىر اتىنداعى «جاس سارباز» وبلىستىق مامانداندىرىلعان مەكتەپ-ينتەرناتىنىڭ ديرەكتورى يران بەكتەمىروۆكە «جاس سارباز العىسى: تالىمگەرگە» اتالىمى تابىستالدى.
«جاس سارباز» قوزعالىسىنىڭ ءىس-شارالارىنا بەلسەندى قاتىسقان تۇركىستان وبلىسىنىڭ قورعانىس ىستەرى جونىندەگى دەپارتامەنتى باستىعىنىڭ ورىنباسارى, پودپولكوۆنيك جاندوس كۇلدەرباەۆ پەن تالعات بيگەلدينوۆ اتىنداعى «جاس ۇلان» رەسپۋبليكالىق مەكتەبى باستىعىنىڭ ورىنباسارى, مايور ارمان قالدىبەكوۆ «جاس سارباز العىسى: تاربيەشىگە» سىيلىعىن يەلەندى. الەۋمەتتىك جەلىلەر مەن باق-تا تاراتىلاتىن تاقىرىپتىق بەينەروليكتەر مەن فيلمدەردى جاساۋدا كومەك كورسەتكەن قورعانىس مينيسترلىگى مەديا-كونتەنت ورتالىعى مونتاجداۋ جانە ديزاين باسقارماسىنىڭ باستىعى ءسانيا سادىقوۆا «جاس سارباز العىسى: جاناشىرعا» اتالىمىندا جەڭىمپاز بولىپ تانىلدى.
جيىن بارىسىندا جەتىسۋ وبلىسىنىڭ اسكەري پاتريوتتىق تاربيە جۇمىستارى جوعارى باعالانىپ, اتالعان ۇيىمنىڭ وڭىرلىك فيليالىنىڭ توراعاسى ايبول قاسەنوۆ, العاشقى اسكەري دايىندىق ۇستازدارى جاندوس قاناپيەۆ, فەدور گونچاروۆ, داستان دۇيسەمبەكوۆ «جاس سارباز» قوزعالىسىنىڭ مەرەيتويلىق توسبەلگىسىمەن ماراپاتتالدى.
قازىر جەتىسۋدا وتان الدىندا بورىشىن وتەۋگە اسىققان جىگەرلى جاستار كوپ. وعان اتالعان ۇيىمنىڭ قوسقان ۇلەسى زور. وبلىسقا جۇمىس ساپارىمەن كەلگەن قارۋلى كۇشتەر باس شتابى ۇيىمداستىرۋ-جۇمىلدىرۋ جۇمىستارى دەپارتامەنتىنىڭ باستىعى, گەنەرال-مايور باۋىرجان ارتىقوۆ ۇشتوبە قالاسىنداعى جيناقتاۋ پۋنكتىنىڭ قۇرىلىس نىسانىن ارالاپ كوردى. سودان سوڭ وبلىستىق قورعانىس ىستەرى جونىندەگى دەپارتامەنتى, وبلىستىق جيناقتاۋ پۋنكتى, تالدىقورعان قالاسىنىڭ قورعانىس ىستەرى جونىندەگى باسقارماسى, سارقان, اقسۋ, ەسكەلدى جانە كەربۇلاق اۋدانى قورعانىس ىستەرى جونىندەگى بولىمدەرىمەن تانىستى. قالالىق قورعانىس ىستەرى جونىندەگى ءبولىمنىڭ باستىعى, پودپولكوۆنيك ۆلاديمير كيم اتقارىلىپ جاتقان جۇمىستار بارىسىن باياندادى.
سونداي-اق ب.ارتىقوۆ اۋدان, قالا اكىمدەرىمەن قاتار جاستارمەن تىلدەستى. وندا اسكەرگە شاقىرىلعان جاستار مەن جيناقتاۋ پۋنكتتەرىنىڭ ماسەلەلەرى كوتەرىلىپ, بولاشاق ساربازدارمەن جان-جاقتى اڭگىمە ءوربىدى.
«اسكەرگە بارۋ – ءاربىر ەر-ازامات ءۇشىن پارىز. بۇل – وتان الدىنداعى قارىزىڭ, ۇلكەن ابىروي جانە مارتەبە. قاي كەزدە بولسىن, وتباسىڭدى, تۋعان جەرىڭدى قورعاۋعا ساقاداي ساي بولۋىڭ كەرەك. سوندىقتان سىزدەر ءۇشىن الداعى بىرجىلدىق ۋاقىت – ومىرلىك ساباق الاتىن, ناعىز ازامات بولىپ شىڭدالىپ شىعاتىن ماڭىزدى كەزەڭ بولماق», دەدى گەنەرال-مايور.
كەزدەسۋ سوڭىندا دەپارتامەنت, باسقارما جانە ءبولىم باسشىلارىنا ءتيىستى تاپسىرمالار بەردى.
جەتىسۋ وبلىسى