بەيسەنبى كۇنى جەتىسۋ وبلىسىنا بارعان پرەزيدەنت قاسىم-جومارت توقاەۆتىڭ جۇمىس ساپارى جۇما كۇنى ودان ءارى قاراتال اۋدانىندا جالعاستى. مەملەكەت باسشىسى اۋدان ورتالىعى – ۇشتوبە قالاسىنداعى قاراتال تاريحي-ولكەتانۋ مۋزەيىنە باردى. مۋزەي بيىل پايدالانۋعا بەرىلگەن.
جالپى اۋدانى 2 520 شارشى مەتر بولاتىن قوس قاباتتى عيماراتتا ولكە تاريحىنا قاتىستى 350-گە جۋىق ەكسپونات قويىلعان. مەملەكەت باسشىسىنا مۋزەيدەگى ارحەولوگيالىق ارتەفاكتىلەر, ەتنوگرافيالىق جادىگەرلەر كورسەتىلىپ, قاراتال اۋدانىنىڭ تاريحى جانە جازۋشى كەمەل توقاەۆ, قازاق كسر حالىق ءارتىسى بيكەن ريموۆا, وسى وڭىردەن شىققان اقىن-جىراۋلار, بي-شەشەندەر مەن ەلگە ەڭبەگى سىڭگەن باسقا دا تۇلعالار تۋرالى تىڭ دەرەكتەر تانىستىرىلدى.
پرەزيدەنت مۋزەيدە جەرگىلىكتى زيالى قاۋىم وكىلدەرىمەن جۇزدەسۋ بارىسىندا مۇراجايدى ارالاپ شىققانىن, ونداعى جادىگەرلەردى كوبەيتۋ كەرەكتىگىن اتاپ ءوتتى. سونداي-اق قوعام دامۋى ءۇشىن مۇنداي مادەني نىسانداردىڭ قاجەت ەكەنىنە نازار اۋداردى. سونىمەن قاتار قاسىم-جومارت توقاەۆ قۇرمەتتى قوناقتار كىتابىنا قولتاڭبا قالدىردى.
ودان ءارى قاسىم-جومارت توقاەۆ ۇشتوبە قالاسىنداعى الەۋمەتتىك نىسانداردى ارالاپ كوردى. اتاپ ايتقاندا, بيىل اشىلعان 30 ورىندىق جاتاقحاناسى بار گۋمانيتارلىق كوللەدجگە باردى. مۇندا بولاشاق پەداگوگتەر «مەكتەپكە دەيىنگى تاربيە جانە وقىتۋ», «باستاۋىش ءبىلىم بەرۋ پەداگوگيكاسى جانە ادىستەمەسى» ماماندىقتارى بويىنشا ءبىلىم الادى.
وقۋ ورنىندا 17 زاماناۋي اۋديتوريا, ءماجىلىس جانە سپورتزالدارى, مەديتسينالىق كابينەت, اسحانا مەن بۋفەت بار. كوللەدج ينكليۋزيۆتى ورتا تالاپتارىنا ساي جابدىقتالعان, ياعني ەرەكشە قاجەتتىلىكتەرى بار ادامدار ءۇشىن پاندۋس پەن ارنايى ليفت قويىلعان.
سونىمەن قاتار مەملەكەت باسشىسى ۇشتوبەدەگى ورتا مەكتەپتى ارالاپ كوردى. ءبىلىم وشاعى 1963 جىلى سالىنعان. 1996 جىلى مەكتەپكە كەمەل توقاەۆتىڭ ەسىمى بەرىلگەن. پرەزيدەنتكە قالامگەر كەمەل توقاەۆتىڭ شاعىن كابينەت-مۇراجايى تانىستىرىلدى. مۇندا جازۋشىنىڭ شىعارمالارى, تۇتىنعان جەكە زاتتارى قويىلعان.
سونداي-اق مەملەكەت باسشىسى بيىل سالىنىپ, حالىق يگىلىگىنە بەرىلگەن دارىگەرلىك امبۋلاتوريا جۇمىسىمەن تانىستى. اتالعان مەديتسينالىق مەكەمە ءبىر اۋىسىمدا 50 ادامدى قابىلداي الادى. ەمدەلۋشىلەر ءۇشىن ستاتسيونار, فيزيوتەراپيا, پروتسەدۋرالىق, ەكپە سالۋ, گينەكولوگيا جانە باسقا دا مەديتسينالىق كابينەتتەر جۇمىس ىستەيدى.
ودان ءارى قاسىم-جومارت توقاەۆ جەتىسۋ وبلىسى قاراتال اۋدانىنىڭ كالپە اۋىلىنا باردى. پرەزيدەنتكە 200 ورىندىق مادەنيەت ءۇيى تانىستىرىلدى. بۇل نىساننىڭ جالپى اۋدانى – 739 شارشى مەتر. مادەنيەت ۇيىندە بىرنەشە شىعارماشىلىق ۇيىرمە جۇمىس ىستەيدى.
سونىمەن قاتار پرەزيدەنت وسى اۋىلدا بوي كوتەرگەن سپورت كەشەنىندە بولدى. نىساننىڭ جالپى اۋدانى – 887,7 شارشى مەتر. ءمودۋلدى عيماراتتا سپورتزالى, بالالار ويىن الاڭى جانە ۆوركاۋت قاراستىرىلعان.
بۇدان كەيىن مەملەكەت باسشىسى تالدىقورعان قالاسىنداعى جاڭادان سالىنعان Jetysu اrena جابىق مۇزايدىنىن ارالاپ, سپورتشىلارمەن اڭگىمەلەستى. سپورت نىسانى تولىقتاي جەكە كاسىپكەردىڭ قاراجاتىنا سالىنىپ, رەسپۋبليكا كۇنى اشىلعان. جالپى ينۆەستيتسيا كولەمى – شامامەن 900 ميلليون تەڭگە. كاسىپكەر مۇحامەتجان سەرىك ۇلىنىڭ ايتۋىنشا, بۇل نىساندا تۇرعىندار شورت-ترەك, حوككەي جانە مانەرلەپ سىرعاناۋ سياقتى قىسقى سپورت تۇرلەرىمەن اينالىسا الادى. سونىمەن قاتار مۇندا پاراليمپيادالىق, ياعني شانالى حوككەيمەن شۇعىلدانۋعا بولادى. ەلىمىزدە حوككەيدىڭ بۇل تۇرىمەن اينالىسۋعا ارنالعان ەكى مۇز ارەناسى بار. ونىڭ ءبىرى – استانادا, ەكىنشىسى – وسى تالدىقورعان قالاسىندا اشىلىپ وتىر.
نىساننىڭ جالپى اۋماعى – 2235,8 شارشى مەتر. كەشەن كاسىبي تەحنولوگيالىق قۇرالدارمەن, ونىڭ ىشىندە توڭازىتقىش, مۇز قۇيۋ جانە سپورت جابدىقتارىمەن قامتىلعان. سونىڭ ناتيجەسىندە مۇندا جىل بويى ۇزدىكسىز جاتتىعۋعا مۇمكىندىك بار. اتالعان جابىق مۇزايدىنى قۇرلىقارالىق حوككەي ليگاسىنىڭ جانە ۇلتتىق حوككەي ليگاسىنىڭ ستاندارتتارىنا ساي كەلەدى.
قاسىم-جومارت توقاەۆ ەل يگىلىگى ءۇشىن ەڭبەك ەتىپ جاتقان كاسىپكەرگە ريزاشىلىعىن ءبىلدىردى. پرەزيدەنت سپورتشىلارمەن اڭگىمەلەسۋ كەزىندە مەملەكەت اتالعان سالانى ودان ءارى قولدايتىنىنا توقتالىپ, جاستاردىڭ سپورتپەن تۇراقتى اينالىسقانىن قۇپتايتىنىن ايتتى.